Read Fulfulde 2 Habaruuji Nyalaaɗe 29 Bible Online

2 Habaruuji Nyalaaɗe 29 - Fulfulde bible

2 Habaruuji Nyalaaɗe 29

¹Hezekiya woodi duuɓi noogas e jowi, saa'i o laamo. O laami haa Urusaliima duuɓi noogas e joweenayi. Innde daada maako, Abiya ɓii Zekariya.

²O waɗi ko fottani Jawmiraawo, bana ko kaaka maako Daawuda waɗno fuu.

³Nder nduuɓu laamu Hezekiya aranu, lewru aranndu, o maɓɓiti dammuɗe haykaliiru Jawmiraawo, o wo'itini ɗe.

⁴O ewni liman'en e Lewi'en, o mooɓti ɓe haa babal fuunaaŋgewal.

⁵O wi'i ɓe: “Naneeɗam, onon Lewi'en! Cene ko'e mon jonta, cene boo haykaliiru Jawmiraawo Allah kaakiraaɓe mon, ngurtine kuuje coɓɗe diga suudu seniindu fuu.

⁶Ngam baabiraaɓe men ngewi umroore Allah Jawmiraawo men, ɓe mbaɗi kalluɗum yeeso maako, ɓe acci mo. Ɓe ɗoyli jooɗorde Jawmiraawo, ɓe ngaylitani nde ɓaawe maɓɓe.

⁷Ɓe maɓɓi dammuɗe zawleeru haykaliiru, ɓe acci pittirlaaji nyifo, ɓe ngulanaay Allah Isra'iila uurle, ɓe lii'anaay mo guleteeɗi haa suudu seniindu.

⁸Ngam maajum Jawmiraawo tikkani lesdi Yahuuda e Urusaliima, laatini ndi nyiddundi, kulniindi, koo moy ɗon janca ndi, bana ko ngi'oton hannde.

⁹Ngam daliila tikkere nde'e baabiraaɓe men maayri bee kaafahi, ɓikkoy men e rewɓe men ndahaama.

¹⁰Ammaa jonta mi annini haɓɓugo alkawal bee Jawmiraawo Allah Isra'iila, haa tikkere maako saatunde acca en.

¹¹Ɓikkoy am, laate on tiɗɗiniiɓe, ngam Jawmiraawo suɓi on on ndaro yeeso maako, on kuuwana mo, on ngulana mo dokke.”

¹²Lewi'en huuwooɓe ngoni: Nder danygol Kahat, Mahat ɓii Amasay e Yo'el ɓii Azariya. Nder danygol Meraari, Kis ɓii Abdi e Azariya ɓii Yehallelel. Nder danygol Gersom, Yo'ahak ɓii Zimma e Eden ɓii Yo'ahak.

¹³Nder danygol Elicafan boo, Simiri e Ye'iyel. Nder danygol Asaf, Zekariya e Mattaniya.

¹⁴Nder danygol Heman, Yehiyel e Sim'i. Nder danygol Yedutuun, Sema'ya e Uzziyel.

¹⁵Kamɓe ɓe mooɓti banndiraaɓe maɓɓe, ɓe ceni ko'e maɓɓe. Nden ɓe njehi haa haykaliiru Jawmiraawo, ngam haa ɓe laɓɓina ndu, bana laamiiɗo umruno ɓe fodde wolde Jawmiraawo.

¹⁶Liman'en boo nasti ndu, laɓɓini ndu. Ko soɓi nder haykaliiru Jawmiraawo fuu, ɓe ngurtini ɗum haa daldal maaru. Lewi'en ɓofti ɗum, njahri ɗum yaasi haa Waadiwol Kederon.

¹⁷Nder lewru aranndu, nyannde go'oore ɓe puɗɗi cenki haykaliiru. Nyannde joweetataɓre ɓe keɓi nastugo zawleeru haykaliiru Jawmiraawo. Nden ɓe ceni haykaliiru nyalɗe joweetati. Nyannde sappo e joweego'oore kuugal maɓɓe timmi.

¹⁸Ɓe nasti saare laamiiɗo, ɓe mbi'i mo: “Min laɓɓini haykaliiru Jawmiraawo fuu, non boo hirsirde guleteeɗi bee kuuwruɗe maare fuu e taabal tamseeje jo'inteeɗe bee kuuwruɗe maare fuu.

¹⁹Kuuje ɗe laamiiɗo Akas soɓnino wakkati laamu mum fuu nde o yewno umroore Allah, min taaskitini ɗe, min ceni ɗe. Ɗe ɗon ndari yeeso hirsirde Jawmiraawo.”

