Read Fulfulde 2 Habaruuji Nyalaaɗe 23 Bible Online

2 Habaruuji Nyalaaɗe 23 - Fulfulde bible

2 Habaruuji Nyalaaɗe 23

¹Nder nduuɓu njoweeɗiɗaɓu, Yoyada tiɗɗini ɓernde mum, haɓɓi alkawal bee ardiiɓe dow honooɓe teemerre, waato Azariya ɓii Yeroham e Isma'iilu ɓii Yehohanan e Azariya ɓii Obet e Ma'aseya ɓii Adaya e Elisafat ɓii Zikiri.

²Ɓe njehi koo toy nder lesdi Yahuuda, ɓe mooɓti Lewi'en nder gure fuu e baaba-ci'e'en Isra'iila. Ɓe ngari Urusaliima.

³Jama'aare haa haykaliiru Allah fuu haɓɓi alkawal bee laamiiɗo. Yoyada wi'i ɓe: “Ndaa ɓii laamiiɗo. Kaŋko o heɓan laamu fodde wolde Jawmiraawo dow danygol Daawuda.

⁴Ndaa ko mbaɗoton: Mbaɗe geɓe tati. Yeɓre arannde, liman'en e Lewi'en huuwooɓe nyalaade siwtorde, ayna dammuɗe.

⁵Yeɓre ɗiɗawre daro haa saare laamiiɗo. Yeɓre tataɓre daro haa Dammugal Caɓɓawal, saa'i jama'aare fuu ɗon daro haa babe haykaliiru.

⁶Walaa mo nastata haykaliiru Jawmiraawo, sey liman'en e Lewi'en huuwooɓe kuugal muuɗum'en tan, ngam kamɓe ɓe senaaɓe. Sey ummaatoore fuu ɗowtano umrooje Jawmiraawo.

⁷Lewi'en taaro laamiiɗo, koo moy bee balmi muuɗum haa juuɗe. Koo moy nastanɗo haykaliiru Jawmiraawo, mbare mo. Ɗofte laamiiɗo nde o wurtoto malla nde o nastata fuu.”

⁸Lewi'en e yimɓe Yahuuda fuu mbaɗi ko Yoyada limanjo umrino fuu. Koo moy maɓɓe hoo'i worɓe muuɗum, fuɗɗuɓe e timminɓe kuugal nyannde siwtorde fuu ngari haa Yoyada, ngam o siwtinaay koo yeɓre woore.

⁹Yoyada hokki ardiiɓe ɓe'e labbe e bawarɗe mawɗe e bawarɗe pamare gonɗe nder haykaliiru Allah ɗe laamiiɗo Daawuda marno.

¹⁰O darni ummaatoore fuu diga wakeere haykaliiru nyaamru haa wakeere haykaliiru nanndu, gal hirsirde e haykaliiru boo, ɓe taari laamiiɗo. Koo moy maɓɓe bee balmi muuɗum.

¹¹Nden ɓe ngurtini ɓii laamiiɗo, ɓe kippi mo woronnde, ɓe ndokki mo seedamku laamu. Yoyada e ɓiyum'en moyti mo bee nebbam, kooli: “Laamiiɗo yeeɗa haa foroy!”

¹²Ataliya nani hoolo ummaatoore nde ɗon dogga e maŋgta laamiiɗo.

¹³O wari haa ummaatoore nder haykaliiru Jawmiraawo. O yi'i, ndaa laamiiɗo ɗon dari haa daŋraŋgal haa nastirde haykaliiru e mawɓe e fuufooɓe algaytaaji kommbi maako. Yimɓe fuu ɗon ceyo, ɓe ɗon puufa algaytaaji, yimooɓe bee kuuje gime boo ɗon ardo gime maŋgtooje. Nden Ataliya seeki limce muuɗum, wi'i: “Tuurtol! Tuurtol!”

¹⁴Ammaa Yoyada limanjo wurtini ardiiɓe dow honooɓe teemerre, mawɓe jama'aare konu, wi'i ɓe: “Ngurtine mo, caaline mo caffuuji[26]. To goɗɗo tokkake mo, o mbareteeɗo bee kaafahi!” Ngam limanjo wi'no: “Taa mbare Ataliya nder haykaliiru Jawmiraawo.”

¹⁵Ɓe naŋngi mo, ɓe njahri mo haa saare laamu, gal nastirde Dammugal Pucci. Ton ɓe mbari mo.

¹⁶Nden Yoyada haɓɓi alkawal hakkunde hoore maako e yimɓe e laamiiɗo, ngam haa ɓe laato ummaatoore Jawmiraawo.

¹⁷Ɓaawo man, yimɓe fuu nasti suudu Ba'al, ngibbini ndu, ɓe pusi kirsirɗe maaru e suuraaji maaru. Ɓe mbari Mattan, limanjo Ba'al yeeso kirsirɗe.

¹⁸Yoyada halfini liman'en e Lewi'en kuuɗe haa haykaliiru Jawmiraawo, bana no Daawuda senndirani ɓe kuuɗe man, ɓe lii'ano Jawmiraawo guleteeɗi bana ko umra nder tawreeta Muusa, bee seyo e gimi fodde umrooje Daawuda.

¹⁹Yoyada darni aynooɓe haa dammuɗe haykaliiru Jawmiraawo, ngam taa goɗɗo coɓɗo ngam daliila koo kaye nasta ndu.

²⁰Nden o hoo'i ardiiɓe dow honooɓe teemerre e tedduɓe e ardiiɓe ummaatoore e yimɓe lesdi fuu. O yahri laamiiɗo diga haykaliiru Jawmiraawo haa saare laamu gal dammugal ɓaŋgiiŋgal. Nden ɓe njo'ini Yo'as dow leeso laamu.

²¹Yimɓe ummaatoore lesdi fuu ceyi, berniwol boo heɓi de'ere. Ataliya kam, ɓe mbari mo bee kaafahi.