Read Fulfulde 2 Habaruuji Nyalaaɗe 14 Bible Online

2 Habaruuji Nyalaaɗe 14 - Fulfulde bible

2 Habaruuji Nyalaaɗe 14

¹Asa waɗi ko wooɗi, ko fottani Allah Jawmiraawo mum.

²O wili kirsirɗe iwɗe lesɗe jananɗe e nokkuuje towɗe, o fusi daŋraŋge labbi, o yibbini suuraaji Asera boo.

³O umri yimɓe Yahuuda ɓe ɗakkotira bee Jawmiraawo Allah kaakiraaɓe maɓɓe, ɓe ɗowtano umrooje tawreeta.

⁴Asa itti nokkuuje towɗe e gulduɗe uureteeɗum nder berniiji Yahuuda fuu. Saa'i o ɗonno laami, walaa konu nder lesdi.

⁵Walaa kaɓɗo bee maako nder duuɓi ɗi'i fuu ngam Jawmiraawo bee hoore mum waɗani mo de'ere, o naftori wakkati salaaman man, o nyiɓi berniiji cemmbiɗɗi feere feere nder lesdi Yahuuda.

⁶Asa wi'i yimɓe Yahuuda: “Sey nyiɓen berniiji ɗi'i, en cemmbiɗina ɗi, en taarna ɗi bee mahi e cuuɗi aynorɗi e dammuɗe e jamɗe palduɗe. Kuuwen ɗum saa'i en mari lesdi tawon. En ɗakkotiri bee Jawmiraawo Allah men, ngam maajum, o hokki en salaaman koo toy fuu.” Nden ɓe puɗɗi nyiɓugo, kuugal maɓɓe yehi yeeso yeeso.

⁷Asa woodi jama'aare konu, nder lenyol Yahuuda worɓe ujine teemeɗɗe tato (300.000), jogiiɓe bawarɗe mawɗe e labbe, nder lenyol Benyamin boo worɓe ujine teemeɗɗe ɗiɗo e cappanɗe njoweetato (280.000), jogiiɓe bawarɗe pamare e lagaaje, ɓe fuu ɓe honooɓe semmbiɗɓe.

⁸Zeraha Etiyopiyaajo ɗaɓɓi haɓre bee maɓɓe. O wardi bee worɓe miliyoŋ gootel (1.000.000) e mootaaji pucci teemeɗɗe tati (300). Ɓe ngari Maresa.

⁹Asa e yimɓe mum njehi ngam fottugo bee maɓɓe, mbaɗi caffuuji[19] konu nder waadiwol Cefata baŋnge Maresa.

¹⁰Asa tori Jawmiraawo Allah mum: “Yaa Jawmiraawo, to a yiɗi wallugo, a waawan wallugo koo tampuɗo koo baawɗo boo. Wallu min, yaa Jawmiraawo Allah amin, ngam min ɗon ɓaaro ma, bee innde ma min ngari haɓugo bee jama'aare ɗuuɗnde nde'e. An woni Jawmiraawo Allah amin. Walaa neɗɗo jaaloto ma!”

¹¹Jawmiraawo fiyi Etiyopiya'en, haa ɓe ndoggi yeeso Asa e Yahuudu'en.

¹²Asa e mooɓre konu mum taasni ɓe haa yotti Gerar. Etiyopiya'en ndo'i, koo gooto maɓɓe hisaay, ɓe mbirgaama yeeso Jawmiraawo e yeeso saŋngeere mum. Yahuudu'en koori keɓal ɗuuɗŋgal.

¹³Ɓe kalki berniiji taariiɗi Gerar fuu, ngam Jawmiraawo hulni jooɗiiɓe ton. Yimɓe Yahuuda njaɓti kuuje ɗuuɗɗe masin haa ton.

¹⁴Ɓe ukkani caŋngeeje waynaaɓe boo, ɓe kooci baali e geelooɗi ɗuuɗɗi. Nden ɓe lorti haa Urusaliima.