Read Fulfulde 1 Habaruuji Nyalaaɗe 10 Bible Online

1 Habaruuji Nyalaaɗe 10 - Fulfulde bible

1 Habaruuji Nyalaaɗe 10

¹Nyannde feere, Filisti'en kaɓi bee Isra'iila'en haa hooseere Gilbo'a. Isra'iila'en ɗuuɗɓe mbaraama ton, luttuɓe boo ndoggi.

²Filisti'en taasni Sawulu e ɓiɓɓe mum. Ɓe mbari Yonatan e Abinadabu e Malkisu'a, ɓiɓɓe Sawulu.

³Haɓre saati dow Sawulu. Nde fiɗooɓe kuri keɓti mo, o hultori.

⁴Sawulu wi'i doondoowo balmi mum: “Los kaafahi ma, yuwam, ngam taa saadooni'en ɓe'e ngara, pijirammi.” Ammaa doondoowo balmi maako sali, ngam o huli masin. Ngam maajum Sawulu hoo'i kaafahi mum, do'i dow maaki.

⁵Nde doondoowo balmi yi'i Sawulu maayi, kaŋko boo o losi kaafahi maako, o do'i dow maaki, o maayi.

⁶Bana nii Sawulu e ɓiɓɓe mum tato e yimɓe saare mum fuu maaydi.

⁷Nde Isra'iila'en wonɓe nder waadiwol fuu ngi'i jama'aare konu Isra'iila doggi, Sawulu e ɓiɓɓe mum boo maayi, ɓe acci berniiji maɓɓe, ɓe ndoggi kamɓe boo. Filisti'en ngari, njooɗi ton.

⁸Jaŋngo maajum Filisti'en ngari ngam ɓoftugo kuuje mbaraaɓe. Ɓe tawi Sawulu e ɓiɓɓe mum ɗon mbaali dow hooseere Gilbo'a.

⁹Ɓe ɓofti kuuje Sawulu, ɓe ta'i hoore maako, ɓe kooci balmi maako. Nden ɓe neli koo toy nder lesdi Filisti'en ngam yahrugo habaru jaalorgal man yeeso labbi maɓɓe e haa yimɓe fuu.

¹⁰Ɓe ndesi balmi Sawulu nder suudu labbi maɓɓe, ɓe tiggi gumbal hoore maako haa suudu lawru maɓɓe Daagon.

¹¹Yimɓe Yaabes nder lesdi Gile'at fuu nani ko Filisti'en mbaɗi Sawulu fuu.

¹²Worɓe maɓɓe semmbiɗɓe fuu njehi, koo'i ɓanndu Sawulu e ɓalli ɓiɓɓe muuɗum, ɓe koori ɗi haa Yaabes. Nden ɓe uwi i'e maɓɓe les lekki makki haa Yaabes, ɓe cuumi nyalɗe joweeɗiɗi.

¹³Bana nii Sawulu maayi ngam o yewi umroore Jawmiraawo, ngam o hakkilanaay wolde Jawmiraawo, o yehi o ƴami carwoowo maayɓe boo,

¹⁴o ƴamaay Jawmiraawo. Ngam maajum Jawmiraawo halki mo, hokki Daawuda ɓii Yessa laamu.