Read Fulfulde 2 Laamiiɓe 6 Bible Online

2 Laamiiɓe 6 - Fulfulde bible

2 Laamiiɓe 6

¹Nyannde feere, pukara'en annabi'en mbi'i jaagorɗo muuɗum'en Elisa: “Ndaa, nokkuure nde en njooɗi ɓilli.

²Accu min njaha haa maayo Urdun, koo moy amin ɗaɓɓita leɗɗe ton, haa min nyiɓa suudu ngam jooɗaago.” O wi'i: “Njehe.”

³Gooto maɓɓe wi'i: “Useni yahdu bee sukaaɓe ma.” O wi'i: “Mi yahdan bee mon.”

⁴O yahdi bee maɓɓe. Nde ɓe njotti Urdun, ɓe pe'i leɗɗe.

⁵Ammaa nde gooto maɓɓe ɗon fe'a lekki, njamndi fe'irde seŋti do'i nder ndiyam. O wooki: “Kayto, jaagorɗo am, fe'irde nde'e, mi wu'i nde!”

⁶Elisa ƴami: “Toy ndi do'i?” O sappini mo nokkuure man. Elisa ta'i leggel, sakkini ngel ton, nden njamndi go weeyi dow ndiyam.

⁷Nden o wi'i: “Hoo'u ndi.” O forti juŋngo maako, o hoo'i ndi.

⁸Yaake laamiiɗo Siriya'en ɗonno haɓa bee Isra'iila, o sarwotiri bee sukaaɓe maako, o yecci ɓe pellel ngel o yiɗi waɗugo saŋngeere honooɓe maako.

⁹Ammaa Elisa goɗɗo Allah neli haa laamiiɗo Isra'iila, wi'i: “Hakkil! Taa saala gal nokkuure maajum, ngam Siriya'en njippoto ton.”

¹⁰Laamiiɓe Isra'iila neli woɗɓe haa nokkuure maajum, ɓe ayni nde bee hakkiilo. Nde ɗuuɗɗum Elisa reentini[5] laamiiɗo Isra'iila, kaŋko boo o hakkili masin.

¹¹Ngam maajum laamiiɗo Siriya'en tikki masin. O ewni sukaaɓe maako, o wi'i ɓe: “Anndineeɗam: Moy caka meeɗen ɗon wallita laamiiɗo Isra'iila?”

¹²Gooto nder sukaaɓe maako wi'i: “Barkaama, walaa mo wallititta mo caka meeɗen. Ammaa ɗum Elisa, annabiijo anndinta laamiiɗo Isra'iila bolle ɗe mbolwata koo haa waaleteendu ma.”

¹³O wi'i: “Njehe, ndaare toy o woni, ɗaɓɓite mo. Haa mi nela naŋngugo mo.” Ɓe ngecci mo: “O ɗon haa Dotan.”

¹⁴O neldi pucci e mootaaji pucci ton e jama'aare konu ɗuuɗnde. Ɓe ngari bee jemma ɓe taari berniwol.

¹⁵Jaŋngo man suka Elisa ummi fajiri cub, o wurti suudu. O yi'i jama'aare konu ɗon taari berniwol bee pucci e mootaaji pucci. O wi'i Elisa: “Kayto! Jaagorɗo am, noy mbaɗeten?”

¹⁶Ammaa Elisa wi'i: “Taa hul, ngam wonduɓe bee meeɗen ɓuri wonduɓe bee maɓɓe ɗuuɗugo.”

¹⁷Elisa tori Allah, o wi'i: “Yaa Jawmiraawo, maɓɓitit gite maako haa o yi'a.” Jawmiraawo maɓɓiti gite suka Elisa, o yi'i. Ndaa, hooseere heewi pucci e mootaaji ɗi yiite, ɗi ɗon taari Elisa.

¹⁸Nde honooɓe Siriya'en njippi gal Elisa, o tori Jawmiraawo, o wi'i: “Wumnu yimɓe ɓe'e!” Jawmiraawo wumni ɓe fodde wolde Elisa.

