Read Fulfulde Esira 7 Bible Online

Esira 7 - Fulfulde bible

Esira 7

¹Ɓaawo man, saa'i Artahasta ɗonno laamani Persiya, goɗɗo wari diga Baabila. Innde maako Esira ɓii Seraya, taaniraawo Azariya, kaakiraaɓe maako boo, ndaa inɗe maɓɓe: Hilkiyya, Sallum, Cadok, Ahitooba, Amariya, Azariya, Merayot, Zerahiya, Uzzi, Bukki, Abisu'a, Pinehas, Eli'azaaru, Haruna hooreejo liman'en. Esira ummiiɗo Baabila oo, o moodibbo annduɗo tawreeta Muusa ka Jawmiraawo Allah hokki Isra'iila. Juŋngo Allah Jawmiraawo maako ɗon wondi bee maako. Ngam maajum laamiiɗo duŋani mo ko o ɗaɓɓi fuu.

⁷Nder nduuɓu laamiiɗo Artahasta njoweeɗiɗaɓu, Isra'iila'en woɗɓe e liman'en e Lewi'en e yimooɓe e aynooɓe dammuɗe e huuwooɓe kuuɗe pamare nder haykaliiru njehi haa Urusaliima.

⁸Esira boo yotti ton nder lewru jowaɓru, nduuɓu laamiiɗo njoweeɗiɗaɓu.

⁹O darnino nyannde go'oore nder lewru aranndu ngam dilluki maako diga Baabila. Nyannde go'oore nder lewru jowaɓru o yotti Urusaliima, ngam juŋngo Allah maako wooɗŋgo wondi bee maako.

¹⁰Ngam Esira annini linyugo tawreeta Jawmiraawo e ɗowtanaago ka e anndingo Isra'iila farillaaji e kiitaaji.

¹¹Ndaa bataakewol ngol laamiiɗo Artahasta hokki limanjo Esira, moodibbo annduɗo umrooje e farillaaji Jawmiraawo ngam Isra'iila:

¹²“Bataakewol ngol iwi haa Artahasta, laamiiɗo laamlaamɓe, yahugo haa Esira limanjo e moodibbo tawreeta Allah mo asama.

¹³Ndaa ko mi umri: Koo moy nder ummaatoore Isra'iila gonɗo nder laamu am e liman'en e Lewi'en, waato mo yiɗi dillididgo bee maaɗa haa Urusaliima fuu, dilla.

¹⁴Laamiiɗo e dawrooɓe muuɗum njoweeɗiɗo neli ma ngam linyugo no kuuje mba'i haa Yahuuda e Urusaliima fodde deftere umrooje Allah maaɗa wonnde haa juŋngo ma.

¹⁵A yahra cardi e kaŋŋeeri ɗi laamiiɗo e dawrooɓe muuɗum ngaddani Allah Isra'iila mo haykaliiru mum ɗon haa Urusaliima caahuuji.

¹⁶Non boo cardi e kaŋŋeeri ɗi keɓata nder lesdi Baabila fuu e caahuuji ummaatoore e liman'en ɗi ɓe ngaddi ngam haykaliiru Allah maɓɓe haa Urusaliima.

¹⁷A huuwtinira ceede ɗe'e bee hakkiilo ngam soodugo ga'i kalhali e jawɗi baali e njawkoy, non boo ngam dokke nyaamdu e dokke dufeteeɗe hawtaade bee kirseteeɗi, a lii'o ɗum fuu dow hirsirde haa haykaliiru Allah mooɗon haa Urusaliima.

¹⁸Cardi e kaŋŋeeri luttuɗi boo, huuwtinir ɗi bana ko fottani ma e banndiraaɓe ma fodde muuyo Allah mooɗon.

¹⁹Kuuwruɗe ɗe keɓata ngam dewal nder haykaliiru Allah maaɗa, jo'in ɗe yeeso Allah haa Urusaliima.

²⁰To woodi haaje feere ngam haykaliiru Allah maaɗa, ko njoɓata fuu, a heɓtan ɗum haa jawdi saare laamu.

²¹Min laamiiɗo Artahasta mi ɗon umra kaliifa'en ndesaaje nder lesdi hiirnaaŋge maayo Efratis fuu: Ko Esira, limanjo e moodibbo tawreeta Allah mo asama ɗaɓɓata haa mooɗon fuu, kuuwe ɗum bee tiɗɗinaare,

²²haa dillango cardi kilo ujine tati e alkamaari buhuuje teemeɗɗe ɗiɗi e inaboojam liitir ujine ɗiɗi e nebbam liitir ujine ɗiɗi, mannda kam foondaaka.

²³Ko Allah mo asama umri fuu, sey ɓe kuuwa ɗum ngam haykaliiru maako bee tiɗɗinaare, ngam taa tikkere maako wara dow maral laamiiɗo e ɓiɓɓe mum.

²⁴Mi ɗon anndina on boo: Liman'en e Lewi'en e yimooɓe e aynooɓe dammuɗe e huuwooɓe kuuɗe pamare nder haykaliiru Allah e huuwooɓe woɗɓe nder maaru, on ngalaa baawɗe yoɓnugo ɓe jomorli dow yimɓe e kuuje coggu e jahaale.

²⁵An boo, Esira, bee hikma ka Allah hokki ma, jo'in hiitooɓe e alkaali'en ngam hiitanaago yimɓe mooɗon haa lesdi hiirnaaŋge maayo Efratis kiita ngooŋɗuka, waato annduɓe umrooje Allah maaɗa fuu. Mo anndaa ɗe boo, sey on anndina mo.

²⁶Mo ɗowtanaaki umrooje Allah maaɗa e umroore laamiiɗo, sey on kiito mo law fodde aybe maako, koo mbarugo mo malla riiwugo mo malla jaɓtugo risku maako malla boo maɓɓugo mo nder suudu fursina[5].”

²⁷Nden Esira wi'i: “Yettoore laatano Allah Jawmiraawo kaakiraaɓe meeɗen, mo ɗowi laamiiɗo ngam ƴaggingo haykaliiru Jawmiraawo haa Urusaliima.

²⁸Jawmiraawo woonani yam, heɓni yam mo'ere yeeso laamiiɗo e dawrooɓe maako e saraaki'en maako marɓe baawɗe fuu. Juŋngo Allah am wooɗŋgo wondi bee am. Ngam maajum tiɗɗinmi ɓernde am, mooɓtumi woɗɓe caka ardiiɓe Isra'iila ngam haa ɓe njahda bee am.”