Read Fulfulde 1 Habaruuji Nyalaaɗe 26 Bible Online

1 Habaruuji Nyalaaɗe 26 - Fulfulde bible

1 Habaruuji Nyalaaɗe 26

¹Ndaa geɓe aynooɓe dammuɗe: Haa Koora'en, Meselemiya ɓii Koore nder ɓiɓɓe Asaf.

²Meselemiya boo woodi ɓiɓɓe ɓe'e: Zekariya woni afo, Yedi'ayel ɗiɗaɓo, Zebadiya tataɓo, Yatniyel nayaɓo,

³Elam njowaɓo, Yehohanan njoweegoojo e Eliyo'enay njoweeɗiɗaɓo.

⁴Obet-Edoom woodi ɓiɓɓe ɓe'e: Sema'ya woni afo, Yozabat ɗiɗaɓo, Yowaha tataɓo, Sakar nayaɓo, Netaneyel njowaɓo,

⁵Ammiyel njoweegoojo, Issakar njoweeɗiɗaɓo e Pe'ulletay njoweetataɓo, ngam Allah barkiɗini mo.

⁶Ɓiyiiko Sema'ya kaŋko boo o woodi ɓiɓɓe, marɓe baawɗe nder saare baaba muuɗum'en, ngam ɓe ngoodi daraja.

⁷Ɓiɓɓe Sema'ya ngoni: Otni e Refayel e Obet e Elzabat. Deerɗiraaɓe maako Elihu e Semakiya, ɓe marɓe daraja.

⁸Worɓe danygol Obet-Edoom fuu, kamɓe bee ɓiɓɓe maɓɓe e deerɗiraaɓe maɓɓe, ɓe marɓe daraja, waawɓe kuugal, cappanɗe njoweego e ɗiɗo.

⁹Meselemiya boo woodi ɓiɓɓe e deerɗiraaɓe, marɓe daraja sappo e njoweetato.

¹⁰Hosa mo danygol Meraari boo woodi ɓiɓɓe: Simiri woni arano, baaba maako darni mo o arano, koo nde o laataaki afo,

¹¹nden Hilkiyya ɗiɗaɓo, Tebaliya tataɓo e Zekariya nayaɓo. Limgal ɓiɓɓe e deerɗiraaɓe Hosa fuu, sappo e tato.

¹²Geɓe ardiiɓe aynooɓe dammuɗe ɓe'e kuuwi bana banndiraaɓe maɓɓe nder haykaliiru Jawmiraawo.

¹³Ɓe mbaɗi kur'u dow famarɓe e mawɓe ngam dammugal koo ngale fuu fodde ci'e muuɗum'en.

¹⁴Kur'u ta'ani Selemiya dammugal fuunaaŋge. Nden ɓe mbaɗi kur'u ngam ɓiyiiko Zekariya, carwoowo hikmaajo. Kur'u ta'ani mo dammugal woyla.

¹⁵Obet-Edoom heɓi dammugal fombina, ɓiɓɓe maako boo cigorɗi.

¹⁶Suppim e Hosa keɓi dammugal hiirnaaŋge, baŋnge dammugal Salleket haa laawol ba'otooŋgol. Geɓe aynooɓe man ɗon tiitotiri.

¹⁷Nyalaade fuu woodi Lewi'en njoweego haa fuunaaŋge, nayo haa woyla, nayo haa fombina, haa cuuɗi cigorɗi boo ɗiɗo ɗiɗo.

¹⁸Haa babal heedi hiirnaaŋge woodi nayo haa laawol, ɗiɗo boo haa babal maajum.

¹⁹Ɗe'e ngoni geɓe aynooɓe dammuɗe haa danygol Koora e danygol Meraari.

²⁰Ahiya gooto nder Lewi'en halfitinaama kuugal aynugo ndesaaje haa haykaliiru Allah e ndesaaje kuuje cenaaɗe:

²¹Ɓiɓɓe La'adan mo danygol Gersom, baaba-ci'e'en man, ɗum Yehiyeli

²²e ɓiɓɓe mum e Zetam e Yo'el deerɗum. Ɓe kalfitinaama kuugal aynugo ndesaaje haa haykaliiru Jawmiraawo.

²³Nder yimɓe Amram e Yicehar e Heburuun e Uzziyel boo:

²⁴Sebuwel ɓii Gersom ɓii Muusa woni hooreejo aynooɓe ndesaaje.

²⁵Banndiraaɓe maako boo: Eli'azaaru danyi Rehabiya, Rehabiya danyi Esaaya, Esaaya danyi Yoram, Yoram danyi Zikiri, Zikiri danyi Selomit.

²⁶Selomit oo e deerɗiraaɓe mum ayni ndesaaje kuuje cenaaɗe, ɗe laamiiɗo Daawuda e baaba-ci'e'en e ardiiɓe dow honooɓe ujineere e ardiiɓe dow honooɓe teemerre e mawɓe honooɓe, ceni.

²⁷Ɓe ngurtinno ɗum nder keɓal konuuji ngam mo'itingo haykaliiru Jawmiraawo.

²⁸Ko Samuyila, gi'oowo e Sawulu ɓii Kis e Abineer ɓii Neer e Yo'ab ɓii Seruyatu ceni, cenaaɗum ɗum fuu, Selomit e deerɗiraaɓe mum ayni ɗum.

²⁹Kenaniya e ɓiɓɓe mum, ɓe yimɓe Yicehar, laati saraaki'en e hiitooɓe e ardaniiɓe kuuɗe laamu nder lesdi Isra'iila.

³⁰Hasabiya e deerɗum'en, ɓe yimɓe Heburuun, marɓe daraja ujineere e teemeɗɗe njoweeɗiɗo (1.700), laati aynooɓe Isra'iila gaɗa maayo Urdun wakeere hiirnaaŋge, ngam kuuɗe Jawmiraawo fuu e ngam kuuɗe laamiiɗo boo.

³¹Yeriya woni hooreejo yimɓe Heburuun. Nder nduuɓu laamu Daawuda cappanɗe nayaɓu ɓe linyi defte asli yimɓe Heburuun. Ɓe tawi caka maɓɓe, marɓe daraja haa Ya'ajer nder lesdi Gile'at.

³²Yeriya e banndiraaɓe mum, marɓe daraja, baaba-ci'e'en ujine ɗiɗo e teemeɗɗe njoweeɗiɗo (2.700). Laamiiɗo Daawuda jo'ini ɓe ɓe aynooɓe dow le'i Ruben e Gada e reeta lenyol Manassa, ngam kuuɗe Allah e kuuɗe laamiiɗo.