Read Fulfulde 2 Habaruuji Nyalaaɗe 32 Bible Online

2 Habaruuji Nyalaaɗe 32 - Fulfulde bible

2 Habaruuji Nyalaaɗe 32

¹Ɓaawo kuuɗe Hezekiya gooŋgaaje ɗe'e, Sanherib, laamiiɗo Assuura nasti lesdi Yahuuda, saŋngini kommbi berniiji cemmbiɗɗi, umri honooɓe mum nyaama ɗi.

²Nde Hezekiya yi'i Sanherib wari, annini haɓugo bee Urusaliima,

³o sarwotiri bee mawɓe maako e hoore'en suusɓe. Ɓe mbi'i: To laamiiɓe Assuura ngari, taa ɓe tawa ndiyam ɗuuɗɗam. Ngam maajum ɓe narri ɓe cukka ilduɗe ndiyam ceeɓooje fuu haa yaasi berniwol. Ɓe mooɓti yimɓe ɗuuɗɓe, ɓe cukki ceeɓooje, non boo maayel ilooyel les lesdi.

⁵Hezekiya tiɗɗini ɓernde mum, maɓɓi ceekli mahol, nyiɓi cuuɗi towɗi cemmbiɗɗi, waɗi mahol ɗiɗaɓol yaasi maagol boo. O semmbiɗini babal Millo nder Berniwol Daawuda, o umri waɗugo balmi e bawarɗe[33] ɗuuɗɗe.

⁶O darni mawɓe konu dow jama'aare, nden o mooɓti jama'aare haa babal kommbi dammugal berniwol. O wi'i ɓe:

⁷“Cemmbiɗe, cuusɗine ɓerɗe mon. Taa kule, taa tampe sam daliila laamiiɗo Assuura bee jama'aare ɗuuɗnde wonnde bee muuɗum. Ngam gonduɗo bee meeɗen ɓuri gonduɗo bee maako baawɗe.

⁸Kaŋko o woodi baawɗe neɗɗo, ammaa enen en ngoodi Allah Jawmiraawo, o ɗon wondi bee meeɗen ngam wallugo en e haɓango en nder konuuji meeɗen.” Bolle laamiiɗo ɗe'e cemmbiɗini yimɓe Yahuuda.

⁹Ɓaawo man, nde Sanherib, laamiiɗo Assuura bee baawɗe mum fuu ɗon haa Lakis tawon, o neli jaggiiɓe maako haa laamiiɗo Hezekiya e yimɓe Yahuuda wonduɓe bee muuɗum haa Urusaliima, ngam wi'ugo ɓe:

¹⁰“Ndaa nii Sanherib, laamiiɗo Assuura wi'i: Ɗume koolotooɗon haa njooɗooɗon nder Urusaliima, saa'i min ɗon taari ngol?

¹¹Hezekiya wi'i on Allah Jawmiraawo mon hisnan on juŋngo laamiiɗo Assuura. Naa o ɗon esta on, haa on maaya bee weelo e ɗomka na?

¹²Naa kaŋko itti nokkuuje Jawmiraawo towɗe e kirsirɗe mum, o umri yimɓe Yahuuda e Urusaliima: Yeeso hirsirde woore tan cujiditton e dow maare nguloton dokke na?

¹³Kadi on anndaa ko min e kaakiraaɓe am kuuwi ummaatooje haa lesɗe goɗɗe na? Ɗowanteeɓe ummaatooje ɗe'e mbaawi hisnugo yimɓe muuɗum'en diga juŋngo laamiiɗo Assuura koo seɗɗa na?

¹⁴Moy caka ɗowanteeɓe lesɗe ɗe kaakiraaɓe am nattini waawi hisnugo yimɓe muuɗum diga juŋngo am? Noy Allah mon waawrata hisnugo on diga juŋngo am?

¹⁵Kadi, taa Hezekiya sakla on, esta on bana non. Taa nuɗɗine mo. Walaa ɗowanteeɗo haa ummaatoore koo ndeye malla laamu koo nguye waawi hisnugo yimɓe mum diga juŋngo am malla juuɗe kaakiraaɓe am. Nden kam ɗowanteeɓe mooɗon mbaawataa hisnugo on diga juŋngo am!”

¹⁶Nelaaɓe laamiiɗo Assuura ɓesdi bolle kalluɗe dow Allah Jawmiraawo e Hezekiya, jaggiiɗo Jawmiraawo.

