Read Fulfulde 2 Habaruuji Nyalaaɗe 9 Bible Online

2 Habaruuji Nyalaaɗe 9 - Fulfulde bible

2 Habaruuji Nyalaaɗe 9

¹Laamiiɗo debbo mo laamani lesdi Saba nani habaru maŋngu Suleymaanu. Nden o wari haa Urusaliima, haa o gooŋɗina hikma Suleymaanu bee waɗango mo annditanamji bee yimɓe maako ɗuuɗɓe, bee geelooɗi doondiiɗi kuuje uurɗe e kaŋŋeeri ɗuuɗndi masin e kaa'e ɗuuɗa-samanje. O yotti haa Suleymaanu, o ƴami mo ko o yiɗno ƴamugo fuu.

²Suleymaanu laɓɓinani mo ƴamɗe maako fuu, walaa ƴamol ngol salori mo.

³Nde laamiiɗo Saba debbo nani bolle Suleymaanu hikmaaje e laari laamorde nde o mahi

⁴e nyaamdu saare maako e joonde saraaki'en maako e daraago huuwooɓe nder saare maako e limce maɓɓe e hokkooɓe mo njaramji e limce maɓɓe e guleteeɗi ɗi o lii'i[10] haa haykaliiru Jawmiraawo, nde o yi'i ɗum fuu, o hayɗini masin.

⁵O wi'i Suleymaanu: “Ko nanmi haa lesdi am dow maaɗa e hikma maaɗa, fakat ɗum gooŋga.

⁶Mi nuɗɗinaayno haala maajum, sey nde ngarmi, gite am boo ngi'i ɗum. Ndaa, ɓe ngeccaay yam koo reeta maŋngu hikma ma, a ɓuri haala ka nanmi piw!

⁷Seyo laatani yimɓe ma, seyo laatani huuwanooɓe ma dariiɓe yeeso maaɗa foroy, nananɓe hikma maaɗa.

⁸Yettoore laatano Jawmiraawo Allah ma mo seyori ma, jo'ini ma dow leeso laamu mum, waɗi ma laamiiɗo ngam Jawmiraawo Allah ma. Allah ma yiɗi ummaatoore Isra'iila, tabitini nde haa foroy. Ngam maajum o waɗi ma laamiiɗo maɓɓe haa mbaɗa kiita ngooŋɗuka.”

⁹Nden o hokki laamiiɗo kaŋŋeeri, baakin kilo ujine tati e teemeɗɗe joweego (3.600) e kuuje uurɗe ɗuuɗɗe masin e kaa'e ɗuuɗa-samanje. Walaa kuuje uurɗe ɗuuɗɗe nder lesdi Isra'iila bana ɗe laamiiɗo Saba debbo hokki laamiiɗo Suleymaanu.

¹⁰Dow maajum fuu, huuwooɓe Hiram e huuwooɓe Suleymaanu wadduɓe kaŋŋeeri diga Ofir, ngaddi leɗɗe sandalje e kaa'e ɗuuɗa-samanje boo.

¹¹Bee leɗɗe man laamiiɗo suddi taŋkudi[11] nder haykaliiru Jawmiraawo e saare mum. O waɗi boo moolooji e hooduuji ngam yimooɓe. Leɗɗe sandalje bana ɗe'e meeɗaayno yi'eego nder lesdi Yahuuda.

¹²Laamiiɗo Suleymaanu hokki laamiiɗo Saba debbo ko o yiɗi e ko o ƴami mo fuu, ɓuri dokke ɗe o waddanino Suleymaanu. Nden laamiiɗo Saba e jaggiiɓe mum kooti lesdi muuɗum'en.

¹³Kala hitaande fuu, Suleymaanu heɓi kaŋŋeeri baakin kilo ujine noogas (20.000),

¹⁴accu jomorgol kaŋŋeeri e cardi ngol filooɓe e soorrooɓe e ko laamiiɓe Arabiya e ngomna'en lesdi ngaddani mo.

