Read Fulfulde 2 Laamiiɓe 25 Bible Online

2 Laamiiɓe 25 - Fulfulde bible

2 Laamiiɓe 25

¹Nder nduuɓu laamu Sedekiya njoweenayaɓu, nder lewru sappooru, nyalaade sappo maaru Nabukodonosor wardi bee jama'aare konu muuɗum, ɓe mbaɗi saŋngeere maɓɓe yeeso berniwol. Yimɓe Nabukodonosor mbaagi lesdi, haa taari berniwol ngam hippaago ngol.

²Ɓe jooɗi ton haa wargo nduuɓu laamiiɗo Sedekiya sappo e go'oowu.

³Nyannde joweenayaɓre nder lewru nayaɓru, weelo saatuŋgo waɗi nder berniwol. Walaa nyaamdu ngam ummaatoore.

⁴Kaldiya'en cumpiti mahol berniwol. Nde jemma waɗi, jama'aare konu Yahuuda fuu doggi. Koo nde Kaldiya'en ɗon taari Urusaliima, ɓe caali gal dammugal gonŋgal hakkunde mahi ɗiɗi, ɗakki jarne laamiiɗo. Nden laamiiɗo Sedekiya tokki laawol gal waadiwol Urdun.

⁵Ammaa jama'aaje konu Kaldiya'en taasni mo, njokki mo haa yayre kommbi Yeriko. Jama'aare konu maako fuu saŋkiti, acci mo.

⁶Kaldiya'en naŋngi mo, ɓe njahri mo yeeso laamiiɗo Baabila haa Ribla. Ton ɓe kiiti mo.

⁷Ɓe kirsidi ɓiɓɓe Sedekiya yeeso maako. Nden ɓe ɗoofi mo gite, ɓe kaɓɓi mo bee callalluuji njamndi mboɗeeri, ɓe njahri mo haa Baabila.

⁸Nder nduuɓu laamu Nabukodonosor laamiiɗo Baabila sappo e njoweenayaɓu, nder nyalaade joweeɗiɗawre nder lewru jowaɓru, Nebuzaradan, hooreejo aynooɓe laamiiɗo Baabila nasti Urusaliima.

⁹O wuli haykaliiru Jawmiraawo e saare laamu e cuuɗi Urusaliima e cuuɗi mawɓe fuu.

¹⁰Jama'aare konu Kaldiya'en fuu e hooreejo aynooɓe ngibbini mahi taariiɗi Urusaliima.

¹¹Ɓaawo maajum Nebuzaradan dahi luttuɓe nder berniwol e hawtanɓe laamiiɗo Baabila e ummaatoore luttunde fuu.

¹²Ammaa o acci laafuɓe woɗɓe nder lesdi haa ɓe laato remooɓe inabooje e gese.

¹³Kaldiya'en pusi daŋraŋge njamndi mboɗeeri haa haykaliiru Jawmiraawo e jo'inirɗe e loonde njamndi mboɗeeri wonnde haa daldal haykaliiru. Ɓe njahri kuuje ɗe njamndi mboɗeeri ɗe'e haa Baabila.

¹⁴Ɓe kooci boo kuuje ɗe njamndi mboɗeeri kuuwtinirteeɗe ngam dewal, payanɗe ngam ndoondi, ɓoftirɗe, laɓe e taasahoy.

¹⁵Hooreejo aynooɓe hooci kuuje kaŋŋeeri e cardi corok bana pehe uurorɗe e taasaaje fuu.

¹⁶Daŋraŋge ɗiɗi e loonde go e jo'inirɗe ɗe Suleymaanu waɗno ngam haykaliiru Jawmiraawo, njamndi mboɗeeri kuuje ɗe'e fuu, goɗɗo waawataa awnugo ɗum.

¹⁷Towirka daŋraŋgal gootal waɗi meetir joweenayi. Hoore njamndi mboɗeeri ɗonno dow maagal. Towirka hoore man waɗi meetir gootel bee reeta. Bamaaɗum e rummaanooje taari hoore man, ɗum fuu ɗum njamndi mboɗeeri. Bana non boo daŋraŋgal feere bee bamaaɗum maagal.

¹⁸Nden hooreejo aynooɓe hoo'i Seraya, limanjo mawɗo e Sefaniya limanjo ɗiɗaɓo e aynooɓe dammuɗe tato.

¹⁹Nder berniwol o hoo'i gooto nder saraaki'en maako kaliifaajo honooɓe e worɓe njowo caka ɓurɓe ɓadaago bee laamiiɗo, tawaaɓe nder berniwol e binndoowo mawɗo konu, mo hoo'i yimɓe lesdi ngam jama'aare konu e worɓe cappanɗe njoweego nder yimɓe lesdi tawaaɓe nder berniwol.

²⁰Nebuzaradan, hooreejo aynooɓe hoo'i ɓe, yahri ɓe yeeso laamiiɗo Baabila haa Ribla.

²¹Laamiiɗo Baabila umri ɓoccugo ɓe e mbarugo ɓe haa Ribla nder lesdi Hamat. Ton ɓe maayi. Bana nii yimɓe Yahuuda ndahira diga lesdi muuɗum'en.

²²Nabukodonosor laamiiɗo Baabila ardini Gedaliya ɓii Ahikam taaniraawo Safan dow luttuɓe haa lesdi Yahuuda.

²³Nde hoore'en jama'aaje konu e yimɓe maɓɓe nani laamiiɗo Baabila ardini Gedaliya, ɓe ngari haa Gedaliya haa Mispa. Ɗum Isma'iilu ɓii Netaniya e Yohanan ɓii Kareha e Seraya ɓii Tanhumet Netofaajo e Yaajaniya ɓii Ma'akatiijo, kamɓe e yimɓe maɓɓe.

²⁴Gedaliya hunani ɓe wi'i: “Taa kule jaggiiɓe Kaldiya'en ɓe'e. Njooɗe nder lesdi, kuuwane laamiiɗo Baabila, nden kam on njooɗoto jam.”

²⁵Ammaa nder lewru joweeɗiɗaɓru hitaande man, Isma'iilu ɓii Netaniya ɓii Eliisama, goɗɗo danygol laamiiɗo wardi bee yimɓe sappo, ɓe mbari Gedaliya e Yahuudu'en e Kaldiya'en wonduɓe bee maako haa Mispa.

²⁶Nden ummaatoore e hoore'en jama'aaje konu fuu ndoggi, njehi haa lesdi Misra, ngam ɓe kuli Kaldiya'en.

²⁷Nder nduuɓu cappanɗe tati e njoweeɗiɗaɓu ɓaawo daheeki Yooyakin laamiiɗo Yahuuda diga Urusaliima, Ewil-Merodak laami haa Baabila. Nder nyalaade noogas e joweeɗiɗawre nder lewru sappo e ɗiɗaɓru hitaande man, o woonani Yooyakin, o wurtini mo diga fursina.

²⁸O mo'ani mo, o ɓaŋgti joonde maako dow joole laamiiɓe wonduɓe bee maako haa Baabila.

²⁹Ɓe ɓorti Yooyakin limce fursina. O nyaami haa taabal laamiiɗo balɗe maako fuu.

³⁰Nguure maako, nguure tabitiinde, laamiiɗo hokki mo nde nyalaade nyalaade, balɗe maako fuu.