Read Fulfulde 2 Habaruuji Nyalaaɗe 18 Bible Online

2 Habaruuji Nyalaaɗe 18 - Fulfulde bible

2 Habaruuji Nyalaaɗe 18

¹Yusafat heɓi risku e tedduŋgal, ɗuuɗɗum masin. O esiri bee Akab laamiiɗo Isra'iila.

²Ɓaawo duuɓi seɗɗa, o yehi laarugo Akab haa Samariya. Akab hirsi baali e ga'i ɗuuɗɗi ngam Yusafat e ɗoftuɓe mo. Nden o esti Yusafat haa o yaha haɓugo bee berniwol Ramot nder lesdi Gile'at.

³Akab, laamiiɗo Isra'iila ƴami Yusafat, laamiiɗo Yahuuda: “A yahdan bee am haa Ramot nder Gile'at na?” Yusafat jaabi mo: “Min bee ma en ɗon bana goɗɗo gooto, non boo yimɓe am e yimɓe maaɗa, mi yahdan bee maaɗa.”

⁴Nden Yusafat wi'i Akab, laamiiɗo Isra'iila: “Ƴam Jawmiraawo tawon.”

⁵Laamiiɗo Isra'iila mooɓti annabi'en teemeɗɗe nayo, ƴami ɓe: “Min njaha haɓugo bee Ramot nder Gile'at na? Malla mi acca?” Ɓe njaabi: “Yah, Allah hokkete ngol.”

⁶Ammaa Yusafat ƴami: “Walaa annabiijo Jawmiraawo lutti haa o ƴamana en Jawmiraawo na?”

⁷Laamiiɗo Isra'iila jaabi mo: “Lutti gooto, Mikaya ɓii Yimla. Ammaa mi wanyi mo, ngam o waɗantaa yam annabaaku hayru, sey sarru kala nyalaade fuu.” Yusafat wi'i mo: “Taa wolwu bana non!”

⁸Laamiiɗo Isra'iila ewni saraakiijo, umri mo: “Law, waddu Mikaya ɓii Yimla.”

⁹Akab, laamiiɗo Isra'iila e Yusafat, laamiiɗo Yahuuda ɗon njooɗi haa babal kommbi nastirde dammugal Samariya, koo moy dow leeso laamu muuɗum, ɓe ɗon ɓorni limce laamu boo. Annabi'en fuu ɗon mbaɗa annabaaku yeeso maɓɓe.

¹⁰Sedekiya ɓii Kenana waɗani hoore muuɗum luwe njamndi, wi'i: “Ndaa nii Jawmiraawo wi'i: Bee luwe ɗe'e a hawata Siriya'en haa a nattina ɓe fuu.”

¹¹Annabi'en fuu mbaɗi annabaaku kal-kal. Ɓe mbi'i: “Yah haa Ramot nder Gile'at. A jaaloto, ngam Jawmiraawo hokkete ngol, barkaama.”

¹²Nelaaɗo jahɗo ngam ewnaago Mikaya wolwani mo: “Ndaa, annabi'en kawti hunnduko wooto, ɗon mbolwana laamiiɗo haala hayru. Taaska an boo ngam haa a wolwa wolde hayru bana maɓɓe.”

¹³Ammaa Mikaya wi'i: “Fakat bana Jawmiraawo o geeto, ko Allah am wi'atammi, kanjum mbolwanmi!”

¹⁴Nde o wari haa laamiiɗo, laamiiɗo ƴami mo: “Mikaya, mi yahan haɓugo bee Ramot nder Gile'at na? Malla mi acca?” Mikaya jaabi: “Njehe, on njaaloto, ɓe hokketeeɓe haa juuɗe mon.”

¹⁵Ammaa laamiiɗo wi'i mo: “Nde noy mi hunnete a yeccammi gooŋga bee innde Jawmiraawo?”

¹⁶O jaabi: “Mi yi'i yimɓe Isra'iila fuu, ɓe saŋkitiiɓe dow kooseeje bana baali ɗi ngalaa gaynaako. Jawmiraawo wi'i: Ɓe ngalaa jaagorɗo, sey koo moy maɓɓe hoota saare mum bee jam.”

