Read Fulfulde 2 Habaruuji Nyalaaɗe 8 Bible Online

2 Habaruuji Nyalaaɗe 8 - Fulfulde bible

2 Habaruuji Nyalaaɗe 8

¹Nder duuɓi noogas Suleymaanu timmini nyiɓugo haykaliiru e saare mum.

²O nyiɓti berniiji ɗi Hiram laamiiɗo Tirus hokkuno mo, o jo'ini Isra'iila'en nder maaji.

³Nden o yehi haa berniwol Hamat-Soba, o nyaami ngol.

⁴O nyiɓti Tadmora nder ladde hamaadaare, non boo berniiji cigorɗi ɗi o nyiɓno haa Hamat.

⁵O nyiɓti Baytihurun-dow e Baytihurun-les, o semmbiɗini ɗi bee mahi e dammuɗe e jamɗe palduɗe.

⁶O nyiɓi Ba'alat e gure cigorɗe maako fuu, non boo berniiji cigorɗi mootaaji pucci e berniiji ngam wa'otooɓe pucci e ɗum ko o yiɗno nyiɓugo haa Urusaliima, dow hooseere Libanon e nder lesdi laamu maako fuu.

⁷Suleymaanu laatini luttuɓe Heti'en e Amoori'en e Perezzi'en e Hewi'en e Yebusi'en huuwooɓe kuuɗe dooleeje. Ɗum danygol ummaatooje ngol lutti nder lesdi ngam Isra'iila'en mbardaay ɗe. Ɓe fuu ɓe iwaay haa Isra'iila. Ɓe laati maccuɓe Isra'iila haa wargo hannde.

⁹Ammaa Isra'iila'en kam, Suleymaanu waɗaay ɓe maccuɓe. Kamɓe ɓe laati honooɓe maako e ardiiɓe maako e umrooɓe maako e hoore'en dow mootaaji pucci maako e wa'otooɓe ɗi.

¹⁰Laamiiɗo Suleymaanu woodi ardiiɓe wakiili'en teemeɗɗe ɗiɗo e cappanɗe njowo (250). Kamɓe ɓe kakkilani ummaatoore.

¹¹Suleymaanu yahri ɓii Firawna debbo diga Berniwol Daawuda haa saare nde o nyiɓani mo, ngam o wi'i: “Walaa koo gooto nder rewɓe am jooɗoto nder saare Daawuda, laamiiɗo Isra'iila, ngam nokkuuje ɗe sundukru alkawal Jawmiraawo nasti fuu ɗe ceniiɗe.”

¹²Saa'i man Suleymaanu fuɗɗi lii'anaago Jawmiraawo guleteeɗi dow hirsirde nde o waɗno yeeso zawleeru haykaliiru,

¹³fodde ko Muusa umrino dow kirseteeɗi kala nyalaade fuu: Nyalɗe ciwtorɗe e juulɗe lewru hesru e juulɗe tati nder hitaande, waato juulde tamseeje ɗe ufnaaka e juulde asaweeje e juulde bukkaaji.

¹⁴Fodde umroore baaba maako Daawuda, Suleymaanu taynori tokkindirki geɓe liman'en nder kuugal muuɗum'en e Lewi'en ngam haa ɓe ngima maŋgtooje Allah, ɓe mballa liman'en bana ko haani kirseteeɗi kala nyalaade fuu. O umri aynooɓe dammuɗe boo fodde geɓe muuɗum'en e dammugal koo ngale, bana Daawuda, goɗɗo Allah umruno ɗum.

¹⁵Ɓe luutaay umrooje laamiiɗo Daawuda dow liman'en e Lewi'en e ndesaaje, koo seɗɗa.

¹⁶Bana nii kuugal Suleymaanu fuu tabitiri, diga nyannde ɓe mballini caɓɓaaje haykaliiru Jawmiraawo haa nyannde ndu timmi. Haykaliiru Jawmiraawo ndu'u ndu timmundu.

¹⁷Nden Suleymaanu yehi haa Esiyon-Geber e Elat haa fomoonde mbeela, haa lesdi Edoom.

¹⁸Hiram neldi mo koommbooje[9] bee juuɗe huuwooɓe mum e waawɓe laanyugo koommbooje dow mbeela. Ɓe njahdi bee huuwanooɓe Suleymaanu, ɓe njotti Ofir. Ton ɓe ɗaɓɓiti kaŋŋeeri, ɓe ngaddani ndi laamiiɗo Suleymaanu, baakin kilo ujine sappo e tati e reeta (13.500).