Read Fulfulde 2 Habaruuji Nyalaaɗe 20 Bible Online

2 Habaruuji Nyalaaɗe 20 - Fulfulde bible

2 Habaruuji Nyalaaɗe 20

¹Ɓaawo kuuje ɗe'e, Mo'abi'en e Ammooni'en e Me'uni'en taaskitini konu ngam honugo Yusafat.

²Ɓe ngari ɓe anndini laamiiɗo mooɓre ɗuuɗnde masin wurti lesdi Siriya gaɗa Weendu Mannda, ɗon wara haɓugo bee maako. Ɓe ɗon haa Hasason-Tamar, kanjum woni En-Gedi.

³Yusafat hultori, waɗi anniya toraago ballal Jawmiraawo, o umri suumaye nder lesdi Yahuuda fuu.

⁴Yimɓe Yahuuda ngari diga gure Yahuuda fuu, ɓe kawti ngam toraago ballal Jawmiraawo.

⁵Yusafat ummi nder jama'aare Yahuuda e Urusaliima haa haykaliiru Jawmiraawo, yeeso babal haykaliiru kesal.

⁶O tori: “Yaa Jawmiraawo Allah mo kaakiraaɓe amin, an woni Allah haa asamanji. An a ɗon laamano laamuuji ummaatooje fuu. A woodi semmbe e baawɗe, walaa mo he'i dartaago yeeso ma.

⁷An, yaa Allah amin, a riiwi jooɗinooɓe lesdi ndi'i yeeso yimɓe ma Isra'iila'en, a hokki ndi danygol Ibrahiima, soobaajo ma, ngol mara ndi haa foroy.

⁸Isra'iila'en njooɗi nder maari, nyiɓani ma haykaliiru seniindu ngam teddingo innde ma. Ɓe mbi'i:

⁹To masiibo, waato konu malla kiita malla nyawu kalluŋgu ndaaɓoowu malla weelo ukkanake min, nden kam min ndaroto yeeso suudu ndu'u, yeeso maaɗa boo, ngam innde ma ɗon nder maaru. Min ngookante nder ɓillaare amin haa a nana min, a hisna min.

¹⁰Nde yimɓe Isra'iila ngari diga Misra, a haɗi ɓe nastugo lesdi Mo'abi'en e Ammooni'en e jooɗiiɓe dow hooseere Se'ir. Ngam maajum ɓe taari lesdi maɓɓe, ɓe nattinaay ɓe.

¹¹Jonta kam, laar no yimɓe ɓe'e mbarjorto min ɗum: Ɓe ɗon ngara nder lesdi ndi marnuɗa min, haa ɓe ndiiwa min.

¹²Yaa Allah amin, a hiitataako ɓe na? Min tampuɓe yeeso mooɓre ɗuuɗnde ukkantoonde min nde'e. Min anndaa ko min mbaɗata. Gite amin tiiti ma.”

¹³Yimɓe Yahuuda fuu ndari yeeso Jawmiraawo bee rewɓe e ɓikkoy muuɗum'en boo.

¹⁴Caka jama'aare nde'e, Ruuhu Jawmiraawo wari dow Yahajiyel ɓii Zekariya ɓii Benaya ɓii Ye'iyel ɓii Mattaniya, Lewiijo nder danygol Asaf.

¹⁵O wi'i: “Keɗite, onon yimɓe Yahuuda e jooɗiiɓe Urusaliima, non boo an, laamiiɗo Yusafat. Nane ko Jawmiraawo wi'ata on: Taa kule, taa tampe ngam daliila mooɓre ɗuuɗnde nde'e. Haɓre nde'e, nde Jawmiraawo naa nde mooɗon!

¹⁶Jaŋngo, njippe ngam fottugo bee maɓɓe. Ɓe mba'oto Wa'orde Pinndi. On tawan ɓe haa timmoode waadiwol, baŋnge ladde Yeruwel.

¹⁷Walaa haaje on kaɓa bee ko'e mon nder haɓre nde'e. Ndare ton, munye, haa on ngi'a no Jawmiraawo hisnirta on. Onon yimɓe Yahuuda e Urusaliima, taa kule, taa tampe! Njehe jaŋngo, potte bee maɓɓe. Jawmiraawo wondan bee mooɗon.”

¹⁸Yusafat tuggi koppi, hippi yeeso mum haa lesdi. Yimɓe Yahuuda e jooɗiiɓe haa Urusaliima fuu turi ngam sujidango Jawmiraawo.

