Read Fulfulde 2 Habaruuji Nyalaaɗe 30 Bible Online

2 Habaruuji Nyalaaɗe 30 - Fulfulde bible

2 Habaruuji Nyalaaɗe 30

¹Hezekiya neldi ewnaandu haa Isra'iila e Yahuuda fuu. O winndani le'i Efrayim e Manassa bataakeeji haa yimɓe ngara haa Urusaliima, ɓe mbaɗa juulde Paska ngam Jawmiraawo, Allah Isra'iila.

²Laamiiɗo e mawɓe mum e jama'aare haa Urusaliima fuu narri waɗugo juulde man nder lewru ɗiɗaɓru.

³Ɓe mbaawaayno waɗugo nde nder saa'iire umraande, ngam limgal liman'en senɓe ko'e muuɗum'en he'aayno, yimɓe boo mooɓtaakino haa Urusaliima tawon.

⁴Haala lewru ɗiɗaɓru fottani laamiiɗo e jama'aare fuu.

⁵Ngam maajum ɓe narri neldugo ewnaandu nder lesdi Isra'iila fuu, diga Biirsaba haa yotto Dan, yimɓe ngara haa Urusaliima, mbaɗa juulde Paska ngam Jawmiraawo, Allah Isra'iila. Naane ɓe meeɗaayno waɗugo nde tawon bee jama'aare ɗuuɗnde fodde umroore deftere.

⁶Yaawɗotooɓe njehi nder lesdi Isra'iila e Yahuuda fuu, bee bataakeeji laamiiɗo e mawɓe mum. Ɓe ngooyni umroore laamiiɗo, ɓe mbi'i: “Onon yimɓe Isra'iila, lorte haa Jawmiraawo Allah Ibrahiima e Isiyaaku e Isra'iila, haa o lortano on, onon luttuɓe, daɗɓe juuɗe laamiiɓe Assuura.

⁷Taa laate bana baabiraaɓe mon e banndiraaɓe mon yewɓe umroore Jawmiraawo Allah kaakiraaɓe muuɗum'en. Kamɓe, Jawmiraawo acci ɓe ɓe kalka, bana ko ngi'oton.

⁸Jonta kam, taa caatine ko'e mon bana kaakiraaɓe mon. Ɗowtane Jawmiraawo, ngare haa haykaliiru maako ndu o seni haa foroy. Njaggane Allah Jawmiraawo mon, ngam haa tikkere maako saatunde acca on.

⁹To on lortake haa maako, nden kam banndiraaɓe mon e ɓikkoy mon keɓan mo'ere haa dahɓe ɓe, ɓe ngarta haa lesdi ndi'i. Ngam Allah Jawmiraawo mon o marɗo enɗam e hinnuye. To on lortake haa maako, nden kam o yeesitittaa, o accataa on.”

¹⁰Yaawɗotooɓe go njehi haa gure fuu nder lesdi Efrayim e Manassa, koo nder lesdi Zabulon boo. Ammaa yimɓe njali ɓe, njanci ɓe.

¹¹Sey woɗɓe nder le'i Aser e Manassa e Zabulon tan leestini ko'e muuɗum'en, ngari haa Urusaliima.

¹²Nder lesdi Yahuuda kam, juŋngo Jawmiraawo huuwi, hokki yimɓe fuu ɓernde woore haa ɓe tokko umroore laamiiɗo e mawɓe mum fodde wolde Jawmiraawo.

¹³Yimɓe ɗuuɗɓe kawti haa Urusaliima nder lewru ɗiɗaɓru, ngam waɗugo juulde tamseeje ɗe ufnaaka, jama'aare ɗuuɗnde masin.

¹⁴Ɓe puɗɗiri bee ittugo kirsirɗe nder Urusaliima e gulduɗe uureteeɗum fuu, ɓe cakkini ɗe nder waadiwol Kederon.

¹⁵Nyannde sappo e nayaɓre nder lewru ɗiɗaɓru, ɓe kirsi njawkoy Paska. Liman'en e Lewi'en cemti, ceni ko'e muuɗum'en, njahri guleteeɗi haa haykaliiru Jawmiraawo.

¹⁶Ɓe ndari haa nokkuure maɓɓe bana ko woowa fodde ko tawreeta Muusa, goɗɗo Allah umruno ɓe. Liman'en njaɓi ƴiiƴam kirsaaɗi haa juuɗe Lewi'en, mbicci ɗam haa hirsirde.

¹⁷Yimɓe ɗuuɗɓe nder jama'aare cenaayno ko'e muuɗum'en. Ngam maajum Lewi'en kirsi njawkoy Paska ngam soɓɓe fuu, ceni koy ngam Jawmiraawo.

¹⁸Ɗum laati non ngam ɓurna ummaatoore, waato yimɓe ɗuuɗɓe iwɓe lesdi Efrayim e Manassa e Issakar e Zabulon cenaayno ko'e muuɗum'en. Ɓe nyaami jawgel Paska, ammaa naa fodde umroore deftere. Hezekiya torani ɓe Jawmiraawo, wi'i: “Jawmiraawo booɗɗo yaafano koo moy

¹⁹mo ɓernde mum anniyi ɗowtanaago Jawmiraawo Allah kaakiraaɓe mum, koo to o senaaka bana ko umroore dow senaare ƴami.”

²⁰Jawmiraawo jaɓi tornde Hezekiya, ukkanaay ɓe sarru[31].

²¹Nyalɗe joweeɗiɗi yimɓe Isra'iila wonɓe haa Urusaliima mbaɗi juulde tamseeje ɗe ufnaaka. Ɓe mbaɗi nde bee seyo maŋngo. Nyalaade fuu Lewi'en e liman'en maŋgti Jawmiraawo bee kuuje gimruɗe iidooje.

²²Hezekiya suusɗini ɓerɗe Lewi'en, ngam ɓe fuu ɓe paami kuugal Jawmiraawo booɗɗum. Nyalɗe joweeɗiɗi ɓe nyaami nder juulde man, ɓe lii'i kirsaaɗi ngam kawtal yimɓe, ɓe ngetti Jawmiraawo Allah kaakiraaɓe maɓɓe.

²³Nden yimɓe jama'aare fuu annini tokkitingo juulde nde nyalɗe joweeɗiɗi goɗɗe. Ɓe mbaɗi nde bee seyo,

²⁴ngam Hezekiya, laamiiɗo Yahuuda hokki ɓe ga'i kalhali ujineere (1.000) e dammooji ujine sappo (10.000). Mawɓe boo ndokki yimɓe ga'i kalhali ujineere (1.000) e dammooji ujine sappo (10.000). Liman'en ɗuuɗɓe ceni ko'e muuɗum'en boo.

²⁵Jama'aare Yahuuda fuu seyi, non boo liman'en e Lewi'en e jama'aare warɓe diga Isra'iila fuu, waato hoɗɓe iwɓe lesdi Isra'iila e jooɗiiɓe haa lesdi Yahuuda.

²⁶Seyo maŋngo waɗi haa Urusaliima, irin maago meeɗaay laataago ton diga zamanu Suleymaanu ɓii Daawuda, laamiiɗo Isra'iila.

²⁷Haa timmoode, liman'en e Lewi'en ummi barkiɗini ummaatoore. Do'aare maɓɓe yotti joonde Jawmiraawo seniinde haa asama, o jaɓi nde.