¹⁷Laamiiɗo Isra'iila wi'i Yusafat: “Naa mi wi'i ma? O waɗantaa yam annabaaku hayru, sey sarru!”

¹⁸Mikaya tokki wi'ugo: “Ngam maajum nane wolde Jawmiraawo! Mi yi'i Jawmiraawo, o ɗon jooɗi dow leeso laamu maako. Jama'aare honooɓe asama fuu ɗon dari haa nyaamo maako e nano maako.

¹⁹Jawmiraawo ƴami: Moy estata Akab, laamiiɗo Isra'iila, haa o yaha, o do'o haa Ramot nder Gile'at? Oo jaabi feere, oya boo jaabi feere.

²⁰Nden ruuhuwol ɓaditi, dari yeeso Jawmiraawo, wi'i: Min mi estan mo. Jawmiraawo ƴami ngol: Bee ɗume?

²¹Ngol jaabi: Mi yahan, mi laatoto ruuhu fewre nder kunnduɗe annabi'en maako fuu. Jawmiraawo wi'i: Estu mo, a humtan. Yah, waɗ bana non!”

²²Nden Mikaya wi'i: “Jonta ɗum laatake. Jawmiraawo waɗi ruuhu fewre nder kunnduɗe annabi'en maaɗa ɓe'e. Ammaa kaŋko bee hoore maako annini sarru maaɗa.”

²³Ammaa Sedekiya ɓii Kenana ɓaditi, maari Mikaya, wi'i: “Noy Ruuhu Jawmiraawo acciri yam haa wolwane, an?”

²⁴Mikaya jaabi: “A heɓtan ɗum nyalaade nde ndoggata diga suudu haa suudu ngam haa a nyukko.”

²⁵Nden laamiiɗo Isra'iila wi'i sukaaɓe muuɗum: “Naŋnge Mikaya, njahre mo haa Amon, hooreejo berniwol e haa ɓiyam Yo'as.

²⁶Ngecce ɓe: Ndaa nii laamiiɗo wi'i: Nastine gorko oo nder suudu fursina[21], ndokke mo nyaamdu e ndiyam tan, sey to mi lorti jam.”

²⁷Mikaya wi'i: “To a warti jam, nden kam Jawmiraawo wolwaay bee hunnduko am!” Nden o ɓesdi wi'ugo: “Nane ɗum, onon yimɓe fuu!”

²⁸Akab, laamiiɗo Isra'iila e Yusafat, laamiiɗo Yahuuda njehi haɓugo bee Ramot nder Gile'at.

²⁹Laamiiɗo Isra'iila wi'i Yusafat: “Mi wayla yeeso am, nden mi nasta haɓre. Ammaa an, ɓorna limce laamu maaɗa.” Laamiiɗo Isra'iila wayli yeeso muuɗum, nden ɓe nasti haɓre.

³⁰Ammaa laamiiɗo Siriya umruno hoore'en dow mootaaji pucci mum, taa ɓe kaɓa bee koo moye, sey bee laamiiɗo Isra'iila tan.

³¹Nde hoore'en dow mootaaji pucci ngi'i Yusafat, ɓe numi kaŋko woni laamiiɗo Isra'iila. Ɓe taari mo ngam haɓugo bee maako. Ammaa Yusafat wooki, Allah Jawmiraawo walli mo, daayni ɓe.

³²Nden hoore'en mootaaji pucci annditi naa ɗum laamiiɗo Isra'iila, ɓe lori, ɓe acci mo.

³³Nder haɓre man, goɗɗo tiri lagaawal, fiɗi laamiiɗo Isra'iila bee kurol haa jokkere sulkewol bilaa anniya. Akab wi'i laanyoowo moota pucci: “Waylita, wurtinam haɓre, mi piɗaaɗo.”

³⁴Haɓre wuli masin nyannde maajum. Ɓe ndarni laamiiɗo Isra'iila nder moota pucci muuɗum, haa o tiitotira bee Siriya'en haa kiikiiɗe. Saa'i naaŋge ɗon muta, o maayi.