Read Fulfulde 2 Habaruuji Nyalaaɗe 6 Bible Online

2 Habaruuji Nyalaaɗe 6 - Fulfulde bible

2 Habaruuji Nyalaaɗe 6

¹Nden Suleymaanu wi'i: “Yaa Jawmiraawo, a wi'i a jooɗoto nder nyiɓre ɓaleere.

²Ammaa min mi nyiɓani ma suudu woondu masin, ndu laato jooɗorde maaɗa haa foroy.”

³Nden laamiiɗo yeesiti, barkiɗini yimɓe jama'aare Isra'iila fuu, saa'i ɓe ɗon ndari.

⁴Nden o wi'i: “Mi yetti Jawmiraawo Allah Isra'iila! Bee baawɗe maako o hebbitini ko o iinani baaba am Daawuda. Ndaa ko o wi'i mo:

⁵Diga nyalaade nde mi wurtini ummaatoore am nder lesdi Misra, mi meeɗaay suɓugo berniwol koo gootol caka berniiji le'i Isra'iila, ngam haa ɓe mahanammi haykaliiru ngam haa innde am wona ton. Mi suɓaay boo goɗɗo feere ngam ardanaago ummaatoore am Isra'iila.

⁶Ammaa mi suɓi Urusaliima ngam haa innde am wona ton, mi suɓi ma, an, Daawuda, ngam laamanaago ummaatoore am.

⁷Suleymaanu tokki wi'ugo: Baaba am Daawuda waɗno anniya mahugo haykaliiru, o sena ndu ngam Jawmiraawo Allah Isra'iila.

⁸Ammaa Jawmiraawo wi'i mo: A waɗi anniya mbooɗka ngam mahango yam haykaliiru.

⁹Ammaa naa an mahantammi ndu, ɗum ɓiɗɗo ma tammi mahango yam ndu.

¹⁰Bana nii Suleymaanu tokki wi'ugo: Jawmiraawo hebbitini iinawol muuɗum. Mi jooɗake dow leeso laamu baaba am Daawuda, mi laamanake Isra'iila, bana Jawmiraawo wi'no. Mi mahi haykaliiru ndu'u, mi seni ndu ngam Jawmiraawo Allah Isra'iila.

¹¹Nder maaru njo'inmi sundukru alkawal ngal Jawmiraawo haɓɓuno bee Isra'iila'en.”

¹²Nden Suleymaanu dari yeeso hirsirde Jawmiraawo, jama'aare Isra'iila fuu ɗon laara. O weeɗi juuɗe maako, o ɓaŋgti ɗe ngam waɗugo do'aare.

¹³Suleymaanu waɗno ba'eteeɗum njamndi mboɗeeri, jo'inno ɗum haa babal haykaliiru. Njuutirka e njaajirka ba'eteeɗum man meetir ɗiɗi bee reeta e towirka man boo meetir gootel bee reeta. O wa'i dow man, o tuggi koppi maako yeeso jama'aare Isra'iila fuu, o weeɗi juuɗe maako heedi asama,

¹⁴o wi'i: “Yaa Jawmiraawo Allah Isra'iila, walaa mo nanndi bee ma, koo haa asama, koo haa lesdi. An a ɗon hakkilani alkawal ma bee hoolaare ngam maccuɓe ma, ɗowtantooɓe ma bee ɓernde woore.

¹⁵A waɗani baaba am Daawuda, maccuɗo ma ko a iinani mo. Ko a wolwani mo, an bee hoore ma a hebbitini ɗum hannde

¹⁶Jonta boo, yaa Jawmiraawo Allah Isra'iila, hebbitinan maccuɗo ma baaba am Daawuda, ko a iinani mo: A wi'i: To yimɓe danygol ma ɗowtani yam bana an a ɗowtani yam, foroy gooto caka maɓɓe jooɗoto yeeso am, dow leeso laamu ɓaawo maaɗa, o laamanto ummaatoore Isra'iila. Ammaa sey ɓiɓɓe ma kakkilana laawol muuɗum'en, ɓe ɗowtano umrooje am, bana an a yehi yeeso am.

¹⁷Ngam maajum, yaa Jawmiraawo Allah Isra'iila mi tori ma hebbitin jonta iinawol ngol a iinani maccuɗo ma Daawuda.

¹⁸Ammaa yaa Allah, gooŋga a jooɗoto caka yimɓe haa lesdi na? Ndaa, asamanji ɓurɗi towugo fuu ke'ataa ma jooɗaago, sakko suudu ndu mi mahani ma!

¹⁹Ammaa, yaa Jawmiraawo Allah am, waylita gal am, nan tornde e do'aare am, heɗita wookaandu e do'aare maccuɗo ma.

²⁰Aynu haykaliiru ndu'u jemma e naaŋge, ngam ɗum nokkuure nde a wi'i a tabitinan innde ma ton. Nan tornde nde mi ɗon toro diga ɗo.

²¹Nan torɗe am e ɗe Isra'iila'en, ummaatoore ma toroto ma haa nokkuure nde'e. Nan tornde amin diga haa ngonɗa ton haa asama e yaafa min.

²²To goɗɗo waɗani keeddiɗɗum hakke, to ɓe mbi'i sey o huno hunayeere bee naaloore, to o wari hunaago yeeso hirsirde nder haykaliiru ma,

²³an, yaa Jawmiraawo, gonɗo haa asama, nan tornde amin, waɗan maccuɓe ma kiita, ngam haa aybuɗo hiite, aybe man loro dow maako e gooŋgaajo waŋga o laaɓɗo.

