Read Fulfulde 2 Laamiiɓe 9 Bible Online

2 Laamiiɓe 9 - Fulfulde bible

2 Laamiiɓe 9

¹Nyannde feere, annabi Elisa ewni derkeejo gooto diga pukara'en annabi'en, o wi'i mo: “Taaskana jahaaŋgal. Hoo'u faandu nebbam ndu'u, yah haa Ramot nder Gile'at.

²Ton, a tawata Yeehu ɓii Yusafat, ɓii Nimsi, wurtin mo caka huuwdiɗɗiraaɓe maako, a nastina mo suudu nyukkiindu.

³Nden hoo'u faandu, ruf nebbam ɗa'am dow hoore maako, wi: Ndaa nii Jawmiraawo wi'i: Mi moyti ma a laamiiɗo Isra'iila. Nden maɓɓitu dammugal, doggu taa neeɓu!”

⁴Nden annabiijo derkeejo oo dilli haa Ramot nder lesdi Gile'at.

⁵Nde o yotti, mawɓe honooɓe Isra'iila ɗonno njooɗi. Annabiijo derkeejo oo wi'i: “Woodi ko mi wi'ata ma, barkaama!” Yeehu ƴami mo: “Moy caka amin ngiɗɗa wolwango?” Annabiijo jaabi: “An ngiɗmi wolwango barkaama.”

⁶Yeehu ummi, ɓe nasti suudu. Annabiijo rufi nebbam dow hoore maako, o wi'i mo: “Ndaa ko Jawmiraawo Allah Isra'iila wi'i: Mi moyti ma ngam haa a laamano ummaatoore am Isra'iila.

⁷Sey mbara danygol Akab, jaagorɗo ma. Bana non mi waatoto annabi'en, jaggiiɓe am e jaggiiɓe am woɗɓe fuu, ɓe Izabel mbari.

⁸Sey saare Akab fuu natta. Mi nattinan worɓe nder danygol Akab fuu, mawɓe e leesɓe nder Isra'iila.

⁹Mi wartiran saare Akab bana saare Yerobo'am ɓii Nebat, bana saare Ba'asa ɓii Ahiya.

¹⁰Ammaa Izabel, walaa mo uwata mo, dawaaɗi nyaaman mo nder ngesa Yisre'el.” Nde o timmini wolwugo, o maɓɓiti dammugal, o doggi.

¹¹Yeehu wurti, lorti haa huuwdiɗɗiraaɓe muuɗum. Ɓe ƴami mo: “Ɗume waɗi? Ɗume ginnaaɗo oo yiɗi haa ma? Yeehu jaabi: Walaa, on anndi gorko oo e haalaaji muuɗum.”

¹²Ɓe mbi'i mo: “A fewi. Anndin min ko o wi'i ma.” Yeehu wi'i: “Booɗɗum, o wi'i yam nii bee nii, o wi'i yam: Mi moyti ma, a laamiiɗo Isra'iila!”

¹³Ɓe njaawi, koo moy maɓɓe hoo'i ngapaleewol muuɗum, ɓe mbe'iti ɗi les kosɗe maako dow ba'orɗe. Ɓe puufi luwal, ɓe ngooyni: “Yeehu laamake!”

¹⁴Yeehu ɓii Yusafat, ɓii Nimsi tuurtani Yoram. Saa'i maajum, Yoram e Isra'iila fuu ɗonno ayna Ramot nder Gile'at ngam daliila Hazayel laamiiɗo Siriya'en.

¹⁵Ammaa laamiiɗo Yoram lortino haa Yisre'el ngam nyawndeeki kuuduuje muuɗum ɗe Siriya'en piyno mo, saa'i o haɓi bee Hazayel. Yeehu wi'i huuwdiɗɗiraaɓe muuɗum: “To on numi bana nii, taa goɗɗo dogga wurto berniwol o yahra habaru haa Yisre'el.”

¹⁶Nden Yeehu wa'i moota pucci muuɗum, yehi Yisre'el, ngam Yoram ɗon waali ton. Ahaziya laamiiɗo Yahuuda boo yehino yillaago Yoram.

¹⁷Aynoowo dari dow suudu towndu semmbiɗndu haa Yisre'el. O yi'i mooɓre Yeehu ɗon wara. O wi'i: “Mi ɗon yi'a mooɓre.” Yoram wi'i: “Hoo'u ba'iiɗo puccu, nel mo haa o fotta bee maɓɓe, o ƴama ɓe: Jam waddi on na?”

¹⁸Ba'iiɗo puccu yehi, fotti bee Yeehu, wi'i: “Laamiiɗo ƴami ma: Jam waddu ma na?” Yeehu jaabi: “Ko yaali ma bee jam? War, tokkam.” Aynoowo anndini laamiiɗo, wi'i: “Nelaaɗo yottake haa maɓɓe, ammaa o lorataako.”

