Read Fulfulde 2 Habaruuji Nyalaaɗe 17 Bible Online

2 Habaruuji Nyalaaɗe 17 - Fulfulde bible

2 Habaruuji Nyalaaɗe 17

¹Yusafat ɓii Asa laami haa pellel baaba mum. O tabitini baawɗe maako dow Isra'iila.

²O jo'ini honooɓe nder berniiji Yahuuda cemmbiɗɗi fuu e caŋngeeje aynooɓe koo toy nder lesdi Yahuuda, non boo nder berniiji Efrayim ɗi baaba maako Asa nyaamno.

³Jawmiraawo ɗon wondi bee Yusafat, ngam o tokki laabi ɗi Daawuda, kaaka maako tokkuno ɓooyma, o tokkaaki Ba'alji.

⁴Ammaa o ɗakkotiri bee Allah mo baaba maako jaggani, o ɗowtani umrooje Allah, o tokkaaki kuuɗe Isra'iila.

⁵Ngam man Jawmiraawo tabitini laamu haa juŋngo Yusafat. Yimɓe Yahuuda fuu ngaddani mo dokke, o heɓi risku e tedduŋgal, ɗuuɗɗum masin.

⁶Ɓernde maako seyori tokkaago laabi Jawmiraawo, o itti nokkuuje towɗe e suuraaji Asera nder Yahuuda fahin.

⁷Nder nduuɓu laamu maako tataɓu, o neli saraaki'en maako Ben-Hayil e Obadiya e Zekariya e Netaneyel e Mikaya, ɓe ekkitina yimɓe nder gure Yahuuda.

⁸Hawtaade bee maɓɓe o neli Lewi'en Sema'ya e Netaniya e Sebadiya e Asa'el e Semiramot e Yonatan e Adoniya e Tobiya e Tob-Adoniya, non boo Eliisama e Yoram, liman'en.

⁹Ɓe ekkitini yimɓe Yahuuda bee deftere tawreeta Jawmiraawo, ɓe ngaanci nder gure Yahuuda ngam ekkitingo yimɓe.

¹⁰Jawmiraawo hulni laamuuji lesɗe taariiɗe Yahuuda fuu, walaa mo waɗi konu bee Yusafat.

¹¹Filisti'en woɗɓe ɗon ngaddana Yusafat dokke e cardi bana jomorgol. Arab'en boo ɗon ngaddana mo dammooji: Jawɗi baali ujine joweeɗiɗi e teemeɗɗe joweeɗiɗi (7.700) e jawɗi be'i ujine joweeɗiɗi e teemeɗɗe joweeɗiɗi (7.700).

¹²Baawɗe Yusafat ɓesdi yeeso yeeso. O nyiɓi cuuɗi mawɗi cemmbiɗɗi e gure cigorɗe nder lesdi Yahuuda.

¹³O mari sigaaji ɗuuɗɗi nder gure Yahuuda. Haa Urusaliima boo o woodi honooɓe semmbiɗɓe.

¹⁴Ndaa geɓe maɓɓe fodde ci'e maɓɓe e hoore'en dow honooɓe ujineeje: Lenyol Yahuuda: Adena mawɗo honooɓe bee honooɓe semmbiɗɓe ujine teemeɗɗe tato (300.000)

¹⁵e haa kommbi maako, Yehohanan mawɗo honooɓe bee worɓe ujine teemeɗɗe ɗiɗo e cappanɗe njoweetato (280.000)

¹⁶e haa kommbi maako boo Amasiya ɓii Zikiri, jaɓɗo jagganaago Jawmiraawo bee ngiɗa mum, kaŋko bee honooɓe semmbiɗɓe ujine teemeɗɗe ɗiɗo (200.000),

¹⁷lenyol Benyamin: Eliyada, goɗɗo konoowo cemmbiɗɗo, bee worɓe jogiiɓe lagaaje e bawarɗe ujine teemeɗɗe ɗiɗo (200.000)

¹⁸e haa kommbi maako Yozabat bee taaskaniiɓe konu ujine teemerre e cappanɗe njoweetato (180.000).

¹⁹Kamɓe ɓe njaggani laamiiɗo. Jo'inaaɓe nder berniiji cemmbiɗɗi nder Yahuuda fuu limaaka caka maɓɓe.