Read Fulfulde 2 Habaruuji Nyalaaɗe 33 Bible Online

2 Habaruuji Nyalaaɗe 33 - Fulfulde bible

2 Habaruuji Nyalaaɗe 33

¹Manassa woodi duuɓi sappo e ɗiɗi, saa'i o laamo. O laami haa Urusaliima duuɓi cappanɗe jowi e jowi.

²O waɗi kalluɗum yeeso Jawmiraawo bee tokkaago kuuɗe nyidduɗe ɗe ummaatooje ɗe Jawmiraawo riiwno yeeso Isra'iila'en mbaɗno.

³O nyiɓti nokkuuje towɗe ɗe baaba maako Hezekiya yibbinno go. O mahani Ba'alji kirsirɗe, o waɗi suuraaji Asera[34], o sujidani tagle asama fuu, o rewi ɗe.

⁴O nyiɓi kirsirɗe ngam labbi nder haykaliiru Jawmiraawo, ndu Jawmiraawo wi'no: “Innde am wonan haa Urusaliima foroy.”

⁵O nyiɓani tagle asama fuu kirsirɗe haa dalde ɗiɗi nder haykaliiru Jawmiraawo.

⁶O lii'i ɓiɓɓe maako worɓe, o wulani labbi nder waadiwol Ɓii-Hinnom. O waɗi hatti e hiila, o darni sarwotooɓe maayɓe e laarooɓe sirriijum. O ɗuɗɗini kalluɗum yeeso Jawmiraawo ngam haa o tikkina mo.

⁷O darni suura lawru cehaaŋga nder haykaliiru Allah, ndu Allah wi'no Daawuda e ɓiyum Suleymaanu boo: “Haa haykaliiru Urusaliima ndu'u, berniwol ngol cuɓmi caka berniiji le'i Isra'iila sappo e ɗiɗi fuu haa innde am wona ton haa foroy.

⁸To ummaatoore Isra'iila ɗowtanake ko umrumi nde fuu fodde tawreeta fuu, waato farillaaji e kiitaaji ɗi mi umruno ɓe bee hunnduko Muusa jaggiiɗo am, mi meetataa daaynugo ɓe bee lesdi ndi ndokkumi kaakiraaɓe maɓɓe.”

⁹Ammaa Manassa esti yimɓe Yahuuda e Urusaliima, haa ɓe mbaɗi kalluɗum ko ɓuri ummaatooje ɗe Jawmiraawo halkuno yeeso Isra'iila'en.

¹⁰Jawmiraawo wolwani Manassa e yimɓe mum, ammaa ɓe cali nanugo.

¹¹Ngam man o acci mawɓe honooɓe laamiiɗo Assuura ngara dow maɓɓe. Ɓe naŋngi Manassa bee ngoodi, ɓe kaɓɓi mo bee callalluuji njamndi mboɗeeri, ɓe njahri mo haa Baabila.

¹²Nder ɓillaare maako o leestini hoore maako masin yeeso Allah kaakiraaɓe maako, o tori Jawmiraawo Allah maako.

¹³Allah jaɓi tornde maako, woonani mo, wartiri mo haa Urusaliima, hokkiti mo laamu boo. Nden Manassa annditi Jawmiraawo woni Allah fakat.

¹⁴Ɓaawo man Manassa nyiɓti mahol Berniwol Daawuda yaasiwol, diga hiirnaaŋge Gihon nder waadiwol haa yotti Dammugal Liɗɗi, ngol taari towndiire Ofel, o towni ngol masin. O jo'ini mawɓe honooɓe nder berniiji cemmbiɗɗi nder lesdi Yahuuda fuu.

¹⁵O wurtini labbi jananni e suura lawru diga haykaliiru Jawmiraawo. O itti kirsirɗe ɗe o nyiɓno haa hooseere haykaliiru Jawmiraawo e Urusaliima. O wudini kuuje ɗe'e fuu yaasi berniwol.

¹⁶Nden o nyiɓti hirsirde Jawmiraawo, o lii'ani mo kirseteeɗi ngam kawtal yimɓe e kirseteeɗi yettoore dow hirsirde man. O umri yimɓe Yahuuda ɓe njaggano Jawmiraawo Allah Isra'iila.

¹⁷Ummaatoore kam tokki lii'aago kirseteeɗi haa nokkuuje towɗe nder lesdi, ammaa ngam Allah maare tan.

¹⁸Luttuɗum haala Manassa e kuuɗe e tornde mum nde o tori Allah e habaruuji yi'ooɓe wolwanɓe mo bee innde Jawmiraawo Allah Isra'iila, ɗum winndaama nder Habaruuji Laamiiɓe Isra'iila.

¹⁹Tornde laamiiɗo e jaawaabu Allah e haala hakkeeji mum e no o yewri umroore Allah e nokkuuje towɗe ɗe o nyiɓi e suuraaji Asera e labbi ɗi o waɗi hiddeko o leestina hoore maako, ɗum winndaama nder Habaruuji Hosay.

²⁰Manassa maayi, ɓe uwi mo nder saare maako. Ɓiyiiko Amon laami haa pellel maako.

²¹Amon woodi duuɓi noogas e ɗiɗi, saa'i o laamo. O laami haa Urusaliima duuɓi ɗiɗi.

²²O waɗi kalluɗum yeeso Jawmiraawo, bana baaba maako Manassa waɗno. Amon rewi labbi cehaaɗi fuu ɗi Manassa sehino, o lii'ani ɗi kirseteeɗi boo.

²³O leestinaay hoore maako yeeso Jawmiraawo bana baaba maako leestiniri nde. Amon ɗuɗɗini aybeeji mum.

²⁴Jaggiiɓe maako tuurtani mo. Ɓe mbari mo nder suudu maako.

²⁵Ammaa yimɓe lesdi Yahuuda mbari tuurtuɓe dow laamiiɗo Amon. Nden ɓe laamini ɓiyiiko Yusiya haa pellel maako.