Read Fulfulde 1 Habaruuji Nyalaaɗe 22 Bible Online

1 Habaruuji Nyalaaɗe 22 - Fulfulde bible

1 Habaruuji Nyalaaɗe 22

¹Daawuda wi'i: “Haa ɗo haykaliiru Allah Jawmiraawo e hirsirde ngam guleteeɗi Isra'iila ndaroto.”

²Daawuda umri mooɓtugo jananɓe wonɓe nder lesdi Isra'iila. O darni sehooɓe kaa'e, ɓe ceha kaa'e ngam nyiɓugo haykaliiru Allah.

³Daawuda taaskitini boo njamndi ɓaleeri ɗuuɗndi ngam suufuuje haa pareeje dammuɗe e ngam jokke e njamndi mboɗeeri ɗuuɗndi masin.

⁴Non boo leɗɗe cemmbiɗɗe ɗe limataake, ngam yimɓe Sidon e Tirus ngaddani Daawuda leɗɗe cemmbiɗɗe ɗuuɗɗe masin.

⁵Daawuda wi'i: “Ɓiyam Suleymaanu o derkeejo mo walaa kirseeku tawon. Ammaa haykaliiru ndu o nyiɓanta Jawmiraawo, sey ndu laato mawndu masin, ndu waŋgina daraja e maŋngu yeeso lesɗe fuu. Ngam maajum taaskitinanmi kuuje fuu ngam maako.” Bana non Daawuda taaskitini kuuje ɗuuɗɗe masin, hiddeko o maaya.

⁶Nden o ewni ɓiyiiko Suleymaanu. O umri mo nyiɓango Jawmiraawo Allah Isra'iila haykaliiru.

⁷Daawuda wi'i mo: “Ɓiŋngel am, min mi anniyino nder ɓernde am mi nyiɓa haykaliiru ngam innde Jawmiraawo Allah am.

⁸Ammaa Jawmiraawo neldi yam koŋngol, wi'i: An a rufi ƴiiƴam ɗuuɗɗam yeeso am, a waɗi konuuji mawɗi. A nyiɓantaa innde am suudu, ngam a rufi ƴiiƴam ɗuuɗɗam haa lesdi.

⁹Ndaa, a danyan ɓiɗɗo gorko. O tabitinan salaaman, ngam mi hisnan mo diga konne'en taariiɓe mo fuu. Innde maako laatoto Suleymaanu[19], nder balɗe maako ndokkanmi Isra'iila de'ere e salaaman.

¹⁰Kaŋko nyiɓanta innde am suudu, o laatoto ɓiɗɗo am, min boo mi laatoto baaba maako. Mi tabitinan leeso laamu maako dow Isra'iila haa foroy.

¹¹Jonta kam, ɓiŋngel am, Jawmiraawo wonda bee ma ngam haa kumta, nyiɓana Jawmiraawo Allah maaɗa haykaliiru, bana o wi'no dow maaɗa.

¹²Jawmiraawo hokke faamu e hikma, o darne dow Isra'iila, ngam haa a ɗowtano tawreeta maako.

¹³To a ɗowtanake farillaaji e kiitaaji ɗi Jawmiraawo umri Muusa ngam Isra'iila, nden kam a humtan. Semmbiɗiɗ, suusɗin ɓernde ma, taa hul, taa tampu sam!

¹⁴Mi haɓdi taaskitingo kuuje ngam haykaliiru Jawmiraawo, kaŋŋeeri kilo miliyoŋje tati (3.000.000) e cardi kilo miliyoŋje cappanɗe tati (30.000.000), njamndi mboɗeeri e njamndi ɓaleeri boo ɗuuɗndi masin, awnataake. Mi taaskitini boo leɗɗe e kaa'e, an boo a tammi ɓesdugo dow maaje.

¹⁵A woodi huuwooɓe ɗuuɗɓe, sehooɓe kaa'e e mahooɓe e sehooɓe leɗɗe e annduɓe kuuɗe feere feere fuu.

¹⁶Kaŋŋeeri e cardi e njamndi mboɗeeri e njamndi ɓaleeri limataake. Fuɗɗu kuugal, Jawmiraawo boo wondan bee ma.”

¹⁷Nden Daawuda umri mawɓe Isra'iila fuu ɓe mballa ɓiyum Suleymaanu.

¹⁸O wi'i: “Jawmiraawo, Allah mooɗon wondaay bee mooɗon na? O hokkaay on salaaman haa bakeeje fuu na? O hokki yam yimɓe lesdi ndi'i haa juŋngo am, lesdi fuu leestinaama yeeso Jawmiraawo e yeeso ummaatoore muuɗum.

¹⁹Jonta kam, tiiɗe nder anniya mon haa on ɗakkotira bee Jawmiraawo, Allah mooɗon. Puɗɗe nyiɓugo haykaliiru seniindu ngam Allah Jawmiraawo, haa on njo'ina sundukru alkawal Jawmiraawo e kuuje cenaaɗe ngam Allah nder suudu ndu nyiɓanton innde maako.”