¹⁹Elisa wi'i ɓe: “Naa ɗum laawol mon, naa ɗum berniwol ngol ɗaɓɓititton. Tokkeeɗam, mi ɗowan on haa gorko mo ɗaɓɓoton.” O ɗowi ɓe haa Samariya.

²⁰Nde ɓe nasti Samariya, Elisa wi'i: “Yaa Jawmiraawo, maɓɓitit gite maɓɓe haa ɓe ngi'a.” Jawmiraawo maɓɓiti gite maɓɓe, ɓe ngi'i, ɓe ɗon haa caka Samariya.

²¹Nde laamiiɗo Isra'iila yi'i ɓe, o ƴami Elisa: “Baaba am, mi mbaran ɓe na?”

²²Ammaa o wi'i: “A mbarataa ɓe. A mbaranno yimɓe ɓe naŋnguɗa bee kaafahi ma e lagaawal ma na? Jo'inan ɓe nyaamdu e ndiyam, haa ɓe nyaama, ɓe njara, nden ɓe lorto haa jaagorɗo maɓɓe.”

²³Laamiiɗo waɗani ɓe nyaamduuji ɗuuɗɗi, ɓe nyaami, ɓe njari. Nden o firliti ɓe, ɓe lorti haa jaagorɗo maɓɓe. Ngam maajum mooɓe Siriya'en hippooɓe meetaay nastugo lesdi Isra'iila.

²⁴Ɓaawoɗon Benhadat laamiiɗo Siriya'en, mooɓti jama'aare konu muuɗum fuu. O wari, o hippi Samariya.

²⁵Nden weelo[6] saatuŋgo waɗi nder Samariya, honooɓe ɓe'e tokki hippaago berniwol haa saman hoore wamnde waɗi ceede cardi cappanɗe joweetati e saman reetita kilo koonal pooli boo waɗi ceede cardi jowi.

²⁶Nyannde feere, laamiiɗo Isra'iila ɗon waanca dow mahol, debbo wooki, wi'i: “Hisnam, barkaama!”

²⁷Ammaa laamiiɗo wi'i: “To Jawmiraawo hisnaay ma, noy mi hisnirte? Mi woodi alkamaari malla inaboojam ɓennduɗam na?”

²⁸Fahin, o wi'i mo: “Ko waɗ ma?” Debbo jaabi: “Nyannde feere debbo oo wi'i yam, min nyaama ɓiŋngel am. Jaŋngo man boo, min nyaama ngel maako.

²⁹Bana non min ndefi ɓiyam, min nyaami mo. Jaŋngo man mi wi'i mo: Hokku ɓiya go, nyaamen mo. Ammaa o suuɗi ɓiyiiko.”

³⁰Nde laamiiɗo nani bolle debbo oo, o seeki limce maako, saa'i o ɗonno dow mahol. Yimɓe berniwol fuu ngi'i limce buhuuje ɗon taari dow ɓanndu les limce maako.

³¹Laamiiɗo wi'i: “Allah ukkana yam boneeji ɓurɗi naawugo, to mi ta'aay hoore Elisa ɓii Safat hannde!”

³²Saa'i maajum, Elisa ɗon jooɗodi bee ndotti'en nder saare mum. Laamiiɗo neli goɗɗo haa maako. Ammaa diga nelaaɗo oo yottaaki, Elisa wi'i ndotti'en: “On ngi'i na! Mbaroowo oo neli goɗɗo ngam ta'ugo hoore am. Kakkile, to o yottake, maɓɓe dammugal, kaɗe mo nastugo. Ndaa ma, mi ɗon nana sonyo kosɗe jaagorɗo maako ɗon tokko mo!”

³³Diga o ɗon wolwa bee maɓɓe tawon, nelaaɗo wari haa maako, wi'i: “Sarru ngu'u iwi haa Jawmiraawo, tammunde ndeye luttani yam haa Jawmiraawo?”