Read Fulfulde 2 Laamiiɓe 2 Bible Online

2 Laamiiɓe 2 - Fulfulde bible

2 Laamiiɓe 2

¹Ndaa no Jawmiraawo eeŋginiri Eliya haa asama nder duluuru: Saa'i man Eliya e Elisa ummi Gilgal, ɗon njahda.

²Eliya wi'i Elisa: “Jooɗa haa ɗo, Jawmiraawo neli yam haa Baytila.” Ammaa Elisa wi'i mo: “Fakat bana Jawmiraawo o geeto e an boo a geeto, mi accataa ma sam!” Nden ɓe njahdi haa Baytila.

³Pukara'en[2] annabi'en wonɓe haa Baytila ngurti, ngari haa Elisa. Ɓe mbi'i mo: “A anndi na? Hannde Jawmiraawo eeŋginan jaagorɗo ma.” Elisa wi'i: “Min boo mi anndi, njeeɗe.”

⁴Fahin Eliya wi'i Elisa: “Jooɗa haa ɗo, Jawmiraawo neli yam haa Yeriko.” Ammaa Elisa wi'i mo: “Fakat bana Jawmiraawo o geeto e an boo a geeto, mi accataa ma sam!” Ɓe njahdi Yeriko.

⁵Pukara'en annabi'en wonɓe haa Yeriko ɓaditi Elisa. Ɓe mbi'i mo: “A anndi na? Hannde Jawmiraawo eeŋginan jaagorɗo ma.” O wi'i: “Min boo mi anndi, njeeɗe.”

⁶Kadiboo Eliya wi'i Elisa: “Jooɗa haa ɗo, Jawmiraawo neli yam haa Urdun.” Ammaa Elisa wi'i mo: “Fakat bana Jawmiraawo o geeto e an boo a geeto, mi accataa ma sam!” Nden ɓe njahdi, ɓe ɗiɗo fuu.

⁷Pukara'en cappanɗe njowo nder pukara'en annabi'en njehi, ndari daayiiɗum seɗɗa bee Eliya e Elisa, kamɓe ɓe ndari haa fomoonde maayo Urdun.

⁸Eliya hoo'i alkibbaare muuɗum, taggi nde, fiyi ndiyam bee maare. Ɗam senndi geɓe ɗiɗi. Ɓe eeri dow joorɗum.

⁹Nde ɓe eeri, Eliya wi'i Elisa: “Tora ko a yiɗi mi waɗane, hiddeko Jawmiraawo hoo'ammi diga kommbi ma.” Elisa wi'i: “Mi yiɗi mi heɓa ruuhu ma cowi ɗiɗi.”

¹⁰Eliya wi'i: “A torake huunde nde saɗante heɓugo. Ammaa to a yi'i yam wakkati Jawmiraawo ɗon hoo'ammi kommbi ma, nden kam a heɓan ko a ƴami. To naa non, a heɓataa.”

¹¹Nde ɓe ɗon njaha, ɓe ɗon mbolida, ndaa, moota pucci nga yiite e pucci ɗi yiite cenndi ɓe ɗiɗo fuu, Eliya eeŋgi bee duluuru haa asama.

¹²Elisa yi'i ɗum, o wooki: “Baaba am, baaba am, an woni mootaaji pucci e wa'ooɓe pucci Isra'iila!” Ɓaawo maajum o yi'aay mo. O naŋngi limce maako, o seeki ɗe geɓe[3] ɗiɗi.

¹³Nden Elisa hooci alkibbaare do'iinde diga balbe Eliya, o lorti haa fomoonde Urdun.

¹⁴O hoo'i alkibbaare man, o fiyi ndiyam bee maare, o wi'i: “Toy Allah Jawmiraawo Eliya?” Nde Elisa fiyi ndiyam, ɗam senndi geɓe ɗiɗi, Elisa eeri.

¹⁵Pukara'en annabi'en haa Yeriko, tiitotirɓe bee Elisa, nde ɓe ngi'i mo, ɓe mbi'i: “Ruuhu Eliya ɗon dow Elisa.” Ɓe ngari fottugo bee maako, ɓe turi yeeso maako haa lesdi.

¹⁶Ɓe mbi'i mo: “Ndaa, woodi worɓe semmbiɗɓe cappanɗe njowo caka sukaaɓe ma. Accu ɓe njaha ɗaɓɓititgo jaagorɗo ma, teema Ruuhu Jawmiraawo efti mo, wudini mo dow hooseere woɗnde malla nder waadiwol goɗŋgol.” Ammaa Elisa wi'i: “Taa nele.”

¹⁷Ɓe ndaami mo ɗuuɗɗum haa o wi'i ɓe: “Nele non!” Nden ɓe neli worɓe cappanɗe njowo. Ɓe ɗaɓɓiti mo nyalɗe tati, ammaa ɓe keɓtaay mo.

¹⁸Nden ɓe lorti haa Elisa, o ɗon haa Yeriko tawon. O wi'i ɓe: “Naa mi wi'i on taa on njaha na?”

¹⁹Wonɓe berniwol Yeriko mbi'i Elisa: “Jaagorɗo, a ɗon yi'a berniwol amin ɗon jooɗi booɗɗum. Ammaa ndiyam maagol wooɗaay, lesdi boo rimataa ɓenndalooje.”

²⁰Elisa wi'i: “Ngaddaneeɗam mannda nder taasawo[4] heso.” Ɓe ngaddani mo.

²¹O yehi haa seeɓoore ndiyam, o rufi mannda go nder maare, o wi'i: “Ndaa nii Jawmiraawo wi'i: Mi laɓɓini ndiyam ɗa'am. Ɗam meetataa mbarugo goɗɗo e ɗam meetataa haɗugo lesdi rimugo ɓenndalooje.”

²²Ndiyam man wooti haa wargo hannde, fodde wolde nde Elisa wi'no go.

²³Elisa ummi Yeriko, o ɗon yaha Baytila. Haa laawol, ɓikkoy ngorkoy ngurti berniwol, ɗon njanca mo. Koy mbi'i: “Dillu ɗo, pello! Dillu ɗo pello!”

²⁴O yeesiti, o laari koy, o naali koy bee innde Jawmiraawo. Ɓoodi ɗiɗi ngurti laynde, ɗi celliti cappanɗe nayoy e ɗiɗoy caka maakoy.

²⁵Nden Elisa dilli haa hooseere Karmel. Diga ton o lori haa Samariya.