Read Fulfulde 1 Habaruuji Nyalaaɗe 13 Bible Online

1 Habaruuji Nyalaaɗe 13 - Fulfulde bible

1 Habaruuji Nyalaaɗe 13

¹Daawuda sarwotiri bee ardiiɓe dow honooɓe ujineere e ardiiɓe dow honooɓe teemerre, waato ardiiɓe fuu.

²Nden o wi'i jama'aare Isra'iila fuu: “To ɗum fottani on, to Allah Jawmiraawo meeɗen boo yerdake, nden kam en nelda habaru haa banndiraaɓe meeɗen woɗɓe nder lesɗe Isra'iila fuu, haa liman'en e Lewi'en nder berniiji maɓɓe e durduɗe maɓɓe, ngam haa ɓe ngara ɓe kawta bee meeɗen.

³Sey en ngartira sundukru Allah meeɗen haa ɗo, ngam nder balɗe Sawulu en teftaayno ndu.”

⁴Jama'aare fuu yerdi waɗugo bana non, ngam haala man fottani ummaatoore fuu.

⁵Daawuda mooɓti yimɓe Isra'iila fuu diga maayo Sihor nder Misra haa yotti nastirde Hamat, ngam haa ɓe njaha hoo'oygo sundukru Allah haa Kiriyat-Ye'arim.

⁶Daawuda e Isra'iila fuu njehi haa Ba'ala, waato Kiriyat-Ye'arim, nder lesdi Yahuuda, ngam haa ɓe koo'oya sundukru Allah wi'eteendu fodde innde Jawmiraawo jooɗiiɗo haa dow keruba'en.

⁷Ɓe njo'ini sundukru Allah dow moota ga'i kesa, ɓe ngurtini ndu saare Abinadabu. Uzza e Ahiyo ɗon ɗowa moota man.

⁸Daawuda e Isra'iila fuu ɗon mbelmbelta yeeso Allah, ɓe ɗon ngima, ɓe ɗon piya moolooji e garayaaji e bawɗi e koŋsiije e algaytaaji bee semmbe maɓɓe fuu.

⁹Nde ɓe njotti laarre[15] Kidon, Uzza forti juŋngo mum, naŋngi sundukru, ngam ga'i mosti.

¹⁰Ammaa Jawmiraawo tikkani Uzza, fiyi mo, ngam o meemi sundukru. Ɗon nii o maayi.

¹¹Ɓernde Daawuda metti ngam tikkere Jawmiraawo ukki dow Uzza. O inndi nokkuure nde'e Peres-Uzza, kanjum laati innde maare haa wargo hannde.

¹²Nyalaade man Daawuda huli Jawmiraawo. O ƴami: “Noy njahranmi sundukru Allah haa am?”

¹³Ngam man o yahraay ndu haa berniwol maako, waato Berniwol Daawuda. O selni ndu haa saare Obet-Edoom, goɗɗo Gaat.

¹⁴Sundukru Allah faɓɓi lebbi tati nder saare Obet-Edoom bee yimɓe mum. Jawmiraawo barkiɗini saare Obet-Edoom e ko o mari fuu.