Read Fulfulde 2 Habaruuji Nyalaaɗe 31 Bible Online

2 Habaruuji Nyalaaɗe 31 - Fulfulde bible

2 Habaruuji Nyalaaɗe 31

¹Nde juulde nde'e fuu timmi, Isra'iila'en wonɓe haa Urusaliima njehi nder gure Yahuuda, pusi daŋraŋge ɗowanteeɓe, pe'i suuraaji Asera, mbili nokkuuje towɗe e kirsirɗe fuu, koo toy nder lesdi Yahuuda e Benyamin e Efrayim e Manassa. Nden Isra'iila'en fuu kooti berniiji muuɗum'en, koo moy haa maral mum.

²Laamiiɗo Hezekiya darni geɓe liman'en e Lewi'en fodde geɓe muuɗum'en, koo moy haa kuugal mum: Ngam lii'aneeki guleteeɗi e kirsaaɗi ngam kawtal yimɓe bee Allah, ngam dewal e gime gettooje e maŋgtooje haa dammuɗe caŋngeeje Jawmiraawo.

³Laamiiɗo hokki yeɓre jawdi mum ngam guleteeɗi fajiri e kiikiiɗe e guleteeɗi nyalɗe ciwtorɗe e juulɗe lewru hesru e juulɗe goɗɗe, bana ko tawreeta Jawmiraawo umri.

⁴Nden Hezekiya umri yimɓe Urusaliima ndokka liman'en e Lewi'en ko haandani ɓe, ngam haa ɓe tabito nder tawreeta Jawmiraawo.

⁵Nde umroore nde'e yotti Isra'iila'en, ɓe ngaddi dokke ɗuuɗɗe, haa aartuɗum ɓenndugo: Alkamaari e inaboojam kesam e nebbam e njumri e ƴaamle gese e zakka[32] kuuje fuu.

⁶Yimɓe Isra'iila e Yahuuda, jooɗiiɓe nder gure Yahuuda, kamɓe boo ɓe ngaddi zakka na'i maɓɓe e dammooji maɓɓe e zakka kuuje ɗe ɓe ceni ngam Allah Jawmiraawo maɓɓe. Ɓe mbaagi ɗe baagaaje ɗuuɗɗe.

⁷Lewru tataɓru ɓe puɗɗi waagugo baagaaje, nder lewru joweeɗiɗaɓru ɓe timmini waagugo ɗe.

⁸Nde Hezekiya e mawɓe mum ngari, ndaari baagaaje man, ɓe ngetti Jawmiraawo e barkiɗini yimɓe mum Isra'iila'en.

⁹Hezekiya ƴami liman'en e Lewi'en haala baagaaje ɗe'e.

¹⁰Azariya, hooreejo liman'en mo danygol Cadok, jaabi mo: “Diga yimɓe puɗɗi waddugo dokke muuɗum'en haa haykaliiru Jawmiraawo, min nyaami, min kaari, ɗuuɗɗum lutti boo, ngam Jawmiraawo barkiɗini yimɓe muuɗum. Ndaa ko lutti, ɗum ɗuuɗɗum masin.”

¹¹Laamiiɗo umri ɓe taaskitina cigorɗi nder haykaliiru Jawmiraawo. Ɓe taaskitini ɗi,

¹²ɓe ngaddi dokke e zakka e kuuje cenaaɗe nder maaji bee hoolaare. Ɓe kalfini ɗum haa Konaniya, Lewiijo. Deerɗiiko Sim'i laati ɗiɗaɓo.

¹³Yehiyel e Azaziya e Nahat e Asa'el e Yerimot e Yozabat e Eliyel e Ismakiya e Mahat e Benaya laati aynooɓe dow ardaaŋgal Konaniya e deerɗum Sim'i. Ɗum fuu ɗum laati dow umroore laamiiɗo Hezekiya e Azariya, kaliifaajo haykaliiru Jawmiraawo.

¹⁴Koore ɓii Yimna Lewiijo, aynoowo dammugal fuunaaŋgewal halfitinaama dokke ɗe yimɓe lii'ani Allah Jawmiraawo, ngam o sennda ɗe.

¹⁵Eden e Minyamin e Yeesu'a e Sema'ya e Amariya e Sekaniya mballiri mo bee hoolaare nder berniiji ɗi liman'en njooɗi. Ɓe cenndani banndiraaɓe maɓɓe Lewi'en dokke haa ndotti'en e haa sukaaɓe fodde geɓe muuɗum'en.

¹⁶Koo moy gorko mo duuɓi tati e ko ɓuri mo innde muuɗum winndaama nder deftere asli, non boo yahanɓe haa haykaliiru Jawmiraawo ngam kuuɗe muuɗum'en fodde geɓe muuɗum'en nyalaade nyalaade

¹⁷e liman'en ɓe inɗe muuɗum'en mbinndaama nder deftere asli fodde ci'e muuɗum'en e Lewi'en ɓe mari duuɓi noogas e ko ɓuri, ɓe inɗe maɓɓe mbinndaama fodde kuugal maɓɓe,

¹⁸ɓe fuu ɓe mbinndaama hawtaade bee rewɓe maɓɓe e ɓikkoy maɓɓe e jama'aare fuu, ngam haani ɓe ceno ngam huuwugo kuuɗe maɓɓe ceniiɗe nder hoolaare.

¹⁹Nder berniiji fuu, woodi worɓe ewnaaɓe bee inɗe muuɗum'en, halfitinaaɓe senndugo dokke haa liman'en nder danygol Haruna jooɗiiɓe haa durduɗe taariiɗe berniiji muuɗum'en. Kamɓe ɓe ngeɗani ɗe worɓe fuu nder ci'e liman'en, non boo winndaaɓe fuu haa defte asli Lewi'en.

²⁰Koo toy nder lesdi Yahuuda, laamiiɗo Hezekiya huuwi kuuɗe booɗɗe, darnuɗe e gooŋgaaje yeeso Allah Jawmiraawo mum.

²¹Ko o annini waɗugo ngam daliila kuugal haa haykaliiru Allah fuu malla ngam ɗowtanaago Allah nder tawreeta e umrooje mum, o waɗani ɗum Allah maako bee ɓernde woore, ɗum waɗi barka boo.