Read Fulfulde 1 Habaruuji Nyalaaɗe 23 Bible Online

1 Habaruuji Nyalaaɗe 23 - Fulfulde bible

1 Habaruuji Nyalaaɗe 23

¹Nde Daawuda ndottidi, haari balɗe, o laamini ɓiyiiko Suleymaanu dow Isra'iila.

²O mooɓti mawɓe Isra'iila e liman'en e Lewi'en fuu.

³Ɓe limi Lewi'en, mo duuɓi cappanɗe tati e ko ɓuri. Limgal maɓɓe, gooto gooto fuu, worɓe ujine cappanɗe tato e njoweetato (38.000).

⁴Daawuda wi'i: “Ujine noogas e nayo (24.000) nder maɓɓe laato hakkilanooɓe kuugal haa suudu Jawmiraawo. Ujine njoweego (6.000) boo, laato saraaki'en e hiitooɓe.

⁵Ujine nayo (4.000) laato aynooɓe dammuɗe. Ujine nayo (4.000) fahin maŋgta Jawmiraawo bee kuuje gimruɗe ɗe mbaɗmi ngam maŋgtooje.”

⁶Daawuda senndi ɓe haa waɗa geɓe fodde ɓiɓɓe Lewi: Gersom e Kahat e Meraari.

⁷Haa yimɓe Gersom: La'adan e Sim'i.

⁸Ɓiɓɓe La'adan boo, Yehiyel woni arano, nden Zetam e Yo'el, ɓe tato.

⁹Ɓiɓɓe Sim'i boo, Selomit e Haziyel e Haran, ɓe tato. Kamɓe ngoni baaba-ci'e'en La'adan.

¹⁰Woɗɓe ɓiɓɓe Sim'i boo, Yahat e Jina e Ye'us e Beri'a, kamɓe ngoni ɓiɓɓe Sim'i, ɓe nayo.

¹¹Yahat woni arano, Ziza boo ɗiɗaɓo. Ammaa Ye'us e Beri'a ngalaa ɓiɓɓe ɗuuɗɓe, ngam maajum ɓe laati saare woore, yeɓre woore.

¹²Ɓiɓɓe Kahat ngoni: Amram e Yicehar e Heburuun e Uzziyel, ɓe nayo.

¹³Ɓiɓɓe Amram boo, Haruna e Muusa. Ammaa Haruna suɓaama ngam o sena kuuje ɓurɗe senaago, kaŋko e ɓiɓɓe maako haa foroy, ngam o wula uurle yeeso Jawmiraawo, o huuwana mo, o barkiɗina yimɓe bee innde Jawmiraawo haa foroy.

¹⁴Muusa boo, goɗɗo Allah, ɓiɓɓe maako limaama nder lenyol Lewi.

¹⁵Ɓiɓɓe maako ngoni: Gersom e Eli'ezer.

¹⁶Nder ɓiɓɓe Gersom, Sebuwel woni arano.

¹⁷Nder ɓiɓɓe Eli'ezer boo, Rehabiya woni arano. Eli'ezer walaa ɓiɓɓe woɗɓe, ammaa ɓiɓɓe Rehabiya, ɓe ɗuuɗɓe masin.

¹⁸Nder ɓiɓɓe Yicehar, Selomit woni arano.

¹⁹Nder ɓiɓɓe Heburuun boo, Yeriya woni arano e Amariya ɗiɗaɓo e Yahajiyel tataɓo e Yekame'am nayaɓo.

²⁰Nder ɓiɓɓe Uzziyel boo, Mika woni arano e Yissiya boo ɗiɗaɓo.

²¹Ɓiɓɓe Meraari ngoni: Mahali e Musi. Ɓiɓɓe Mahali boo, Eli'azaaru e Kis.

²²Eli'azaaru maayi, walaa ɓiɓɓe worɓe, sey ɓiɓɓe rewɓe. Ɓiɓɓe Kis, banndiraaɓe maɓɓe ɓaŋgi ɓe.

²³Ɓiɓɓe Musi boo, Mahali e Eder e Yeremot, ɓe tato.

²⁴Kamɓe ngoni yimɓe Lewi fodde saare kaakiraaɓe maɓɓe, waato baaba-ci'e'en maɓɓe, huuwooɓe kuugal haa haykaliiru Jawmiraawo. Ɓe limaama gooto gooto maɓɓe fuu bee innde innde, mo duuɓi noogas e ko ɓuri.

²⁵Ngam Daawuda wi'no: “Allah Jawmiraawo Isra'iila hokki salaaman haa ummaatoore muuɗum. O ɗon jooɗi haa Urusaliima haa foroy.

²⁶Bana nii Lewi'en tokkataako roondaago jooɗorde Jawmiraawo e kuuje kuugal nder maare”.

²⁷Lewi'en mbinndaama nder deftere limgal diga mo duuɓi noogas e ko ɓuri, fodde bolle Daawuda ragareeje.

²⁸Ammaa ɓe kuuwan njaggu maɓɓe nder haykaliiru Jawmiraawo haa baŋnge ɓiɓɓe Haruna. Ɓe kalfitini ɓe kuugal dow babe e dow cuuɗi pamari e dow kuugal laɓɓitingo kuuje cenaaɗe fuu e dow kuugal taaskitingo kuuje dewal nder haykaliiru Allah

²⁹e ngam taaskitingo tamseeje jo'inteeɗe e kuroori ɗiggundi ngam dokke nyaamdu e tamseeje bette ɗe ufnaaka e ca'aaɗe e tamsaaɗum fuu e ngam hakkilango poondirɗe feere feere.

³⁰Ɓe taasko boo fajiri e kiikiiɗe fuu ngam yettugo e maŋgtugo Jawmiraawo,

³¹ɓe lii'o guleteeɗi fuu nder nyalɗe ciwtorɗe e juulɗe lewru hesru e juulɗe goɗɗe, yeeso Jawmiraawo tum fodde limgal ngal Jawmiraawo umri ɓe.

³²Ɓe ɗon kuuwa haa laymaaru fottirde e haykaliiru seniindu, ɓe kuuwana boo banndiraaɓe maɓɓe, ɓiɓɓe Haruna, kuugal nder haykaliiru Jawmiraawo.