Read Fulfulde 2 Laamiiɓe 14 Bible Online

2 Laamiiɓe 14 - Fulfulde bible

2 Laamiiɓe 14

¹Nder nduuɓu laamu Yo'as ɓii Yo'ahas ɗiɗaɓu haa Isra'iila, Amasiya laami haa Yahuuda, haa pellel baaba maako Yo'as.

²O woodi duuɓi noogas e jowi, saa'i o laamo. O laami haa Urusaliima duuɓi noogas e joweenayi. Innde daada maako, Yo'addan mo Urusaliima.

³O waɗi ko fottani Jawmiraawo, ammaa naa bana kaaka maako Daawuda. O waɗi kal-kal bana baaba maako Yo'as waɗno.

⁴O nattinaay nokkuuje towɗe, yimɓe tokki yahugo haa nokkuuje ɗe'e ngam lii'aago kirseteeɗi dabbaaji e wulugo uurle.

⁵Nde Amasiya semmbiɗi nder laamu, o mbari jaggiiɓe mbarnooɓe baaba maako, laamiiɗo Yo'as.

⁶Ammaa o mbaraay ɓiɓɓe mbarooɓe, fodde ko winnda nder tawreeta, deftere Muusa. Ton Jawmiraawo umri: “Taa baabiraaɓe mbare ngam daliila hakkeeji ɓiɓɓe muuɗum'en, taa ɓiɓɓe boo mbare ngam daliila hakkeeji baabiraaɓe muuɗum'en. Ammaa koo moy mbare ngam daliila hakke muuɗum tan.”

⁷Amasiya mbari Edoomi'en ujine sappo nder Waadiwol Mannda. O nyaami Sela bee haɓre, o inndi ngol Yokteyel. Non ngol wi'a haa wargo hannde.

⁸Saa'i man Amasiya neli yimɓe haa Yo'as laamiiɗo Isra'iila, ɓii Yo'ahas, ɓii Yeehu, ɓe mbi'a mo: “War potten, kaɓen!”

⁹Yo'as, laamiiɗo Isra'iila neli haa Amasiya laamiiɗo Yahuuda wi'ugo mo: “Wumre gi'e Libanon neli haa lekki cemmbiɗki Libanon wi'ugo: Accu ɓiyam gorko te'a ɓiya debbo. Ammaa ndabbaawa ladde ngonŋga haa Libanon saali ton, dammi wumre gi'e.

¹⁰Gooŋga, a jaali Edoom, kanjum ɓernde ma mawniti. Teddin hoore ma! Jooɗa haa saare ma. Koni ngiɗɗa fooɗango hoore ma sarru haa ndo'oɗa, an e Yahuuda fuu?”

¹¹Ammaa Amasiya faalaaki bolle ɗe'e. Nden Yo'as, laamiiɗo Isra'iila wari, fotti bee Amasiya, laamiiɗo Yahuuda, ɓe kaɓi haa Bayti-Semes nder maral Yahuuda.

¹²Isra'iila jaali Yahuuda, yimɓe Yahuuda ndoggi, koo moy haa saare mum.

¹³Yo'as laamiiɗo Isra'iila naŋngi Amasiya ɓii Yo'as ɓii Ahaziya haa Bayti-Semes. Nden o yahri mo haa Urusaliima. O sumpiti mahol Urusaliima, diga Dammugal Efrayim haa Dammugal Toldu[13], baakin meetir teemeɗɗe ɗiɗi.

¹⁴O hooci kaŋŋeeri e cardi e kuuje marɗe saman gonɗe nder haykaliiru Jawmiraawo e gonɗe nder ndesaaje saare laamu fuu. O hooci boo naŋngaaɓe, o lorti haa Samariya.

¹⁵Luttuɗum haala Yo'as e kuuɗe mum e baawɗe mum, no o haɓri bee Amasiya, laamiiɗo Yahuuda boo, ɗum winndaama nder deftere Habaruuji Nyalaaɗe nde Laamiiɓe Isra'iila.

¹⁶Yo'as maayi. Ɓe uwi mo haa Samariya, baŋnge genaale laamiiɓe Isra'iila. Ɓiyiiko Yerobo'am laami haa pellel maako.

¹⁷Ammaa ɓaawo maayde Yo'as ɓii Yo'ahas, laamiiɗo Isra'iila, Amasiya ɓii Yo'as, laamiiɗo Yahuuda tokki yeeɗugo duuɓi sappo e jowi.

¹⁸Luttuɗum haala Amasiya winndaama nder Deftere Habaruuji Nyalaaɗe nde Laamiiɓe Yahuuda.

¹⁹Ɓe tuurtani mo haa Urusaliima. O doggi haa Lakis. Ammaa ɓe neli ɗaɓɓitoygo mo haa Lakis, ɓe tawi mo, ɓe mbari mo ton.

²⁰Ɓe njahri ɓanndu maako bee pucci haa Urusaliima, ɓe uwi mo baŋnge genaale kaakiraaɓe maako nder Berniwol Daawuda.

²¹Yahuudu'en fuu koo'i Azariya mo duuɓi mum sappo e joweego, ɓe laamini haa pellel baaba maako Amasiya.

²²Kaŋko o nyiɓti Elat, o wartiri ngol nder maral Yahuuda ɓaawo maayde baaba maako.

²³Nder nduuɓu laamu Amasiya ɓii Yo'as laamiiɗo Yahuuda sappo e njowaɓu, Yerobo'am ɓii Yo'as laamani Isra'iila haa Samariya. O laami duuɓi cappanɗe nayi e go'o.

²⁴O waɗi kalluɗum yeeso Jawmiraawo, o accaay waɗugo hakkeeji ɗi Yerobo'am ɓii Nebat nastini Isra'iila'en nder maaji.

²⁵O jaɓti lesɗe ɗe Isra'iila marino fuu, diga nastirde Hamat haa woyla, haa yotti Weendu Araba haa fombina, fodde wolde nde annabi Yonas ɓii Amatay mo Gaat-Hefer wolwiri bana Jawmiraawo, Allah Isra'iila umrino mo.

²⁶Ngam Jawmiraawo yi'i bone Isra'iila naawi masin, mawɓe e leesɓe maɓɓe fuu njinni, walaa koo moy ngam wallugo Isra'iila.

²⁷Jawmiraawo wi'aay o nattinan asŋgol Isra'iila. Ngam maajum o hisni ɓe bee juŋngo Yerobo'am ɓii Yo'as.

²⁸Luttuɗum haala Yerobo'am e kuuɗe mum fuu e baawɗe mum, no o haɓri, o wartiri Damas e Hamat berniiji ɗi Yahuuda marno nder maral Isra'iila, ɗum winndaama nder Deftere Habaruuji Nyalaaɗe nde Laamiiɓe Isra'iila.

²⁹Nde Yerobo'am maayi, ɓe uwi mo haa Samariya baŋnge genaale laamiiɓe Isra'iila. Ɓiyiiko Zekariya laami haa pellel maako.