Read Fulfulde 2 Habaruuji Nyalaaɗe 24 Bible Online

2 Habaruuji Nyalaaɗe 24 - Fulfulde bible

2 Habaruuji Nyalaaɗe 24

¹Yo'as woodi duuɓi joweeɗiɗi, saa'i o laamo. O laami haa Urusaliima duuɓi cappanɗe nayi. Innde daada maako, Cibiya mo Biirsaba.

²Yo'as waɗi ko fottani Jawmiraawo, saa'i Yoyada limanjo ɗon yeeɗi.

³Yoyada te'ani mo rewɓe ɗiɗo, o danyi ɓiɓɓe worɓe e rewɓe.

⁴Ɓaawo man, Yo'as hoo'i anniya wo'itingo haykaliiru Jawmiraawo.

⁵O mooɓti liman'en e Lewi'en, o wi'i ɓe: “Njehe nder gure Yahuuda, mooɓte ceede haa yimɓe Isra'iila fuu deydey haaje bo'itinki haykaliiru Allah mon hitaande hitaande. Mbaɗe ɗum bee jaawal.” Ammaa Lewi'en njaawɗaaki.

⁶Ngam maajum laamiiɗo ewni Yoyada, hooreejo maɓɓe, ƴami mo: “Koni a doolaay Lewi'en mooɓtugo jomorgol ngol Muusa, jaggiiɗo Jawmiraawo yowani jama'aare Isra'iila ngam daliila laymaaru seedamku alkawal?

⁷Ataliya, debbo kalluɗo oo e tokkiiɓe mo cumpiti haykaliiru Allah, kooci dokke haykaliiru Jawmiraawo cenaaɗe fuu, kuuwtiniri ɗe ngam dewal Ba'alji, labbi muuɗum'en.”

⁸Laamiiɗo umri ɓe mbaɗa akootiiru, ɓe njo'ina ndu haa yaasi, yeeso dammugal haykaliiru Jawmiraawo.

⁹Nden ɓe maatini nder lesdi Yahuuda e berniwol Urusaliima, yimɓe ngadda jomorgol ngol Muusa, jaggiiɗo Allah yowanino Isra'iila'en nder ladde.

¹⁰Mawɓe e yimɓe fuu ceyi, ngaddi jomorgol muuɗum'en, ngubi ngol nder akootiiru haa ndu heewi.

¹¹Koo ndeye ɓe njahri ndu haa Lewi'en haa ɓe linya ndu dow muuyo laamiiɗo, nde ɓe tawi ceede ɗuuɗi, binndoowo laamiiɗo e wakiiliijo hooreejo liman'en ngara, njuppa ndu. Nden ɓe ngartiri ndu haa nokkuure maaru. Bana non ɓe mbaɗi kala nyalaade fuu, ɓe mooɓti ceede ɗuuɗɗe.

¹²Laamiiɗo e Yoyada ndokka ceede man haa aynooɓe kuugal haa ɓe njoɓa huuwooɓe nder haykaliiru Jawmiraawo. Kamɓe ɓe njoɓi sehooɓe kaa'e e sehooɓe leɗɗe ngam wo'itingo haykaliiru Jawmiraawo, non boo tappooɓe njamndi ɓaleeri e mboɗeeri ngam semmbiɗingo ndu.

¹³Aynooɓe kuugal kuuwi bana nii, kuugal yehi yeeso yeeso bee juuɗe maɓɓe. Ɓe mbo'itini haykaliiru Jawmiraawo haa ndu laati bana ɓooyma, ɓe cemmbiɗini ndu.

¹⁴Nde kuugal maɓɓe timmi, ɓe ngaddani laamiiɗo e Yoyada ceede luttuɗe. Ɓe mbaɗi kuuje ngam haykaliiru Jawmiraawo bee ceede man, kuuwruɗe ngam dewal e guleteeɗi, non boo taasahoy e kuuje cardi e kaŋŋeeri. Balɗe Yoyada fuu ɓe tokki lii'aago guleteeɗi haa haykaliiru Jawmiraawo.

¹⁵Ammaa Yoyada naywi, safti ngeendam. Saa'i o maaya, o woodi duuɓi teemerre e cappanɗe tati.

¹⁶Ɓe uwi mo nder Berniwol Daawuda baŋnge genaale laamiiɓe, ngam o huuwani Isra'iila kuuɗe booɗɗe, non boo heedi Allah e haykaliiru mum.

¹⁷Ɓaawo maayde Yoyada, mawɓe Yahuuda ngari, cujidani laamiiɗo Yo'as, nden o nanani ɓe.

¹⁸Ɓe acci haykaliiru Jawmiraawo Allah kaakiraaɓe maɓɓe, ndewi suuraaji Asera e labbi. Ngam daliila aybewol ngo'ol, tikkere Jawmiraawo ukkani Yahuuda e Urusaliima.

¹⁹Jawmiraawo neli annabi'en caka maɓɓe, haa ɓe lortina yimɓe haa maako. Annabi'en barri ɓe, ammaa ɓe cali nanango ɓe.

²⁰Nden Ruuhu Allah wari dow Zekariya ɓii Yoyada limanjo. O dari yeeso ummaatoore, o wi'i ɓe: “Ndaa nii Allah wi'i: Koni luutoton umrooje am? Ngam maajum on keɓataa hayru ngam on ngudini yam. Min boo mi wudini on.”

²¹Yimɓe ummaatoore tuurtani Zekariya, ɓe piɗi mo bee kaa'e haa babal haykaliiru Jawmiraawo, bana laamiiɗo umri ɓe.

²²Laamiiɗo Yo'as siftoraay mbooɗeeŋga nga Yoyada, baaba Zekariya waɗanino mo. O umri mbarugo ɓiɗɗo Yoyada. Saa'i Zekariya ɗonno daande maayde, o wi'no: “Jawmiraawo laara, waato ɗum!”

²³Nde nduuɓu yaalti, jama'aare konu Siriya'en wari hippugo Yahuuda e Urusaliima, mbardi mawɓe ummaatoore fuu, neltiri keɓal konu fuu haa laamiiɗo Damas.

²⁴Siriya'en ɗuuɗaay, ammaa Jawmiraawo hokki ɓe jaalorgal dow jama'aare ɗuuɗnde masin, ngam yimɓe Yahuuda ngudini Jawmiraawo Allah kaakiraaɓe muuɗum'en. Bana nii Siriya'en laatori kiita dow Yo'as.

²⁵Nden Siriya'en lori, ɓe acci mo o naawnaaɗo masin. Saraaki'en maako tuurtani mo ngam o mbari ɓiɓɓe Yoyada limanjo. Ɓe mbari mo dow be'itte maako. Ɓe uwi mo nder Berniwol Daawuda, ammaa naa nder genaale laamiiɓe.

²⁶Ndaa tuurtanɓe mo: Zabada mo daada mum wi'ete Sime'atu Ammooniijo e Yozabat mo daada mum wi'ete Simritu Mo'abiijo.

²⁷Haala ɓiɓɓe Yo'as e annabaakuuji ɗuuɗɗi dow maako e bo'itinki haykaliiru Allah, ɗum winndaama nder Deftere Laamiiɓe. Ɓiyiiko Amasiya laami haa pellel maako.