²⁰Jaŋngo man, laamiiɗo Hezekiya dawi cub, mooɓti mawɓe berniwol, yehi haa haykaliiru Jawmiraawo.

²¹Ɓe ngaddi ga'i kalhali joweeɗiɗi e jawɗi baali joweeɗiɗi e njawkoy njoweeɗiɗoy e jawɗi be'i joweeɗiɗi kirseteeɗi ngam ittuki hakkeeji nder laamu e suudu seniindu e Yahuuda fuu. Hezekiya umri liman'en danygol Haruna lii'ano ɗi Jawmiraawo dow hirsirde.

²²Ɓe kirsi ga'i go. Liman'en koo'i ƴiiƴam maaji, mbicci ɗam haa hirsirde. Nden ɓe kirsi jawɗi baali, ɓe mbicci ƴiiƴam maaji haa hirsirde. Nden ɓe kirsi njawkoy, ɓe mbicci ƴiiƴam maakoy haa hirsirde.

²³Ɓaawo man ɓe ngaddi jawɗi be'i kirseteeɗi ngam ittuki hakkeeji, ɓe ndarni ɗi yeeso laamiiɗo e mooɓtiiɓe fuu. Kamɓe ɓe njowi juuɗe maɓɓe dow maaji.

²⁴Nden liman'en kirsi ɗi, lii'i ɗi bee ƴiiƴam maaji haa hirsirde ngam ittuki hakkeeji Isra'iila fuu. Ngam laamiiɗo umruno ɓe lii'o guleteeɗi e kirseteeɗi man ngam daliila yimɓe Isra'iila fuu.

²⁵Hezekiya darni Lewi'en haa haykaliiru Jawmiraawo bee koŋsiije e moolooji e garayaaji fodde umroore Daawuda e Gada gi'anoowo Daawuda e annabi Natan ngam umroore nde iwi diga Jawmiraawo bee kunnduɗe annabi'en muuɗum.

²⁶Lewi'en ndari ton bee kuuje gimruɗe ɗe Daawuda waɗno, liman'en boo bee algaytaaji.

²⁷Nden Hezekiya umri lii'aago guleteeɗi dow hirsirde. Saa'i liman'en puɗɗi lii'aago ɗi, yimooɓe puɗɗi yimango Jawmiraawo e fuufugo algaytaaji, bee kuuje gimruɗe ɗe Daawuda, laamiiɗo Isra'iila.

²⁸Jama'aare fuu sujidi, yimooɓe ngimi, fuufooɓe puufi algaytaaji, bana nii ɓe fuu ɓe tokki waɗugo haa liman'en timmini lii'aago guleteeɗi.

²⁹Nde ɓe timmini ɗum, laamiiɗo e wonduɓe bee muuɗum fuu tuggi koppi, cujidani Jawmiraawo.

³⁰Laamiiɗo Hezekiya e mawɓe fuu umri Lewi'en ɓe ngimana Jawmiraawo gimi Daawuda e Asaf, gi'oowo. Ɓe ngimi bee seyo, ɓe turi, ɓe cujidi.

³¹Ɓaawo man Hezekiya wi'i: “Jonta on ceni ko'e mon ngam Jawmiraawo. Ɓadite, ngadde kirseteeɗi mon e dokke gettooje mon haa haykaliiru Jawmiraawo.” Jama'aare waddi kirseteeɗi e dokke gettooje, saahiiɓe boo ngaddi guleteeɗi:

³²Ndaa limgal guleteeɗi ɗi jama'aare nde'e waddani Jawmiraawo: Ga'i cappanɗe joweeɗiɗi e jawɗi baali teemerre e njawkoy teemeɗɗe ɗiɗoy.

³³Ɓe ceni boo kirseteeɗi maɓɓe, ga'i teemeɗɗe joweego (600) e dammooji ujine tati (3.000).

³⁴Ammaa limgal liman'en he'aay ɓolugo dabbaaji guleteeɗi fuu. Ngam maajum banndiraaɓe maɓɓe Lewi'en mballi ɓe, haa ɓe timmini kuugal man, haa liman'en boo ceni ko'e muuɗum'en. Ngam Lewi'en ceni ko'e muuɗum'en bee tiinaare ko ɓuri liman'en.

³⁵Fakat guleteeɗi ɗuuɗi masin, non boo ɓellere kirsaaɗi ngam kawtal yimɓe e dokke dufeteeɗe lii'aaɗe hawtaade bee guleteeɗi. Bana non Hezekiya mo'iniri kuugal dewal haa haykaliiru Jawmiraawo.

³⁶Hezekiya e yimɓe fuu ceyori ko Allah tabitini ngam yimɓe, ngam ɗum fuu ɗum waɗi law.