Read Fulfulde 2 Laamiiɓe 18 Bible Online

2 Laamiiɓe 18 - Fulfulde bible

2 Laamiiɓe 18

¹Nder nduuɓu laamu Hose'a ɓii Ela laamiiɗo Isra'iila tataɓu, Hezekiya ɓii Akas laami haa Yahuuda.

²O woodi duuɓi noogas e jowi, saa'i o laamo. O laami haa Urusaliima duuɓi noogas e joweenayi. Innde daada maako, Abi ɓii Zekariya.

³O waɗi ko fottani Jawmiraawo, bana ko kaaka maako Daawuda waɗno fuu.

⁴O yibbini nokkuuje towɗe, o fusi daŋraŋge labbi, o fe'i suuraaji Asera, o fusi mboodi njamndi mboɗeeri ndi Muusa waɗno, ngam haa wargo nyalɗe ɗe'e, Isra'iila'en ɗon ngula uurle yeeso maari, ɓe mbi'i ndi Nehustan.

⁵Hezekiya hooli Jawmiraawo Allah Isra'iila, ɓuri laamiiɓe Yahuuda aartuɓe mo malla laamiiɓe ɓaawo maako fuu.

⁶O ɗakki Jawmiraawo, o selaay laawol tokkaago mo, o ɗowtani umrooje ɗe Jawmiraawo umruno Muusa.

⁷Jawmiraawo wondi bee maako. Ko o waɗi fuu waɗi nafuuda booɗɗum.

⁸O jaali Filisti'en haa yotti lesdi Gaaza, diga cuuɗi aynorɗi haa berniiji cemmbiɗɗi.

⁹Nder nduuɓu laamu Hezekiya nayaɓu, waato nduuɓu laamu Hose'a ɓii Ela laamiiɗo Isra'iila joweeɗiɗaɓu Salmanasar laamiiɗo Assuura wari haa berniwol Samariya, hippi ngol.

¹⁰Ɓaawo duuɓi tati, o nyaami ngol. Ɗum laati nder nduuɓu laamu Hezekiya njoweego'oowu e nder nduuɓu laamu Hose'a njoweenayaɓu.

¹¹Laamiiɗo Assuura dahi Isra'iila'en, o jo'ini ɓe haa Halah e baŋnge maayo Habor nder lesdi Goojan e nder gure Medi'en.

¹²Ɗum waɗi non ngam Isra'iila'en cali nanango Jawmiraawo Allah maɓɓe nder ko o umrino ɓe, ɓe kakkilanaay alkawal maako. Ɓe ɗowtaay e ɓe kuuwaay fodde umrooje ɗe Muusa jaggiiɗo Jawmiraawo anndinno ɓe.

¹³Nder nduuɓu laamu Hezekiya sappo e nayaɓu, Sanherib, laamiiɗo Assuura ukkani berniiji Yahuuda cemmbiɗɗi fuu, o nyaami ɗi.

¹⁴Hezekiya laamiiɗo Yahuuda neli haa laamiiɗo Assuura haa Lakis, wi'ugo mo: “Mi waɗi aybe[18]. Accam, taa ukkanam, mi yoɓan ko a yowantammi fuu.” Laamiiɗo Assuura yowani Hezekiya cardi kilo ujine joweenayi e kaŋŋeeri kilo teemeɗɗe joweenayi.

¹⁵Hezekiya hoo'i cardi ngonndi nder haykaliiru Jawmiraawo e ngonndi nder ndesaaje saare laamu fuu, hokki mo.

¹⁶Wakkati maajum Hezekiya sampiti kaŋŋeeri haa pareeje e darduɗe nder haykaliiru Jawmiraawo, o hokki ndi laamiiɗo Assuura. Hezekiya laamiiɗo Yahuuda, kaŋko bee hoore maako sudduno ɗe bee kaŋŋeeri man naane.

¹⁷Diga Lakis, laamiiɗo Assuura neli mawɗo ardiiɗo honooɓe e mawɗo saraaki'en e mawɗo yarnooɓe[19] mo bee mooɓre konu mawnde haa Urusaliima, haa laamiiɗo Hezekiya. Nde ɓe njotti, ɓe mba'i, ɓe ndari haa ildugol weendu ɓaŋgiindu, haa buuwol Lootirde.

¹⁸Ɓe ewni ngam haa laamiiɗo wara. Eliyakim ɓii Hilkiyya, kaliifaajo laamorde e Sebna, binndoowo e Yo'ak ɓii Asaf, hunndukoojo laamiiɗo, ngurti, njehi haa maɓɓe.

