Read Fulfulde 2 Habaruuji Nyalaaɗe 13 Bible Online

2 Habaruuji Nyalaaɗe 13 - Fulfulde bible

2 Habaruuji Nyalaaɗe 13

¹Nder nduuɓu laamiiɗo Yerobo'am sappo e njoweetataɓu, Abiya laami haa Yahuuda.

²O laami haa Urusaliima duuɓi tati. Innde daada maako, Mikaya ɓii Uriyel mo Gibiya. Konu waɗi hakkunde Abiya bee Yerobo'am.

³Abiya fuɗɗi konu man bee honooɓe semmbiɗɓe suɓaaɓe ujine teemeɗɗe nayo (400.000). Yerobo'am darni caffuuji bee honooɓe semmbiɗɓe suɓaaɓe ujine teemeɗɗe njoweetato (800.000) ngam haɓre bee Abiya.

⁴Abiya wa'i dari haa dow yeereere hooseere Semarayim nder lesdi kooseeje Efrayim, o hoolani Yerobo'am e Isra'iila fuu, o wi'i: “Naneeɗam!

⁵On anndaa na? Jawmiraawo Allah Isra'iila hokki Daawuda e danygol mum laamu Isra'iila haa foroy, tabitini alkawal bee mannda[18].

⁶Nden Yerobo'am ɓii Nebat, kuuwanoowo Suleymaanu ɓii Daawuda, tuurtani jawmum.

⁷Meere'en woɗɓe kawti bee maako, njaali Robo'am ɓii Suleymaanu. Saa'i man, Robo'am o derkeejo mo walaa kirseeku tawon. O waawaay dartango ɓe.

⁸Jonta on ngiɗi dartango laamu Jawmiraawo, ngonŋgu haa juuɗe danygol Daawuda, on laati jama'aare mawnde, woodi caka mooɗon boo nga'oy kaŋŋeeri koy Yerobo'am waɗani on, koy laati ɗowanteeɓe mon.

⁹Na on ngudini danygol Haruna, liman'en Jawmiraawo e Lewi'en fuu? Na on cuɓani ko'e mon liman'en woɗɓe bana ummaatooje heefeerɓe na? Koo moy gadduɗo ngaari kalhaldi e jawɗi baali joweeɗiɗi ngam heɓugo limanku, on mbaɗi mo limanjo labbi naa limanjo Allah.

¹⁰Ammaa minin kam, Jawmiraawo woni Allah amin, min accaay mo. Min ngoodi liman'en ɓe danygol Haruna, kamɓe e Lewi'en ɓe ɗon kuuwana Jawmiraawo.

¹¹Fajiri e kiikiiɗe fuu, ɓe ɗon lii'ano Jawmiraawo guleteeɗi e uureteeɗum. Ɓe ɗon njo'ina tamseeje dow taabal kaŋŋeeri laaɓndi. Kiikiiɗe fuu ɓe ɗon kuɓɓa pittirlaaji dow jo'inirɗum kaŋŋeeri. Min ɗon ɗowtano farillaaji Allah Jawmiraawo amin, ammaa onon on acci mo.

¹²Allah ɗon wondi bee amin, ɗon ardo min, non boo liman'en bee luwe ngam fuufugo fuufre konu dow mooɗon. Onon yimɓe Isra'iila, taa kaɓe bee Jawmiraawo Allah kaakiraaɓe mon, ngam on njaalataako mo!”

¹³Ammaa Yerobo'am umruno honooɓe mum woɗɓe njaha haa ɓaawo Yahuudu'en, mbaaltano ɓe, jama'aare kam ɗon tiitotira bee maɓɓe.

¹⁴Yahuudu'en ngeesiti, nden ɓe paami konne'en ɗon yeeso e ɓaawo fuu. Ɓe ngookani Jawmiraawo, liman'en puufi luwe,

¹⁵honooɓe fuu puufi fuufre konu. Saa'i ɓe ɗon ngooka, Allah fiyi Yerobo'am e jama'aare Isra'iila'en fuu, haa ɓe ndoggi yeeso Abiya e Yahuudu'en, ngam Allah hokki ɓe haa juuɗe Yahuudu'en.

¹⁷Abiya e ummaatoore mum njaali ɓe jaalorgal maŋngal, mbari Isra'iila'en ujine teemeɗɗe njowo (500.000), honooɓe suɓaaɓe.

¹⁸Bana non yimɓe Isra'iila leestiraama, ammaa yimɓe Yahuuda cemmbiɗi, ngam ɓe ɓaari Jawmiraawo Allah kaakiraaɓe maɓɓe.

¹⁹Abiya taasni Yerobo'am, jaɓti mo berniiji ɗi'i: Baytila bee gure mum e Yesana bee gure mum e Efruuna bee gure mum.

²⁰Wakkati Abiya ɗon laamo, Yerobo'am heɓtaay baawɗe mum. Jawmiraawo fiyi mo, o maayi.

²¹Ammaa baawɗe Abiya ɓesdi. O te'i rewɓe sappo e nayo, o danyi ɓiɓɓe worɓe noogas e ɗiɗo e ɓiɓɓe rewɓe sappo e njoweego.

²²Luttuɗum haala Abiya, kuuɗe mum e bolle mum fuu, ɗum winndaama nder Defte ɗe Annabi Iddo winndi.

²³Abiya maayi, ɓe uwi mo nder Berniwol Daawuda. Ɓiyiiko Asa laami haa pellel maako. Saa'i Asa ɗonno laami, walaa konu nder lesdi, duuɓi sappo.