Read Fulfulde 2 Laamiiɓe 21 Bible Online

2 Laamiiɓe 21 - Fulfulde bible

2 Laamiiɓe 21

¹Manassa woodi duuɓi sappo e ɗiɗi, saa'i o laamo. O laami haa Urusaliima duuɓi cappanɗe jowi e jowi. Innde daada maako, Hefsiba.

²O waɗi kalluɗum yeeso Jawmiraawo bee tokkaago kuuɗe nyidduɗe ɗe ummaatooje ɗe Jawmiraawo riiwno yeeso Isra'iila'en mbaɗno.

³O nyiɓti nokkuuje towɗe ɗe baaba maako Hezekiya yibbinno go. O mahani Ba'al kirsirɗe, o waɗi suura Asera, bana Akab laamiiɗo Isra'iila waɗno ɗum. O sujidani tagle asama fuu, o rewi ɗe.

⁴O nyiɓi kirsirɗe ngam labbi nder haykaliiru Jawmiraawo, ndu Jawmiraawo wi'no: “Mi tabitinan innde am nder Urusaliima.”

⁵O nyiɓani tagle asama fuu kirsirɗe haa dalde ɗiɗi nder haykaliiru Jawmiraawo.

⁶O lii'i ɓiyiiko gorko, o wulani labbi. O waɗi hatti, o darni sarwotooɓe maayɓe e laarooɓe sirriijum. O ɗuɗɗini kalluɗum yeeso Jawmiraawo ngam haa o tikkina mo.

⁷O sehi suura Asera, o darni ka nder haykaliiru. Jawmiraawo wi'no Daawuda e ɓiyum Suleymaanu boo: “Haa haykaliiru ndu'u e haa Urusaliima, berniwol ngol cuɓmi caka berniiji le'i Isra'iila sappo e ɗiɗi fuu tabitinanmi innde am haa foroy.

⁸To ummaatoore Isra'iila ɗowtanake ko mi umri nde fuu booɗɗum fodde tawreeta fuu, waato farillaaji e kiitaaji ɗi mi umruno ɓe bee Muusa jaggiiɗo am, mi meetataa yiilnugo ɓe daayiiɗum bee lesdi ndi ndokkumi kaakiraaɓe maɓɓe.”

⁹Ammaa ɓe cali nanugo, Manassa boo esti ɓe haa ɓe mbaɗi kalluɗum ko ɓuri ummaatooje ɗe Jawmiraawo halkuno yeeso Isra'iila'en.

¹⁰Jawmiraawo wolwi bee kunnduɗe jaggiiɓe muuɗum annabi'en, o wi'i:

¹¹“Manassa, laamiiɗo Yahuuda waɗi kuuɗe nyidduɗe ɗe'e, o waɗi kalluɗum ko ɓuri Amoori'en aartuɓe mo fuu, o nastini Isra'iila'en nder hakke bee labbi maako.

¹²Ngam maajum, ndaa ko Jawmiraawo Allah Isra'iila wi'i: Mi ukkan sarru dow Urusaliima e Yahuuda fuu. Koo moy nani ɗum, hultoran.

¹³Mi hiitoto Urusaliima bana mi hiitori Samariya e saare Akab: Mi fooɗan dow Urusaliima ɓoggol Samariya poondirgol e njamndi mahoowo ndi saare Akab. Mi ittan jooɗiiɓe Urusaliima bana goɗɗo yiggirta taasawo nden o hippa ngo.

¹⁴Mi wudinan luttuɓe yimɓe am, mi hokkan ɓe haa konne'en maɓɓe. Ɓe laatanto konne'en maɓɓe huunde jaɓtugo e wilugo.

¹⁵Mi waɗan ɗum ngam ɓe mbaɗi kalluɗum yeeso am, ngam ɓe tikkini yam tum, diga nyalaade nde kaakiraaɓe maɓɓe ngurti Misra haa wargo hannde.”

¹⁶Manassa rufi ƴiiƴam yimɓe ɓe ngoodaa aybe ɗuuɗɓe haa ɗam hebbini Urusaliima. Mbar-hoore nde ɓesdi dow hakkeeji maako ɗi o nastini Isra'iila'en nder maaji bee waɗugo halleende yeeso Jawmiraawo.

¹⁷Luttuɗum haala Manassa e kuuɗe mum fuu e hakkeeji mum ɗum o waɗi, ɗum winndaama nder Deftere Habaruuji Nyalaaɗe nde Laamiiɓe Yahuuda.

¹⁸Manassa maayi, ɓe uwi mo nder jarne saare maako, nde ɓe ewnata jarne Uzza. Ɓiyiiko Amon laami haa pellel maako.

¹⁹Amon woodi duuɓi noogas e ɗiɗi, saa'i o laamo. O laami haa Urusaliima duuɓi ɗiɗi. Innde daada maako, Mesulemet ɓii Harus mo Yotba.

²⁰O waɗi kalluɗum yeeso Jawmiraawo, bana baaba maako Manassa waɗno.

²¹O tokki kala laawol kalluŋgol ngol baaba maako tokkino, o rewi labbi ɗi baaba maako rewno. O sujidani ɗi.

²²O wudini Allah Jawmiraawo kaakiraaɓe maako, o tokkaaki laawol Jawmiraawo.

²³Jaggiiɓe Amon tuurtani mo. Ɓe mbari mo nder suudu maako.

²⁴Ammaa yimɓe lesdi Yahuuda mbari tuurtuɓe dow laamiiɗo Amon. Nden ɓe laamini ɓiyiiko Yusiya haa pellel maako.

²⁵Luttuɗum haala Amon e kuuɗe mum, ɗum winndaama nder Deftere Habaruuji Nyalaaɗe nde Laamiiɓe Yahuuda.

²⁶Ɓe uwi mo nder yenaande maako nder jarne Uzza. Ɓiyiiko Yusiya laami haa pellel maako.