Read Fulfulde 2 Laamiiɓe 12 Bible Online

2 Laamiiɓe 12 - Fulfulde bible

2 Laamiiɓe 12

¹Yo'as woodi duuɓi joweeɗiɗi saa'i o laamo.

²Nder nduuɓu laamu Yeehu njoweeɗiɗaɓu haa Isra'iila, Yo'as laami haa Yahuuda. O laami haa Urusaliima duuɓi cappanɗe nayi. Innde daada maako, Cibiya mo Biirsaba.

³Yo'as waɗi ko fottani Jawmiraawo nder balɗe ngeendam muuɗum fuu, ngam Yoyada limanjo elti mo booɗɗum.

⁴Ammaa o nattinaay nokkuuje towɗe, yimɓe tokki yahugo ton ngam lii'aago dabbaaji kirseteeɗi e ɓe ngula uurle ton.

⁵Yo'as wi'i liman'en: “Ceede nder dokke cenaaɗe gaddaaɗe haa haykaliiru Jawmiraawo, waato ceede jaɓeteeɗe koo toy e ceede coottaari e ceede dokke caahiiɗe haa haykaliiru Jawmiraawo,

⁶sey liman'en koo'a ɗe, koo moy haa anndaaɓe muuɗum, ɓe mbo'itina haykaliiru Jawmiraawo, haa ɓe tawi bonniiɗum fuu”.

⁷Ammaa haa wargo nduuɓu laamiiɗo Yo'as noogas e tataɓu, liman'en mbo'itinaay haykaliiru Jawmiraawo.

⁸Ngam maajum o ewni Yoyada limanjo e liman'en woɗɓe. O wi'i ɓe: “Koni on mbo'itinaay haykaliiru? Yeeso ɗo, on njogataako ceede ɗe njaɓɗon haa anndaaɓe mooɗon, ndokke ɗe ngam wo'itingo bonniiɗum haa haykaliiru.”

⁹Liman'en ngerdi ɓe tokkataako jogaago ceede yimɓe. Ɓe ngerdi boo ɓe cuklantaako wo'itingo haykaliiru.

¹⁰Nden Yoyada limanjo hoo'i akootiiru, sumpiti maɓɓorde maaru. O jo'ini ndu baŋnge hirsirde, haa wakeere nastirde nyaamre nder haykaliiru Jawmiraawo. Liman'en aynooɓe dammugal ɗon ngaata ceede gaddaaɗe nder haykaliiru Jawmiraawo fuu nder maaru.

¹¹Nde ɓe ndaari ceede ɗuuɗi nder akootiiru, binndoowo laamiiɗo e hooreejo liman'en ngari kooci ceede man, ɓe limi ɗe, ɓe awni ɗe.

¹²Nde ɓe awni ceede man fuu, ɓe ndokka ɗe aynooɓe kuugal haa ɓe njoɓa huuwooɓe nder haykaliiru Jawmiraawo, bana sehooɓe e wo'itinooɓe,

¹³non boo mahooɓe e sehooɓe kaa'e. Ɓe cooda boo leɗɗe e kaa'e cehaaɗe e ɓe njoɓa boo kuuje ɗe wo'itinooɓe kuuwtiniri fuu.

¹⁴Ammaa ɓe kuuwaay daarooje cardi ngam haykaliiru Jawmiraawo bee ceede gaddaaɗe nder maaru, koo laɓe koo taasaaje koo algaytaaji, koo kuuje kaŋŋeeri malla kuuje cardi.

¹⁵Ɓe ndokkiti hakkilanooɓe kuugal ceede ɗe'e fuu, haa ɓe mbo'itina ko wonni nder haykaliiru Jawmiraawo.

¹⁶Jaɓooɓe ceede haa ɓe ndokka hakkilanooɓe kuugal, walaa haaje ɓe mbaɗa lisaafi, ngam ɓe ɗon kuuwa bee hoolaare.

¹⁷Ceede kirseteeɗi ngam joɓki aybe e ceede kirseteeɗi ngam ittuki hakke nastaay haykaliiru Jawmiraawo, kanje ngoni ɗe liman'en.

¹⁸Saa'i maajum Hazayel, laamiiɗo Siriya'en wari haɓugo bee berniwol Gaat, o nyaami ngol. Nden Hazayel taaskani haɓugo bee Urusaliima.

¹⁹Yo'as, laamiiɗo Yahuuda hoo'i kuuje cenaaɗe ɗe kaakiraaɓe muuɗum Yusafat e Yehoram e baaba muuɗum Ahaziya, laamiiɓe Yahuuda cenno e kuuje ɗe o senno bee hoore maako, non boo kaŋŋeeri nder ndesaaje haykaliiru Jawmiraawo e saare laamu fuu, o neldi ɗum haa Hazayel. Kaŋko o dilli, o acci Urusaliima.

²⁰Luttuɗum haala Yo'as e kuuɗe mum fuu, ɗum winndaama nder Deftere Habaruuji Nyalaaɗe nde Laamiiɓe Yahuuda.

²¹Haa ragare, jaggiiɓe maako tuurti. Ɓe mbari Yo'as nder suudu haa Millo, haa diirtorde yahugo Sila.

²²Jaggiiɗo maako Yozabat ɓii Sime'atu e Yozabat ɓii Somer, mbari mo haa Bet-Millo. Ɓe uwi mo baŋnge genaale kaakiraaɓe maako nder Berniwol Daawuda. Ɓiyiiko, Amasiya laami haa pellel maako.