Read Fulfulde 1 Habaruuji Nyalaaɗe 21 Bible Online

1 Habaruuji Nyalaaɗe 21 - Fulfulde bible

1 Habaruuji Nyalaaɗe 21

¹Sayɗaanu ummani Isra'iila, esti Daawuda haa o lima yimɓe Isra'iila.

²Daawuda wi'i Yo'ab e mawɓe yimɓe: “Njehe, lime Isra'iila'en diga Biirsaba haa yotti Dan. Nden anndineeɗam limgal maɓɓe.”

³Ammaa Yo'ab wi'i: “Jawmiraawo ɓesda limgal yimɓe muuɗum haa waɗa cowi teemerre! Barkaama, naa ɓe fuu ɓe jaggiiɓe ma na? Ngam ɗume ngiɗɗaa limugo ɓe? Koni a yahrata aybe dow Isra'iila?”

⁴Bee non fuu laamiiɗo dooli Yo'ab. Yo'ab dilli, waanci nder lesdi Isra'iila fuu, nden o warti Urusaliima.

⁵O anndini Daawuda limgal limaaɓe: Limgal waawɓe konu waɗi miliyoŋ e ujine teemerre (1.100.000), nder Yahuuda boo waawɓe konu ujine teemeɗɗe nayo e cappanɗe njoweeɗiɗo (470.000).

⁶Ammaa Yo'ab limaay yimɓe Lewi e Benyamin, ngam o laari umroore laamiiɗo nde'e bana huunde nyiddunde.

⁷Haala ka'a fottanaay Allah, ngam man o hiiti Isra'iila.

⁸Daawuda wi'i Allah: “Mi waɗi hakke masin bee kuugal ngal. Ammaa jonta, yaafa aybe maccuɗo ma, ngam mi waɗi faataare mawnde.”

⁹Jawmiraawo wolwani Gada, gi'anoowo Daawuda, wi'i:

¹⁰“Yah haa Daawuda, wi' mo: Ndaa nii Jawmiraawo wi'i: Mi ɗon wallinane kuuje tati. Suɓan hoore ma woore nder maaje haa mi waɗe nde.”

¹¹Gada wari haa Daawuda, wi'i mo: “Ndaa nii Jawmiraawo wi'i: Sey a suɓa!

¹²Ɗume ngiɗɗaa? Duuɓi tati ɗi weelo na? Malla doggugo yeeso konne'en maaɗa lebbi tati, saa'i ɓe ɗon mbara on bee kaafahi na? Malla nyalɗe tati ɗe kaafahi Jawmiraawo e nyawu kalluŋgu ndaaɓoowu ngarata dow lesdi, haa malaa'ikaajo Jawmiraawo halka yimɓe nder keeri Isra'iila fuu na? Num jonta, anndinam jaawaabu haa mi yahrana Jawmiraawo nelɗo yam.”

¹³Daawuda jaabi Gada: “Huunde nde'e ɓillanake yam masin. Sey mi yana nder juŋngo Jawmiraawo, ngam enɗam maako ɗuuɗi. Ammaa taa mi yana haa juuɗe yimɓe.”

¹⁴Jawmiraawo neldi nyawu kalluŋgu ndaaɓoowu nder Isra'iila. Ujine cappanɗe njoweeɗiɗo (70.000) nder Isra'iila'en maayi.

¹⁵Nden o neli malaa'ikaajo haa berniwol Urusaliima ngam halkugo ngol. Nde malaa'ikaajo ɗon halka yimɓe, Jawmiraawo yi'i ɗum. O faasiti waɗugo sarru, o wi'i malaa'ikaajo go: “He'i! Ittu juŋngo ma jonta.” Malaa'ikaajo Jawmiraawo ɗonno dari haa laarre Ornan Yebusiijo.

¹⁶Nde Daawuda tijji, o yi'i malaa'ikaajo Jawmiraawo ɗon dari hakkunde asama bee lesdi, ɗon forta dow Urusaliima kaafahi muuɗum ki o losno. Daawuda e ndotti'en kippi geese muuɗum'en, ɓe ɗon ɓorni limce buhuuje[18].

¹⁷Daawuda wi'i Allah: “Min umri limugo yimɓe. Min waɗi hakke, mi waɗi kalluɗum masin. Ammaa ummaatoore am nde'e, ɗume nde waɗi? Yaa Allah Jawmiraawo am, sey kiita ma wara dow am e dow saare baaba am. Taa halku ummaatoore ma bee masiibo man!”

¹⁸Malaa'ikaajo Jawmiraawo wi'i Gada: “Yeccu Daawuda o yaha, o darnana Jawmiraawo hirsirde haa laarre Ornan Yebusiijo.”

¹⁹Daawuda waɗi ko Gada wolwino bee innde Jawmiraawo.

²⁰Saa'i man Ornan bee ɓikkoy muuɗum nayoy ɗon piya alkamaari. Nde o yeesiti, o yi'i malaa'ikaajo, ɓiɓɓe maako ndoggi, nyukki.

²¹Nde Ornan yi'i Daawuda wari, o wurti laarre, o tuggi koppi, o hippi yeeso Daawuda.

²²Daawuda wi'i mo: “Soorram nokkuure laarre ma deydey ceede saman maare ngam haa mi darnana Jawmiraawo hirsirde ton, haa masiibo timma caka ummaatoore nde'e.”

²³Ornan jaabi Daawuda: “Hoo'u nde, barkaama, waɗ ko ngiɗɗa. Ndaa mi hokkan ga'i ngam guleteeɗi e leɗɗe fiyugo alkamaari ngam yiite e alkamaari ngam dokkal nyaamdu, mi hokkan ɗum fuu.”

²⁴Ammaa laamiiɗo wi'i Ornan: “Naa non, mi soodan nde bee ceede deydey saman maare. Mi hoo'ataa koo ɗume ko marɗa, ngam taa mi lii'ano Jawmiraawo nguleteeŋga nga walaa saman.”

²⁵O yoɓi Ornan ceede kaŋŋeeri teemeɗɗe joweego (600) ngam nokkuure man.

²⁶Nden Daawuda mahani Jawmiraawo hirsirde haa nokkuure man, o lii'i guleteeɗi e kirseteeɗi ngam kawtal yimɓe bee Allah. O ewni Jawmiraawo, Jawmiraawo jaabi mo bee yiite iwŋge haa asama, nge huɓɓi dow hirsirde guleteeɗi.

²⁷Nden Jawmiraawo wolwani malaa'ikaajo o waata kaafahi maako haa suudu maaki.

²⁸Wakkati man, nde Daawuda yi'i Jawmiraawo jaabake ɗum haa laarre Ornan Yebusiijo, o lii'i kirseteeɗi ton.

²⁹Saa'i man, jooɗorde Jawmiraawo nde Muusa waɗno nder ladde e hirsirde guleteeɗi ɗonno haa nokkuure townde haa Gibiyon.

³⁰Daawuda waawaay yahugo ton yeeso Allah ngam ƴamugo muuyo maako, ngam kaafahi malaa'ikaajo Jawmiraawo hulni mo.