¹⁷Laamiiɗo Assuura winnduno bataakeeji boo ngam jancugo Jawmiraawo Allah Isra'iila. Ndaa ko o winndi: “Ɗowanteeɓe ummaatooje lesɗe goɗɗe kisnaay yimɓe muuɗum'en diga juŋngo am. Bana non, ɗowanteeɗo Hezekiya boo hisnataa yimɓe mum diga juŋngo am.”

¹⁸Nelaaɓe maako kooli ɗum bee Ibraniŋkeere bee semmbe, ngam haa ɓe kulna e ɓe tampina yimɓe Urusaliima wonɓe dow mahol berniwol, nden ɓe nyaama berniwol.

¹⁹Ɓe mbolwi dow Allah mo Urusaliima, bana dow ɗowanteeɓe ummaatooje duniyaaru ɓe yimɓe mbaɗi bee juuɗe muuɗum'en.

²⁰Nden laamiiɗo Hezekiya e annabi Esaaya ɓii Amoosa tori Allah haa asama, ngookani mo ngam ballal.

²¹Jawmiraawo neli malaa'ikaajo. Kaŋko o mbari honooɓe semmbiɗɓe e hoore'en e mawɓe fuu nder saŋngeere laamiiɗo Assuura. Laamiiɗo hooti lesdi mum, yeeso mum ɗon wiirni. Nde o nasti suudu ɗowanteeɗo maako, ɓiɓɓe maako woɗɓe mbari mo bee kaafahi.

²²Bana non Jawmiraawo hisniri laamiiɗo Hezekiya e yimɓe Urusaliima juŋngo Sanherib, laamiiɗo Assuura e juuɗe konne'en muuɗum'en fuu. O hokki ɓe de'ere koo toy.

²³Yimɓe ɗuuɗɓe ngari Urusaliima, ngaddani Jawmiraawo dokke. Ɓe ngaddani Hezekiya boo kuuje ɗuuɗa-samanje. Ɓaawoɗon ummaatooje fuu teddini Hezekiya, laamiiɗo Yahuuda.

²⁴Nder wakkati man Hezekiya nyawi haa o ɓadake maayugo. O tori Jawmiraawo. Jawmiraawo jaɓani mo tornde nde, waɗani mo kaayeefi.

²⁵Ammaa Hezekiya yettaay Jawmiraawo boonanɗo mo, ɓernde maako mawniti. Ngam man tikkere Jawmiraawo wari dow maako e Yahuuda e Urusaliima.

²⁶Nden Hezekiya e yimɓe Urusaliima leestini ko'e muuɗum'en. Ngam maajum Jawmiraawo ukkanaay ɓe tikkere mum, saa'i Hezekiya o geeto.

²⁷Hezekiya laati diskuɗo, tedduɗo masin. O nyiɓi ndesaaje ngam mardi maako: kaŋŋeeri e cardi e kaa'e ɗuuɗa-samanje e kuuje uurɗe e bawarɗe e kuuje goɗɗe marɗe saman,

²⁸non boo cuuɗi cigorɗi ngam alkamaari e inaboojam kesam e nebbam e cuuɗi na'i e cuuɗi baali.

²⁹O nyiɓi berniiji, o woodi boo baali e na'i ɗuuɗɗi ngam Allah hokki mo jawdi ɗuuɗndi masin.

³⁰Hezekiya sukki joldude maayel Gihon dowre, wasi ilaagol les lesdi, haa maayel wurto haa les nder Berniwol Daawuda, gal wakeere hiirnaaŋge. Kuuɗe maako fuu mbaɗi barka.

³¹Ammaa nde wakiili'en Baabila nelaaɓe ngari haa maako, ƴami mo haala kaayeefi go nder lesdi maako, Allah acci o foonde, ngam anndugo ko woni nder ɓernde maako fuu.

³²Luttuɗum haala Hezekiya e kuuɗe mum koolaaɗe, ɗum winndaama nder Wahayu annabi Esaaya ɓii Amoosa, nder Deftere Laamiiɓe Yahuuda e Isra'iila.

³³Hezekiya maayi, ɓe uwi mo haa nokkuure towtunde dow genaale ɗe yimɓe danygol Daawuda. Yimɓe Yahuuda e Urusaliima fuu teddini mo, saa'i o maaya. Ɓiyiiko Manassa laami haa pellel maako.