¹⁵Laamiiɗo Suleymaanu waɗi bawarɗe[12] mawɗe teemeɗɗe ɗiɗi ɗe kaŋŋeeri tappaandi, baakin kilo joweeɗiɗi ngam waɗugo wawarde fuu.

¹⁶Non boo bawarɗe pamare ɗe kaŋŋeeri tappaandi, baakin kilo tati bee reeta ngam waɗugo wawarde fuu. Laamiiɗo nastini ɗe nder suudu Laynde Libanon.

¹⁷Laamiiɗo waɗi leeso laamu maŋngo bee nyii'e nyiibi, o suddi ngo bee kaŋŋeeri laaɓndi.

¹⁸Leeso laamu ngo'o woodi jaaɓruɗe joweego e jaaɓruɗum kosɗe ɗum kaŋŋeeri. Ciwtinorɗe juuɗe ɗon haa bakeeje joonde ɗiɗi fuu. Suuraaji barooɗe ɗiɗi ndari baŋnge ciwtinorɗe juuɗe,

¹⁹dow jaaɓruɗe boo suuraaji barooɗe sappo e ɗiɗi, haa bakeeje ɗiɗi fuu. Irin maajum meeɗaay waɗeego nder laamu koo nguye.

²⁰Jarduɗe laamiiɗo Suleymaanu fuu ɗe kaŋŋeeri. Kuuje nder suudu Laynde Libanon fuu ɗe kaŋŋeeri laaɓndi, walaa kuuwaaɗum bee cardi. Nder zamanu Suleymaanu ɓe ndaari cardi bana huunde meere,

²¹ngam laamiiɗo woodi koommbooje jahanɗe Tarsis, hawtaade bee huuwooɓe Hiram. Nde duuɓi tati mbaɗi fuu, koommbooje[13] Tarsis ngaran, ɗe keewɗe kaŋŋeeri e cardi e nyii'e nyiibi e baaɗi e teekuuji[14].

²²Laamiiɗo Suleymaanu ɓurdi laamiiɓe duniyaaru fuu risku e hikma.

²³Laamiiɓe duniyaaru fuu ɗaɓɓiti yi'ugo Suleymaanu haa nana hikma muuɗum ka Allah hokki ɗum.

²⁴Kala hitaande fuu, yimɓe waranɓe laarugo mo ɗon ngaddana mo caahuuji: Kuuje cardi e kuuje kaŋŋeeri e limce e balmi e kuuje uurɗe e pucci e alfadariije.

²⁵Suleymaanu woodi cuuɗi ujine nayi (4.000) ngam pucci e mootaaji mum. O woodi boo wa'otooɓe pucci ujine sappo e ɗiɗo (12.000). O jo'ini goɗɗi nder berniiji cigorɗi mootaaji, goɗɗi boo haa Urusaliima haa kommbi maako.

²⁶O laamani laamiiɓe fuu, diga maayo Efratis haa yotti lesdi Filisti'en e keerol Misra.

²⁷O ɗuɗɗini cardi haa Urusaliima bana kaa'e, leɗɗe cemmbiɗɗe boo bana dundeeje haa lesdi towndiije.

²⁸Filooɓe ngaddani mo pucci diga Misra e lesɗe goɗɗe fuu.

²⁹Luttuɗum haala Suleymaanu diga fuɗɗoode haa timmoode, ɗum winndaama nder Deftere Habaruuji Annabi Natan e nder Deftere Annabaaku Ahiya Siloojo, non boo nder Deftere Wahayuuji ɗi Iddo, Gi'oowo dow Yerobo'am ɓii Nebat.

³⁰Suleymaanu laamani Isra'iila fuu haa Urusaliima, duuɓi cappanɗe nayi.

³¹Nden o maayi, ɓe uwi mo nder Berniwol Daawuda, baaba maako. Ɓiyiiko Robo'am laami haa pellel maako.