Read Fulfulde 2 Laamiiɓe 17 Bible Online

2 Laamiiɓe 17 - Fulfulde bible

2 Laamiiɓe 17

¹Nder nduuɓu laamu Akas, laamiiɗo Yahuuda, sappo e ɗiɗaɓu, Hose'a ɓii Ela laami haa Isra'iila. O laami haa Samariya duuɓi joweenayi.

²O waɗi kalluɗum yeeso Jawmiraawo, ammaa naa bana laamiiɓe Isra'iila'en aartuɓe mo.

³Salmanasar, laamiiɗo Assuura ukkani mo konu. Hose'a leestani mo, yoɓi mo jomorgol.

⁴Ammaa laamiiɗo Assuura heɓti dabare Hose'a, ngam kaŋko o neli nelaaɓe haa Soo laamiiɗo Misra, o yoɓaay laamiiɗo Assuura jomorgol kitaale fuu. Laamiiɗo Assuura naŋngi mo, haɓɓi mo nder fursina[16].

⁵Nden o wari, o hippi lesdi Isra'iila fuu, o maɓɓi Samariya duuɓi tati.

⁶Nder nduuɓu laamu Hose'a njoweenayaɓu, laamiiɗo Assuura nyaami Samariya, o dahi Isra'iila'en, o yahri ɓe haa Assuura. O jo'ini ɓe haa Halah e baŋnge maayo Habor nder lesdi Goojan e nder gure Medi'en.

⁷Kanjum ɗum laati ngam Isra'iila'en mbaɗi hakke dow Allah Jawmiraawo maɓɓe mo wurtini ɓe lesdi Misra, mo hisni ɓe juŋngo Firawna laamiiɗo Misra. Ɗum laati non ngam ɓe teddini ɗowanteeɓe woɗɓe.

⁸Ɓe tokki al'aadaaji ummaatooje ɗe Jawmiraawo riiwno yeeso maɓɓe e al'aadaaji ɗi laamiiɓe Isra'iila mbaɗi:

⁹Bee sirri Isra'iila'en kuuwi kuuje ɗe pottanaay Allah Jawmiraawo maɓɓe. Ɓe nyiɓi nokkuuje towɗe nder gure maɓɓe fuu, diga cuuɗi aynorɗi haa berniiji cemmbiɗɗi.

¹⁰Ɓe ndarni daŋraŋge e suuraaji Asera dow towndiije e les leɗɗe bilititɗe fuu.

¹¹Ɓe nguli uureteeɗum ton haa nokkuuje towɗe bana ummaatooje ɗe Jawmiraawo dahino yeeso maɓɓe. Ɓe kuuwi kuuɗe kalluɗe ngam tikkingo Jawmiraawo.

¹²Ɓe ndewi labbi, koo nde Jawmiraawo wi'no ɓe: “Taa mbaɗe irin ɗu'um.”

¹³Jawmiraawo reentinino Isra'iila e Yahuuda bee kunnduɗe annabi'en e yi'ooɓe fuu, o wi'no ɓe: “Tuube, acce laabi mooɗon, ɗowtane umrooje am e farillaaji am fodde tawreeta ka umrumi kaakiraaɓe mooɗon fuu, ka neldumi on bee annabi'en, jaggiiɓe am.”

¹⁴Ammaa ɓe cali nanugo ɗum, ɓe caatini ko'e maɓɓe bana kaakiraaɓe maɓɓe, salnooɓe nuɗɗingo Allah Jawmiraawo maɓɓe.

¹⁵Ɓe ngudini umrooje maako e alkawal ngal o haɓɓuno bee kaakiraaɓe maɓɓe e seedamkuuji maako ɗi o seedni ɓe. Ɓe tokki labbi meereeji, ɓe mbaɗi meereejum. Ɓe tokki al'aada ummaatooje taariiɗe ɓe, koo nde Jawmiraawo umruno ɓe taa ɓe mbaɗa bana ɓeya.

¹⁶Ɓe acci umrooje Allah Jawmiraawo maɓɓe fuu, ɓe mbaɗani ko'e maɓɓe suuraaji ɓolinaaɗi, nga'oy ɗiɗoy, ɓe mbaɗi suura Asera, ɓe cujidi yeeso jama'aare konu asama fuu, ɓe ndewi Ba'al.

¹⁷Ɓe lii'i ɓikkoy maɓɓe ngorkoy e ndehoy, ɓe ngulani labbi. Ɓe mbaɗi hatti, ɓe mbaɗi buudeeku. Ɓe ndokki ko'e maɓɓe fuu ngam waɗugo kalluɗum yeeso Jawmiraawo haa ɓe tikkina mo.

¹⁸Jawmiraawo tikkani Isra'iila'en masin, o itti ɓe yeeso maako. Walaa ko lutti, sey lenyol Yahuuda tan.

¹⁹Ammaa yimɓe Yahuuda kamɓe boo, ɓe ɗowtanaay umrooje Allah Jawmiraawo maɓɓe, ɓe tokki al'aadaaji ɗi Isra'iila tokkuno.