¹⁹Nden Lewi'en, nder danygol Kahat e danygol Koora, ummi, maŋgti Jawmiraawo Allah Isra'iila bee sawtu.

²⁰Jaŋngo man ɓe ndawi cub, ɓe njehi haa ladde Teko'a. Saa'i ɓe ɗon ndilla, Yusafat dari ton, wi'i ɓe: “Naneeɗam, onon yimɓe Yahuuda e jooɗiiɓe haa Urusaliima! Nuɗɗine Allah Jawmiraawo mooɗon, on tabitan, nuɗɗine annabi'en maako, on kumtan.”

²¹O sarwotiri bee yimɓe, nden o umri yimanooɓe Jawmiraawo ngam maŋgtugo tedduŋgal senaare mum, ɓe ardo honooɓe, ɓe mbi'a: “Maŋgte Jawmiraawo ngam mbooɗeeŋga mum ɗon haa abada.”

²²Nde yimooɓe puɗɗi hoolugo e yimugo maŋgtoore, Jawmiraawo waaltani Ammooni'en e Mo'abi'en e jooɗiiɓe haa hooseere Se'ir honanɓe yimɓe Yahuuda, ɓe njaalaama.

²³Ammooni'en e Mo'abi'en ukkani jooɗiiɓe haa hooseere Se'ir, nattini ɓe. Nde ɓe timmini nattingo yimɓe man, ɓe puɗɗi mbarmbartirgo.

²⁴Yimɓe Yahuuda njotti nokkuure aynirde townde gal ladde. Ɓe ngayliti heedi mooɓre konne'en go, ndaa sey maayɓe waaliiɓe haa lesdi tan, walaa mo daɗi!

²⁵Yusafat e yimɓe mum njehi ɓoftugo keɓal konu. Ɓe keɓi jawdi ɗuuɗndi e kuuje dow ɓalli maayɓe e kuuje ɗuuɗa-samanje, ɓe ɓofti ɗum haa ɗum ɓuri roondeego. Nyalɗe tati ɓe ɓofti keɓal konu, ngam ngal ɗuuɗŋgal masin.

²⁶Nyannde nayaɓre ɓe mooɓi nder Waadiwol Beraka, ɓe maŋgti Jawmiraawo ton. Ngam maajum innde waadiwol man laati Waadiwol Beraka haa wargo hannde.

²⁷Nden yimɓe Yahuuda e Urusaliima lorti, Yusafat ardi ɓe. Ɓe kooti Urusaliima bee seyo, ngam Jawmiraawo hokki ɓe seyo dow konne'en maɓɓe.

²⁸Ɓe ngari haa haykaliiru Jawmiraawo nder Urusaliima, bee hoolo moolooji e garayaaji e algaytaaji.

²⁹Laamiiɓe lesɗe fuu kultori Allah masin nde ɓe nani no Jawmiraawo haɓiri bee konne'en Isra'iila.

³⁰Ammaa laamu Yusafat heɓi de'ere, Jawmiraawo hokki mo salaaman koo toy fuu.

³¹Yusafat laamani Yahuuda. O woodino duuɓi cappanɗe tati e jowi, saa'i o laamo. O laami haa Urusaliima duuɓi noogas e jowi. Innde daada maako, Ajuba ɓii Silhi.

³²O tokki laawol baaba maako Asa, o selaay ngol. O waɗi ko fottani Jawmiraawo.

³³Ammaa o ittaay nokkuuje towɗe. Yimɓe kuucitinaay ɓerɗe muuɗum'en dow Allah kaakiraaɓe muuɗum'en tawon.

³⁴Luttuɗum haala Yusafat, diga fuɗɗoode haa timmoode, ɗum winndaama nder Habaruuji Yeehu ɓii Hanani, ɗum nasti nder Deftere Laamiiɓe Isra'iila.

³⁵Ɓaawoɗon, Yusafat, laamiiɗo Yahuuda hawtani Ahaziya, laamiiɗo Isra'iila, mo waɗi kalluɗum.

³⁶Yusafat hawti bee maako haa ɓe mbaɗa koommbooje[24] jahanɗe Tarsis. Ɓe mbaɗi ɗe haa Esiyon-Geber.

³⁷Ammaa Eli'ezer ɓii Dodawa, goɗɗo Maresa, waɗi annabaaku dow Yusafat, wi'i mo: “A hawtani Ahaziya. Ngam man Jawmiraawo halkan kuugal ma”. Koommbooje go pusi, keɓaay yahugo Tarsis.