¹⁹Nden o neli ba'iiɗo ɗiɗaɓo. O yotti haa maɓɓe, o wi'i: “Ndaa nii laamiiɗo wi'i: Jam waddi on na?” Yeehu jaabi: “Ko yaali ma bee jam? War, tokkam.”

²⁰Aynoowo anndini laamiiɗo, wi'i: “O yottake haa maɓɓe, o lorataako. Ba'iiɗo man ɗon samna bana ginnaaɗo, bana Yeehu ɓii Nimsi.”

²¹Yoram wi'i: “Waɗ pucci haa moota am.” Ɓe taaskitini moota pucci maako. Nden Yoram, laamiiɗo Isra'iila e Ahaziya, laamiiɗo Yahuuda, ngurti koo moy dow moota mum. Ɓe njehi ngam fottugo bee Yeehu. Ɓe potti bee maako haa tayre ngesa Nabot Yisre'eljo.

²²Nde Yoram laari Yeehu, o ƴami mo: “Jam waddi ma na, Yeehu?” Yeehu jaabi: “Noy jam laatorto? Nde nii daada ma Izabel accaay waɗugo daakaareeku bee rewugo labbi e waɗugo boo hiilaaji ɗuuɗɗi.”

²³Yoram wayliti, doggi, o ɗon wooka wi'a Ahaziya: “Hakkil, Ahaziya, ɗum zammba!”

²⁴Ammaa Yeehu naŋngi lagaawal bee juŋngo muuɗum, fiɗi Yoram caka balbe muuɗum haa kurol sumpiti mo ɓernde. O do'i nder moota pucci maako, o maayi.

²⁵Nden Yeehu wi'i Bitkar ɗoftoowo mo: “Eftu mo, sakkin mo nder tayre ngesa Nabot Yisre'eljo. Siftor ko Jawmiraawo wolwino dow baaba maako, laamiiɗo Akab, nyalaade maajum en ɗiɗo, bee woɗɓe ɗowooɓe mootaaji pucci, en ɗofti mo:

²⁶Fakat bana ngi'mi keenya ƴiiƴam Nabot e ƴiiƴam ɓiyiiko'en, mi yoɓnete ɗam dow tayre ngesa ka'a. Non Jawmiraawo wi'i. Eftu mo jonta, sakkin mo nder ngesa ka'a fodde wolde Jawmiraawo.”

²⁷Nde Ahaziya, laamiiɗo Yahuuda yi'i ɗum, o doggiri laawol Bayti-Haggan. Yeehu taasni mo, wi'i: “Kaŋko boo mbare mo.” Ɓe naawni mo dow wa'orde Guur baŋnge Yible'am. O tokki doggugo haa o yotti Megiddo, ton o maayi.

²⁸Jaggiiɓe maako njahri mo bee moota pucci haa Urusaliima. Ɓe uwi mo nder yenaande maako baŋnge genaale kaakiraaɓe maako nder Berniwol Daawuda.

²⁹Nder nduuɓu Yoram ɓii Akab sappo e ngo'oowu, Ahaziya heɓno laamu haa Yahuuda.

³⁰Yeehu wari Yisre'el. Nde Izabel nani ɗum, o waɗi pinaari haa gite maako, o mo'ini moorɗi maako. Nden o laari diga dow gal wurdere mahol.

³¹Nde Yeehu nasti yolnde saare, Izabel wi'i: “Zimiri[8], mbarɗo jawmum, a jamo na?”

³²Yeehu ɓaŋgti gite muuɗum gal wurdere, wi'i: “Moy wondata bee am? Moy?” Saraaki'en ɗiɗo koo tato ndaari gal maako.

³³O wi'i: “Njippine mo.” Ɓe ndo'i mo, ƴiiƴam maako wicci haa mahol e dow pucci, Yeehu yaaɓi mo.

³⁴Nden Yeehu nasti suudu, o nyaami, o yari. Ɓaawo maajum o wi'i: “Cuklane debbo naalaaɗo oo, uwe mo, ngam o ɓii laamiiɗo.”

³⁵Ɓe njehi ngam uwugo mo. Ammaa sey gumbal hoore maako e kosɗe e newe maako tan ɓe tawi.

³⁶Ɓe lorti, ɓe ngecci mo ɗum. O wi'i: “Kanjum woni wolde nde Jawmiraawo wi'i bee hunnduko annabi Eliya Tisbeejo: Haa ngesa Yisre'el dawaaɗi nyaamata kusel Izabel.

³⁷Nyawmande Izabel laatoto bana koonal haa ngesa Yisre'el. Goɗɗo waawataa wi'ugo: Ɗum Izabel.”