Read Fulfulde 1 Habaruuji Nyalaaɗe 18 Bible Online

1 Habaruuji Nyalaaɗe 18 - Fulfulde bible

1 Habaruuji Nyalaaɗe 18

¹Ɓaawo kuuje ɗe'e, Daawuda jaali Filisti'en, leestini ɓe. O nyaami Gaat berniwol maɓɓe e gure maagol fuu.

²Nden o jaali Mo'abi'en. Ɓe laatani mo maccuɓe, o yowani ɓe jomorgol.

³Nden o jaali boo Hadad'ezer, laamiiɗo Soba, haa Hamat. Laamiiɗo oo yahno semmbiɗingo laamu maako haa maayo Efratis.

⁴Daawuda hooci haa maako mootaaji pucci ujineere (1.000) e wa'iiɓe ujine njoweeɗiɗo (7.000) e honooɓe ujine noogas (20.000). Daawuda soppi korle pucci mootaaji fuu, o acci teemerre ngam hoore maako.

⁵Siriya'en ngari diga Damas ngam haa ɓe mballa Hadad'ezer, laamiiɗo Soba, ammaa Daawuda mbari nder maɓɓe worɓe ujine noogas e ɗiɗo (22.000).

⁶Daawuda jo'ini saŋngeere aynooɓe nder lesdi maɓɓe, ɓe laatani mo maccuɓe, o yowani ɓe jomorgol. Jawmiraawo hisni Daawuda koo toy o yehi fuu.

⁷Daawuda hooci bawarɗe kaŋŋeeri ɗe sukaaɓe Hadad'ezer marno, o yahri ɗe haa Urusaliima.

⁸Haa Tibihat e Kuun, berniiji Hadad'ezer, Daawuda hooci njamndi mboɗeeri ɗuuɗndi masin. Bee maari Suleymaanu waari loonde njamndi mboɗeeri mawnde e daŋraŋge e kuuje njamndi mboɗeeri.

⁹Nde To'i, laamiiɗo Hamat nani Daawuda jaali jama'aare konu Hadad'ezer, laamiiɗo Soba fuu,

¹⁰o neli ɓiyiiko Hadoram haa laamiiɗo Daawuda haa o ƴama ɗum njamu muuɗum, o waɗana mo barka ngam o haɓi bee Hadad'ezer, o jaali mo, ngam haɓre ɗonno hakkunde Hadad'ezer e To'i foroy. O neldi Daawuda kuuje kaŋŋeeri e cardi e njamndi mboɗeeri feere feere.

¹¹Kanje boo, laamiiɗo Daawuda seni ɗe ngam Jawmiraawo, hawtaade bee cardi e kaŋŋeeri ndi o hoocino haa ummaatooje Edoomi'en e Mo'abi'en e Ammooni'en e Filisti'en e Amaleki'en.

¹²Abisay ɓii Seruyatu jaali Edoomi'en ujine sappo e njoweetato (18.000) nder Waadiwol Mannda.

¹³O jo'ini caŋngeeje aynooɓe nder lesdi Edoom, Edoomi'en fuu laati maccuɓe Daawuda. Jawmiraawo hisni Daawuda koo toy o yehi.

¹⁴Daawuda laamani Isra'iila fuu. O ɗon waɗana yimɓe maako fuu kiita ndarnuka e ngooŋɗuka.

¹⁵Yo'ab ɓii Seruyatu woni mawɗo honooɓe, Yusafat ɓii Ahiluudi woni hunndukoojo laamiiɗo,

¹⁶Cadok ɓii Ahitooba e Abimelek ɓii Abiyatar ngoni liman'en, Sawusa woni binndoowo

¹⁷e Benaya ɓii Yoyada woni hooreejo Kereti'en e Peleti'en. Ɓiɓɓe Daawuda laati ardiiɓe ɓurɓe ɓadaago mo.