Read Fulfulde 2 Habaruuji Nyalaaɗe 15 Bible Online

2 Habaruuji Nyalaaɗe 15 - Fulfulde bible

2 Habaruuji Nyalaaɗe 15

¹Ruuhu Allah wari dow Azariya ɓii Odet.

²Kaŋko o yehi, o fotti bee Asa, o wi'i: “Naneeɗam, onon Asa e yimɓe Yahuuda e Benyamin fuu! To on ɓaditake Jawmiraawo, kaŋko o ɓadititto on. To on ngaylitake heedi maako, o waŋginanan on hoore maako. Ammaa to on acci mo, kaŋko boo o accan on.

³Duuri, Isra'iila walaano Allah gooŋɗuɗo, walaa limanjo anndinoowo ɓe, walaa tawreeta boo.

⁴Ammaa nder ɓillaare maɓɓe ɓe lorti haa Jawmiraawo, Allah Isra'iila, ɓe ngayliti heedi maako. Kaŋko boo o waŋginani ɓe hoore maako.

⁵Saa'i man, walaa salaaman sam ngam ɓillaaje ukkani jooɗiiɓe lesɗe fuu.

⁶Ummaatoore ummani ummaatoore woɗnde, berniwol bee berniwol, ngam Allah ɓilli ɓe bee sarruuji feere feere.

⁷Kadi onon jonta, cemmbiɗe, taa juuɗe mon tampa, ngam mbarjaari kuugal mon ɗon.”

⁸Nde laamiiɗo Asa nani bolle ɗe'e diga annabi Azariya ɓii Odet, o tiɗɗini ɓernde maako, o itti labbi nyidduɗi gonɗi nder lesdi Yahuuda e Benyamin fuu, non boo nder berniiji ɗi o nyaamno haa kooseeje Efrayim. O wo'itini hirsirde Jawmiraawo dariinde yeeso zawleeru haykaliiru.

⁹O mooɓti yimɓe Yahuuda e Benyamin fuu non boo yimɓe Efrayim e Manassa e Simeyon hoɗɓe caka muuɗum'en. Isra'iila'en kawtani ɓe nde ɓe ngi'i Jawmiraawo ɗon wondi bee maako.

¹⁰Ɓe mooɓi haa Urusaliima nder nduuɓu laamu Asa sappo e njowaɓu, lewru tataɓru.

¹¹Nyalaade man ɓe koo'i ga'i teemeɗɗe joweeɗiɗi (700) e baali ujine joweeɗiɗi (7.000) nder keɓal ngal ɓe keɓi haa konu, ɓe lii'ani ɗi Jawmiraawo.

¹²Nden ɓe kaɓɓi alkawal, ngam haa ɓe tokko Jawmiraawo Allah kaakiraaɓe maɓɓe bee ɓerɗe maɓɓe e yoŋkiiji maɓɓe fuu.

¹³To goɗɗo tokkaaki Jawmiraawo Allah Isra'iila, nden kam o mbareteeɗo, koo o mawɗo koo o leesɗo, koo o gorko koo o debbo boo.

¹⁴Kanjum ɓe kunani Jawmiraawo bee sawtu, bee hoolo e luwe e algaytaaji.

¹⁵Yahuudu'en fuu ceyori hunayeere nde'e, ngam ɓe kunori bee ɓernde woore. Ɓe ngayliti heedi Jawmiraawo bee anniya maɓɓe fuu, ngam o waŋginani ɓe hoore maako. O hokki ɓe salaaman koo toy fuu.

¹⁶Asa itti Ma'aka maama mum debbo boo, ngam taa o tokko huuwugo fodde baawɗe ɗe o marno. Ma'aka waɗno suura nyidduka ngam Asera[20]. Asa yibbini suura man, nami nga, wuli nga nder waadiwol Kederon.

¹⁷O ittaay nokkuuje towɗe nder Isra'iila, ammaa o yiɗi Jawmiraawo bee ɓernde woore balɗe maako fuu.

¹⁸O nastini dokke baaba maako cenaaɗe e dokke maako cenaaɗe nder haykaliiru Jawmiraawo, cardi e kaŋŋeeri e kuuje feere feere.

¹⁹Haa wargo nduuɓu laamu maako cappanɗe tati e njowaɓu, konu meetaay waɗugo.