²⁴To konne'en njaalake yimɓe ma Isra'iila'en ngam ɓe mbaɗi hakke dow ma, to ɓe torake ma yaafuye, to ɓe maŋgti ma, to ɓe torake ma nder haykaliiru ndu'u,

²⁵an, yaa Jawmiraawo gonɗo haa asama, nanan ɓe, yaafa hakkeeji maɓɓe, hokkitit ɓe lesdi ndi a hokkuno ɓe e kaakiraaɓe maɓɓe.

²⁶To asama maɓɓake, iyeende walaa ngam ɓe mbaɗi hakke dow ma, to ɓe ngari ɓe tori ma haa nokkuure nde'e, ɓe maŋgti ma e to ɓe leesni ko'e maɓɓe, ɓe tuubi, ɓe acci waɗugo hakke,

²⁷an, yaa Jawmiraawo gonɗo haa asama, nanan ɓe, yaafa hakkeeji maɓɓe, ngam ɓe maccuɓe ma e ɗum ummaatoore ma, fahin, ekkitin ɓe haa ɓe tokko laawol darnuŋgol, nden a toɓnana ɓe iyeende dow lesdi ndi a marni ɓe.

²⁸To weelo waɗi nder lesdi malla nyawu kalluŋgu ndaaɓoowu saŋkitake nder lesdi, to alkamaari yoori malla nyoli, to baɓɓatti malla ndo'uuji ɗuuɗɗi ngari, to konne'en kippake Isra'iila'en haa berniiji muuɗum'en, to masiibo waɗi malla nyawu koo nguye,

²⁹to koo moy nder Isra'iila'en, ummaatoore ma nasti nder ɓillaare e torra, o toroto ma, to o weeɗi juuɗe maako gal haykaliiru ndu'u ngam toraago ma,

³⁰an, yaa Jawmiraawo, jooɗiiɗo haa asama, nanan mo, yaafa mo, waɗan koo moy fodde kuuɗe mum, nde a anndi ɓernde maako. Ngam an feere ma anndi ɓerɗe ɓiɓɓe Aadama.

³¹Waɗ ɗum ngam haa Isra'iila'en kule e tokko laabi ma tum saa'i ɓe ngeeɗata nder lesdi ndi a hokki baabiraaɓe amin fuu.

³²Nden to jananno mo laataaki goɗɗo caka Isra'iila'en ummaatoore ma, wari diga lesdi ndaayiindi ngam daliila innde ma teddunde e baawɗe mawɗe ɗe a ɗon huuwra ngam toraago ma nder haykaliiru ndu'u,

³³an, yaa Jawmiraawo, jooɗiiɗo haa asama, nanan mo, hokku mo ko o tori, haa ummaatooje duniyaaru fuu annde ɓe ekkito ɗowtanaago ma bana Isra'iila ummaatoore ma ɗowtorante, ɓe annda boo haykaliiru ndu mi mahi, fakat mi lii'anake ma ndu.

³⁴To yimɓe ummaatoore ma ndilli haɓoygo bee konne'en muuɗum'en, dow laawol ngol nelata ɓe, to ɓe ngaylitake gal berniwol ngol a suɓi e haykaliiru ndu mi mahani ma, to ɓe torake ma,

³⁵an jooɗiiɗo haa asama, nan do'aare maɓɓe e tornde maɓɓe, wallu ɓe.

³⁶To Isra'iila'en mbaɗi sooynde ɗowtaare haa yeeso ma, ngam walaa goɗɗo mo waɗataa sooynde ɗowtaare sam, teema a tikkanan ɓe, a hokkan ɓe haa konne'en e a accan ɓe haa ɓe ndaha ɓe haa lesdi ɓadiindi malla daayiindi,

³⁷nden, to haa lesdi ndi ɓe laati maccuɓe, ɓe numti, ɓe puɗɗi toraago ma bee wi'go: Min mbaɗi sooynde ɗowtaare, min mbaɗi hakke, min aybuɓe!

³⁸To ɓe tori ma yaafuye bee ɓerɗe maɓɓe fuu e bee yoŋkiiji maɓɓe haa lesdi ndi ɓe ndaha, to ɓe ngaylitake gal lesdi ndi a hokki baabiraaɓe maɓɓe, gal berniwol ngol a suɓi e gal haykaliiru ndu mi mahani ma, to ɓe torake ma,

³⁹nden, an jooɗiiɗo haa asama, nan do'aare maɓɓe e tornde maɓɓe, war wallu ɓe, yaafana yimɓe ma hakkeeji ɗi ɓe mbaɗi dow ma.

⁴⁰Allah am, nan, laar, heɗita do'aare haa yeeso ma haa nokkuure nde'e jonta.

⁴¹Umma, yaa Allah Jawmiraawo, war haa nokkuure siwtorde ma, an bee sundukru ma marndu baawɗe. Yaa Allah Jawmiraawo, liman'en maaɗa ɓorno kisndam, hoolaaɓe ma ceyoro hayru.

⁴²Yaa Allah Jawmiraawo, taa wudin laamiiɗo mo moytuɗa, siftor mo'e ɗe mbaɗanɗa maccuɗo ma Daawuda.”