Read Fulfulde 2 Habaruuji Nyalaaɗe 7 Bible Online

2 Habaruuji Nyalaaɗe 7 - Fulfulde bible

2 Habaruuji Nyalaaɗe 7

¹Nde Suleymaanu timmini do'aare nde'e, yiite iwi haa asama, nyaami guleteeɗi e kirsaaɗi. Tedduŋgal Jawmiraawo hebbini haykaliiru.

²Liman'en mbaawaay nastugo haykaliiru ngam tedduŋgal Jawmiraawo hebbini ndu.

³Isra'iila'en wonɓe ton fuu ngi'i no yiite jippori, no tedduŋgal Jawmiraawo waalori dow haykaliiru. Ɓe cujidi dow taŋkol, ɓe cujidani Jawmiraawo, ɓe ngetti mo “ngam o booɗɗo, mbooɗeeŋga maako ɗon haa abada.”

⁴Nden laamiiɗo e ummaatoore fuu lii'ani Jawmiraawo kirseteeɗi.

⁵Suleymaanu lii'i ga'i ujine noogas e ɗiɗi (22.000) e dammooji ujine teemerre e noogas (120.000). Bana non laamiiɗo e ummaatoore fuu ceniri haykaliiru Allah.

⁶Liman'en ndari haa nokkuuje muuɗum'en, non boo Lewi'en bee kuuje gimruɗe ngam maŋgtugo Jawmiraawo. Laamiiɗo Daawuda umruno waɗugo kuuje ɗe'e, haa ɓe ngetta Jawmiraawo mo mbooɗeeŋga mum ɗon haa abada, koo ndey o maŋgti Jawmiraawo bee ballal maɓɓe. Liman'en tiitotiri bee maɓɓe, puufi algaytaaji muuɗum'en. Yimɓe Isra'iila fuu ɗon ndari ton.

⁷Suleymaanu seni nokkuure caka babal yeeso haykaliiru Jawmiraawo, ngam ton o lii'i guleteeɗi e dokke nyaamdu e ɓellere kirsaaɗi ngam kawtal yimɓe bee Allah. Ammaa hirsirde njamndi mboɗeeri nde Suleymaanu waɗno ɗum, he'aay jogaago guleteeɗi e dokke nyaamdu e ɓellere kirsaaɗi.

⁸Saa'i maajum Suleymaanu e Isra'iila'en fuu mbaɗi juulde nyalɗe joweeɗiɗi, jama'aare ɗuuɗnde masin. Yimɓe ngari diga lesdi fuu, diga nastirde Hamat haa yotti maayel Misra.

⁹Nyannde joweetataɓre ɓe mooɓti mooɓtorde senaande, ngam ɓe cenno hirsirde nyalɗe joweeɗiɗi, ɓe mbaɗi juulde boo nyalɗe joweeɗiɗi.

¹⁰Nyannde noogas e tataɓre nder lewru joweeɗiɗaɓru, Suleymaanu wi'i yimɓe koota. Ɓe kooti, ɓerɗe maɓɓe keewi seyo ngam Jawmiraawo woonani Daawuda e Suleymaanu e yimɓe mum Isra'iila'en.

¹¹Bana non Suleymaanu timminiri mahugo haykaliiru Jawmiraawo e saare laamu. O mo'ini koo ɗume ko o anninino waɗugo haa cuuɗi ɗi'i.

¹²Nden Jawmiraawo waŋgani mo bee jemma, wi'i mo: “Mi nani do'aare ma. Mi suɓi nokkuure nde'e, nde laatano yam nokkuure kirseteeɗi.

¹³To mi maɓɓi asama, walaa iyeende boo, to mi umri baɓɓatti nyaama keccum fuu haa lesdi malla to mi ukkani yimɓe am nyawu kalluŋgu ndaaɓoowu,

¹⁴to yimɓe ummaatoore am ɓe innde am ewnaama dow muuɗum'en leestini ko'e muuɗum'en, torake yam, ɗakkotiri bee am, to ɓe tuubi, ɓe acci laabi maɓɓe kalluɗi, nden kam mi nanan haa asama, mi yaafoto hakkeeji maɓɓe, mi barkiɗinan[8] lesdi maɓɓe boo.

¹⁵Diga jonta, mi laaran e mi nanan do'aaje baɗeteeɗi haa nokkuure nde'e.

¹⁶Ndaa mi suɓi haykaliiru ndu'u, mi seni ndu, haa innde am wona ton haa foroy, mi hakkilanan ndu, mi woonanan on koo ndey.

¹⁷An boo, to a ɗowtanake yam bana baaba ma Daawuda, to a waɗi ko mi umri ma fuu, to a ɗowtani farillaaji am e kiitaaji am,

¹⁸nden kam, mi tabitinan leeso laamu ma fodde alkawal ngal kaɓɓumi bee baaba ma Daawuda. Mi wi'i mo: Foroy goɗɗo danygol ma laamanto Isra'iila ɓaawo maaɗa.

¹⁹Ammaa to on ngaylitake, to on acci umrooje e farillaaji ɗi umrumi on, to on njehi, on ndewi ɗowanteeɓe woɗɓe, to on cujidani ɓe,

²⁰nden kam mi sottinan on nder lesdi am ndi ndokkumi on. Haykaliiru ndu mi seni ngam tedduŋgal innde am, mi wudinan ndu, ummaatooje fuu njalan ndu, njancan ndu.

²¹Haykaliiru woondu ndu'u laatoto winnde, koo moy caalotooɗo haa kommbi maaru, wemmboto, wi'an: Ngam ɗume Jawmiraawo waɗi lesdi ndi'i e haykaliiru ndu'u bana nii?

²²Nden ɓe njaaboto mo: Ngam ɓe ngudini Jawmiraawo Allah baabiraaɓe maɓɓe mo wurtini ɓe lesdi Misra. Ɓe tokki ɗowanteeɓe woɗɓe, ɓe cujidani ɓe, ɓe ndewi ɓe. Ngam maajum o ukkani ɓe sarru man fuu.”