¹⁹Mawɗo yarnooɓe laamiiɗo Assuura wi'i ɓe: “Mbi'e Hezekiya: Laamiiɗo mawɗo, laamiiɗo Assuura wi'i: Hoolaare laaɓnde ndeye marɗa?

²⁰A tammi bolle meere ɗum sawari e baawɗe ngam konu na? Moy kooluɗa haa a tuurtani yam?

²¹Ndaa, a ɗon hooli Misra, kewal gewaaŋgal. To goɗɗo tuggorake ngal, ngal sumpitan mo juŋngo. Bana non Firawna, laamiiɗo Misra wa'i haa hoolotooɓe mo fuu.

²²Ammaa to a wi'i yam: Min ɗon kooli Allah Jawmiraawo amin, naa ɗum kaŋko Hezekiya itti nokkuuje muuɗum towɗe e kirsirɗe muuɗum na? Nden o wi'i yimɓe Yahuuda e Urusaliima: Yeeso hirsirde wonnde haa Urusaliima tan cujiditton!

²³Kadi, narru bee jaagorɗo am, laamiiɗo Assuura. Mi hokkete pucci ujine ɗiɗi, to a woodi wa'otooɓe ɗi.

²⁴Noy a lornirta koo ngomnaajo ɓuranɗo leesugo caka maccuɓe jaagorɗo am? Ammaa a ɗon hoolo Misra ngam daliila mootaaji pucci e wa'otooɓe ɗi.

²⁵Kadi, to mi wari halkugo lesdi ndi'i, ɗum laataaki bee muuyo Jawmiraawo na? Jawmiraawo wi'i yam mi nasta lesdi ndi'i, mi halka ndi.”

²⁶Nden Eliyakim ɓii Helikiya e Sebna e Yo'ak mbi'i mo: “Useni wolwan min bee Aramiyaare, min nanan nde. Accu wolwango min bee Ibraniŋkeere, ngam yimɓe wonɓe dow mahol ɗon nana en.”

²⁷O wi'i ɓe: “On tammi jaagorɗo am neli yam haa jaagorɗo mooɗon e haa mooɗon tan na? Naa ɗum laarani boo jooɗiiɓe dow mahol ɓe'e na? Kamɓe boo naa ɓe nyaaman bu'e maɓɓe, ɓe njaran cille maɓɓe, kal-kal bee mooɗon!”

²⁸Nden o dari, hooli bee Ibraniŋkeere bee semmbe, o wi'i: “Nane wolde laamiiɗo mawɗo, laamiiɗo Assuura!

²⁹Ndaa nii o wi'i: Taa Hezekiya sakla on, ngam o waawataa hisnugo on juŋngo laamiiɗo.

³⁰Taa Hezekiya de'itina on bee Jawmiraawo, o wi'a: Jawmiraawo hisnan en sike, o hokkataa berniwol ngo'ol haa laamiiɗo Assuura.

³¹Taa nanane Hezekiya, ngam laamiiɗo Assuura wi'i: Culhotire bee am, ngarte haa am. Nden koo moy mooɗon nyaaman inabooje muuɗum e ibbi muuɗum, koo moy yaran ndiyam ɓulndu muuɗum,

³²haa mi wara, mi yahra on haa lesdi feere bana ndi mooɗon, lesdi marndi alkamaari e inaboojam ɓennduɗam e tamseere e gese inabooje e jaytunje e njumri, ngam haa ngeeɗon, taa maayon. Ammaa taa nanane Hezekiya, to o esti on, o wi'i: Jawmiraawo hisnan en.

³³Kadi ɗowanteeɓe ummaatooje goɗɗe meeɗi hisnugo lesɗe muuɗum'en diga juŋngo laamiiɗo Assuura na?

³⁴Toy ɗowanteeɓe Hamat e Arpad? Toy ɗowanteeɓe Sefarwayim e Hena e Iwwa? Ɓe kisni Samariya diga juŋngo am na?

³⁵Ɓeye caka ɗowanteeɓe lesɗe ɗe'e fuu kisni lesɗe maɓɓe diga juŋngo am, haa Jawmiraawo hisna Urusaliima diga juŋngo am?”

³⁶Ammaa yimɓe njeeɗi, njaabaaki mo koo wolde. Ngam laamiiɗo umruno: “Taa njaabe mo.”

³⁷Nden Eliyakim ɓii Hilkiyya, kaliifaajo laamorde e Sebna, binndoowo e Yo'ak ɓii Asaf, hunndukoojo laamiiɗo, ngarti haa Hezekiya bee limce ceekaaɗe, ɓe anndini mo bolle mawɗo yarnooɓe go.