Read Fulfulde 2 Laamiiɓe 7 Bible Online

2 Laamiiɓe 7 - Fulfulde bible

2 Laamiiɓe 7

¹Elisa wi'i: “Nane ko Jawmiraawo wi'i: Jaŋngo bana wakkati jonta, ɓe coorran kuroori ɗiggundi kilo sappo e ɗiɗi dow suleyre cardi, sa'iiruuri kilo noogas e nayi dow suleyre cardi, haa dammugal Samariya.”

²Ardiiɗo, mo laamiiɗo tuggoto dow juuɗe mum jaabi Elisa: “Koo to Jawmiraawo waɗi burɗe haa asama, ko mbolwuɗa ɗo waɗoto na?” Elisa jaabi: “A yi'an ɗum bee gite ma, ammaa a nyaamataa ɗum.”

³Woodi worɓe kuturu'en nayo ɗon njooɗi haa dammugal berniwol. Ɓe mbi'mbi'tiri: “Koni njooɗotooɗen haa ɗo haa maayde tawa en?

⁴To en nasti berniwol, en maayan ngam walaa ko nyaamete ton. To en njooɗake haa ɗo boo, en maayan. Ndikka en njippo haa saŋngeere Siriya'en. To ɓe acci en, en ngeeɗan. To ɓe mbari en boo kal.”

⁵Nde naaŋge ɗon muta, ɓe ummi ngam nastugo saŋngeere Siriya'en. Ɓe njotti haa kommbi saŋngeere, asee, walaa koo goɗɗo.

⁶Ngam Jawmiraawo umminno hoolo mootaaji pucci e pucci e hoolo jama'aare konu ɗuuɗnde nder saŋngeere Siriya'en. Ɓe mbi'mbi'tiri: “Laamiiɗo Isra'iila yoɓi laamiiɓe Heti'en e laamiiɓe Misra ceede, ngam haa ɓe ukkano en!”

⁷Ɓe ummi, ɓe ndoggi wakkati naaŋge ɗon muta. Ɓe acci laymaaji maɓɓe e pucci maɓɓe e bamɗe maɓɓe, saŋngeere maɓɓe fuu bana no nde wa'i. Ɓe ndoggi ngam hisnugo yoŋki maɓɓe.

⁸Nde kuturu'en go njotti kommbi saŋngeere, ɓe nasti laymaaru feere, ɓe nyaami, ɓe njari, ɓe kooci cardi e kaŋŋeeri e limce. Nden ɓe ndilli, ɓe nyukkini ɗum. Ɓe lorti, ɓe nasti laymaaru feere, ɓe kooci kuuje ton boo, ɓe ndilli, ɓe nyukkini ɗum.

⁹Nden ɓe mbi'mbi'tiri: “En mbaɗaay ko fotti. Hannde woni nyalaade kubaruwol belŋgol. Ammaa to en njeeɗake, to en ndeeni haa subaha, ɗum laatoto aybe dow meeɗen. Ngare jonta, nasten berniwol, anndinen ɗum nder saare laamiiɗo.”

¹⁰Ɓe ngari, ɓe ewni aynooɓe dammugal berniwol, ɓe anndini ɓe: “Min nasti saŋngeere Siriya'en. Min tawaay koo goɗɗo, walaa sawtu neɗɗo sam, sey pucci toŋngaaɗi e bamɗe toŋngaaɗe e laymaaji bana no ɗi mba'i.”

¹¹Nden aynooɓe dammugal ewni goɗɗo haa o yaha o anndina ɗum nder saare laamiiɗo.

¹²Jemma laamiiɗo ummi, o wi'i jaggiiɓe maako: “Mi yeccan on ko Siriya'en anniyi waɗugo en. Ɓe anndi en weelaaɓe. Ngam maajum ɓe ngurti saŋngeere, ɓe nyukki haa ladde. Ɓe numi, to en ngurtake Samariya, ɓe naŋngan en, ɓe nasta berniwol boo.”

¹³Gooto nder jaggiiɓe maako wi'i: “Useni, accu en nela yimɓe njowo, ɓe koo'a pucci jowi caka luttuɗi nder berniwol, ɓe njaha ɓe ndaara ko waɗi. Ngam to en njahaay, ɗi laatoto bana mooɓre Isra'iila'en luttuɓe nder berniwol fuu, ɓe fuu ɓe nattan!”

¹⁴Nden ɓe koo'i mootaaji pucci ɗiɗi bee pucci. Laamiiɗo neldi nelaaɓe ngam taasnugo jama'aare konu Siriya'en, o wi'i: “Njehe, ndaare ko waɗi ɓe.”

¹⁵Ɓe tokki ɓe haa yotti Urdun. Laawol fuu heewi limce e kuuje ɗe Siriya'en ngudini ngam jaawal doggudu maɓɓe. Nelaaɓe lorti, anndini ɗum laamiiɗo.

¹⁶Yimɓe fuu ngurti berniwol, ɓofti kuuje nder saŋngeere Siriya'en. Kuroori kilo sappo e ɗiɗi soorri suleyre cardi, non boo sa'iiruuri kilo noogas e nayi soorri suleyre cardi, fodde wolde Jawmiraawo.

¹⁷Laamiiɗo darnino ardiiɗo mo o tuggoto dow juuɗe mum go haa o ayna dammugal berniwol. Ammaa yimɓe njaaɓi mo haa dammugal, o maayi, bana Elisa wi'no, nde laamiiɗo warno haa maako.

¹⁸Ngam Elisa wi'no laamiiɗo: “Jaŋngo bana wakkati jonta, on coodan sa'iiruuri kilo noogas e nayi baakin suleyre cardi e kuroori kilo sappo e ɗiɗi baakin suleyre haa dammugal Samariya.”

¹⁹Ammaa ardiiɗo go jaabino mo: “Koo to Jawmiraawo waɗi burɗe haa asama, irin maajum waɗoto na?” Elisa wi'no: “A yi'an ɗum bee gite ma, ammaa a nyaamataa ɗum.”

²⁰Kanjum waɗi mo, yimɓe njaaɓi mo haa dammugal berniwol, o maayi.