Read Fulfulde 2 Habaruuji Nyalaaɗe 16 Bible Online

2 Habaruuji Nyalaaɗe 16 - Fulfulde bible

2 Habaruuji Nyalaaɗe 16

¹Nder nduuɓu laamu Asa cappanɗe tati e njoweego'oowu, Ba'asa, laamiiɗo Isra'iila wari haɓugo bee Yahuuda. O semmbiɗini berniwol Rama, ngam haa o haɗa yimɓe wurtaago koo nastugo haa Asa, laamiiɗo Yahuuda.

²Ngam man Asa hoo'i cardi e kaŋŋeeri haa ndesaaje haykaliiru Jawmiraawo e ndesaaje saare laamu. O neldi ɗum Benhadat, laamiiɗo Siriya haa Damas, o wi'i mo:

³“En kaɓɓa alkawal hakkunde meeɗen bana ngal baaba am e baaba ma go. Ndaa, mi neldi ma cardi e kaŋŋeeri. Fiistu alkawal ma bee Ba'asa, laamiiɗo Isra'iila, haa o hoocita honooɓe mum, o acca yam.”

⁴Benhadat jaɓi nufayeere laamiiɗo Asa, o neli hoore'en jama'aare honooɓe maako, haa ɓe ukkano berniiji Isra'iila. Ɓe njehi ɓe ukkani Iyon e Dan e Abel-Mayim e gure cigorɗe nder lesdi Neftali fuu.

⁵Nde Ba'asa nani ɗum, o acci semmbiɗingo berniwol Rama, o acci kuugal ton fuu.

⁶Ammaa laamiiɗo Asa mooɓti yimɓe Yahuuda, ɓe cottini kaa'e e leɗɗe ɗe Ba'asa ɗonno huuwtinira ngam nyiɓugo berniwol Rama fuu. Laamiiɗo Asa nyiɓi Geba e Mispa bee maaje.

⁷Saa'i man Hanani, gi'oowo wari haa Asa, laamiiɗo Yahuuda, wi'i mo: “A ɓaari laamiiɗo Siriya, a ɓaaraaki Jawmiraawo Allah ma. Ngam man jama'aare konu laamiiɗo Siriya daɗi ma.

⁸Yimɓe Etiyopiya e Libiya naane, naa ɓe jama'aare ɗuuɗnde bee mootaaji pucci ɗuuɗɗi e wa'iiɓe ɗuuɗɓe na? Ammaa Jawmiraawo yoofani ma ɓe, ngam a ɓaarino mo.

⁹Gite Jawmiraawo ɗon ngi'a ko saaloto nder duniyaaru fuu. Yiɗɓe mo bee ɓernde laaɓnde, o semmbiɗinan ɓe. Ammaa an a huuwi bana paataaɗo. Yeeso ɗo, konuuji ukkanto ma.”

¹⁰Asa tikkani gi'oowo go, haɓɓi mo nder suudu bee callallu, ngam bolle ɗe'e tikkini mo. Saa'i man Asa toonyi yimɓe woɗɓe boo.

¹¹Haala Asa diga fuɗɗoode haa timmoode, winndaama nder Deftere Laamiiɓe Yahuuda e Isra'iila.

¹²Nder nduuɓu laamu maako cappanɗe tati e njoweenayaɓu, kosɗe maako nyawi masin. Ammaa o toraaki Jawmiraawo, sey ballal hurgooɓe tan o tefi.

¹³Nder nduuɓu laamu maako cappanɗe nayi e ngo'oowu, o maayi.

¹⁴Ɓe uwi mo nder yenaande nde o wi'no ɓe ngasa nder Berniwol Daawuda. Ɓe mballini mo dow be'itte keewɗe kuuje uurɗe e uurle jillindiraaɗe fodde anndal jillooɓe uurle. Ɓe ngulani mo uureteeɗum ɗuuɗɗum.