²⁰Jawmiraawo wudini danygol Isra'iila'en fuu. O leesni ɓe, o hokki ɓe haa juuɗe jaɓtooɓe, haa o riiwi ɓe diga yeeso maako.

²¹Ɓaawo Jawmiraawo senndi yimɓe Isra'iila bee saare Daawuda, ɓe laamini Yerobo'am ɓii Nebat. Ammaa Yerobo'am selni Isra'iila laawol tokkaago Jawmiraawo, o esti ɓe haa ɓe mbaɗi hakkewol maŋngol.

²²Ɓe tokki hakkeeji ɗi Yerobo'am waɗi fuu, ɓe accaay waɗugo ɗi,

²³haa Jawmiraawo itti Isra'iila yeeso maako, bana o wi'no bee kunnduɗe annabi'en maako. Isra'iila'en dahaama diga lesdi maɓɓe haa Assuura, haa wargo hannde.

²⁴Laamiiɗo Assuura waddi yimɓe diga Baabila e Kuta e Awwa e Hamat e Sefarwayim. O jo'ini ɓe mbattudi[17] Isra'iila'en nder gure Samariya. Kamɓe ɓe njooɗi haa Samariya e gure lesdi maajum, ɓe mari ɗe.

²⁵Nde ɓe puɗɗi jooɗaago ton, ɓe kulaay Jawmiraawo. Nden o neli barooɗe caka maɓɓe, ɗe mbari woɗɓe maɓɓe.

²⁶Ɓe mbi'i laamiiɗo Assuura: “Ummaatooje ɗe ndahɗa, njo'inɗa nder gure Samariya, ɗe anndaa haala al'aada ɗowanteeɗo lesdi ndi'i. O neli barooɗe dow maaje, ɗe ɗon mbara ɗe, ngam ɗe anndaa haala al'aada ɗowanteeɗo lesdi ndi'i.”

²⁷Laamiiɗo Assuura umri: “Njahre gooto nder liman'en ɓe ndahiɗon diga ton, o yaha o jooɗo ton, haa o anndina ɗe haala al'aada ɗowanteeɗo lesdi man.”

²⁸Ngam maajum, gooto nder liman'en dahaaɓe diga Samariya yehi, jooɗi haa Baytila. O anndini yimɓe hulugo Jawmiraawo.

²⁹Ammaa koo yimɓe ummaatoore ndeye ɗon mbaɗa ɗowanteeɓe muuɗum'en. Ɓe jo'ini ɓe nder cuuɗi nokkuuje towɗe ɗe Samariya'en mahi nder gure ɗe ɓe njooɗi.

³⁰Yimɓe Baabila mbaɗi Sukkot-Benot, yimɓe Kuta mbaɗi Nergal, yimɓe Hamat mbaɗi Asiima.

³¹Yimɓe Awwa mbaɗi Nibihaj e Tartak, yimɓe Sefarwayim ɗon lii'o ɓikkoy muuɗum'en ngorkoy nguleteekoy ngam Adrammelek e Anammelek, ɗowanteeɓe Sefarwayim.

³²Ɓe ɗon kula Jawmiraawo boo, ɓe koo'i nder mooɓgal maɓɓe liman'en ngam nokkuuje towɗe. Kamɓe ɓe lii'i kirseteeɗi ngam daliila yimɓe nder cuuɗi nokkuuje towɗe man.

³³Ɓe ɗon kula Jawmiraawo, ammaa ɓe ɗon cujidana ɗowanteeɓe maɓɓe boo fodde al'aada ummaatooje ɗe ɓe dahaama haa maaje.

³⁴Haa wargo hannde, jooɗiiɓe haa Samariya ɗon tokko al'aadaaji ɓooymaaji. Ɓe kulataa Jawmiraawo, ɓe ɗowantaako farillaaji e kiitaaji e tawreeta e umrooje ɗum Jawmiraawo umruno yimɓe Yaakubu mo o ewni ɗum Isra'iila.

³⁵Jawmiraawo haɓɓuno alkawal bee maɓɓe, umruno ɓe: “Taa kule ɗowanteeɓe woɗɓe, taa cujidane ɓe, taa kuuwane ɓe, taa kirsane ɓe.

³⁶Ammaa min, Jawmiraawo gurtinɗo on lesdi Misra bee baawɗe e juŋngo fortaaŋgo, kuleeɗam, cujidaneeɗam, lii'aneeɗam kirseteeɗi.

³⁷Nyalɗe fuu kakkilane farillaaji e kiitaaji e tawreeta e umrooje, ko mi winndani on fuu. Taa kule ɗowanteeɓe woɗɓe.

³⁸Taa ngejjite alkawal ngal kaɓɓumi bee mooɗon. Taa kule ɗowanteeɓe woɗɓe.

³⁹Ammaa kule Allah Jawmiraawo mooɗon, nden min, mi hisnan on juuɗe konne'en mooɗon fuu.”

⁴⁰Ammaa ɓe cali nanugo, ɓe tokki bana al'aada maɓɓe ɓooymaaha.

⁴¹Bana non ummaatooje ɗe'e kuli Jawmiraawo, ammaa ɗe kuuwani labbi maaje boo. Yimɓe danygol maɓɓe tokki waɗugo bana non, haa wargo hannde.