Read Fulfulde 1 Habaruuji Nyalaaɗe 19 Bible Online

1 Habaruuji Nyalaaɗe 19 - Fulfulde bible

1 Habaruuji Nyalaaɗe 19

¹Ɓaawo man, Nahas, laamiiɗo Ammooni'en maayi. Ɓiyiiko laami haa pellel maako.

²Daawuda wi'i: “Mi waɗanan Hanun ɓii Nahas mbooɗeeŋga, bana baaba maako waɗani yam.” Daawuda neli nelaaɓe haa ɓe nde'itina mo dow maayde baaba maako. Nde nelaaɓe Daawuda njotti lesdi Ammooni'en haa Hanun ngam de'itingo mo,

³mawɓe Ammooni'en mbi'i Hanun: “A numi Daawuda neli de'itinooɓe haa maaɗa ngam siŋkango ma daliila maayde baaba ma na? Naa ɓe ngari haa maaɗa ngam wiɗitaago e horugo e hippaago lesdi ndi'i?”

⁴Hanun umri ɓe naŋnga nelaaɓe Daawuda go. Ɓe naŋngi ɓe, ɓe laɓi ɓe e ɓe ta'i reeta limce maɓɓe, haa yotti pooɓe. Nden o firliti ɓe.

⁵Worɓe ɓe'e cemti masin haa ɓe ngiɗaa hootugo. Woɗɓe njehi anndini Daawuda haala man. O neli haa maɓɓe, o wi'i ɓe: “Paɓɓe haa Yeriko, haa bakkuɗe mon puɗa fahin, nden ngarton.”

⁶Nde Ammooni'en annditi ɓe toonyake Daawuda, Hanun e Ammooni'en neldi cardi baakin kilo ujine cappanɗe tati (30.000), ngam yoɓugo haya mootaaji pucci e wa'iiɓe ɗi diga Mesopotamiya e Siriya-Ma'aka e Soba.

⁷Ɓe njoɓi haya ngam mootaaji ujine cappanɗe tati e ɗiɗi (32.000). Ɓe njoɓi boo laamiiɗo Ma'aka e yimɓe muuɗum. Ɓe fuu ɓe ngari, ɓe caŋngini yeeso Medeba. Ammooni'en boo ngari diga gure muuɗum'en, mooɓti ngam haɓre.

⁸Nde Daawuda nani ɗum, o neli Yo'ab, mawɗo ardiiɓe sooje'en, bee honooɓe suusɓe fuu.

⁹Ammooni'en ngurti berniwol muuɗum'en, ndarni caffuuji yeeso nastirde maagol. Ammaa laamiiɓe warɓe ton ɗon ndari haa ladde feere muuɗum'en.

¹⁰Nde Yo'ab yi'i konne'en taarake ɗum yeeso e ɓaawo fuu, o suɓi woɗɓe nder suɓaaɓe Isra'iila, o darni ɓe dow Siriya'en.

¹¹Yimɓe luttuɓe fuu, o halfini ɓe haa juŋngo Abisay deerɗiiko. Kaŋko o huucitini ɓe dow Ammooni'en.

¹²Yo'ab wi'i Abisay: “To Siriya'en calorake yam, mballa mi. An boo to o Ammooni'en calorake ma, mi wallete.

¹³Semmbiɗiɗ, en tiiɗa ngam daliila yimɓe meeɗen e ngam berniiji Allah meeɗen. Jawmiraawo boo waɗan ko fottanta mo.”

¹⁴Nden Yo'ab e wonduɓe bee muuɗum njehi haɓoygo bee Siriya'en. Siriya'en ndoggi yeeso maako.

¹⁵Nde Ammooni'en ngi'i Siriya'en ndoggi, ɓe ndoggi kamɓe boo diga yeeso Abisay, deerɗiraawo Yo'ab, ɓe lori nder berniwol. Yo'ab boo hooti Urusaliima.

¹⁶Nde Siriya'en ngi'i Isra'iila'en njaali ɓe, ɓe neli ngam ewnaago Siriya'en wonɓe haa gaɗa maayo Efratis. Sofak, mawɗo honooɓe Hadad'ezer ardi ɓe.

¹⁷Nde Daawuda nani ɗum, o mooɓti Isra'iila'en fuu. O eeri Urdun, o yotti haa maɓɓe, o taaskani haɓre. Daawuda darni caffuuji muuɗum, tiitotiri bee Siriya'en, nden ɓe kaɓi bee maako.

¹⁸Isra'iila'en njaali Siriya'en, ɓe ndoggi yeeso maɓɓe. Daawuda e yimɓe mum kalki wa'iiɓe mootaaji pucci ujine njoweeɗiɗo (7.000) e honooɓe ujine cappanɗe nayo (40.000). O mbari boo Sofak, mawɗo ardiiɗo honooɓe.

¹⁹Nde ɗowtaniiɓe Hadad'ezer ngi'i Isra'iila'en njaali ɓe, ɓe culhotiri bee Daawuda, ɓe kuuwani ɗum. Ɓaawoɗon Siriya'en cali wallugo Ammooni'en.