Read Fulfulde Esira 9 Bible Online

Esira 9 - Fulfulde bible

Esira 9

¹Ɓaawo man ardiiɓe ɓaditi yam, mbi'i: “Isra'iila'en e liman'en e Lewi'en ceedaay bee jananɓe nder lesdi, waato Kanaani'en e Heti'en e Perezzi'en e Yebusi'en e Ammooni'en e Mo'abi'en e Misra'en e Amoori'en, tokkiiɓe al'aadaaji muuɗum'en nyidduɗi.

²Ɓe te'i ɓiɓɓe jananɓe rewɓe, ɓe te'ani ɓe ɓiɓɓe maɓɓe worɓe boo. Bana non ummaatoore senaande jillindiri bee ummaatooje jananne. Ardiiɓe e dawrooɓe aarti waɗgo sooynde hoolaare nde'e.”

³Nde mi nani ɗum, mi seeki toggoore am e ngapaleewol am, mi ɓori gaasa hoore am e wakkude am, mi jooɗi mi cakliiɗo.

⁴Nden ɗowtaniiɓe wolde Allah Isra'iila fuu mooɓi haa am ngam daliila sooynde hoolaare wartuɓe nde'e. Min mi tokki jooɗaago nder saklere haa wargo saa'iire nde ɓe lii'anto Allah dokkal nyaamdu kiikiiɗe.

⁵Mi heɓti hoore am wakkati dokkal man. Nde mi ɗon ɓorni limce am ceekaaɗe go tawon, mi tuggi koppi, mi weeɗi juuɗe am heedi Allah Jawmiraawo am,

⁶mi wi'i: “Yaa Allah am, mi ɗon semta tijjaago heedi ma! zunuubaaji amin towti dow ko'e amin, aybeeji amin njotti asama.

⁷Diga saa'i kaakiraaɓe amin haa wargo hannde min aybuɓe masin. Ngam daliila zunuubaaji amin a hokki min haa juuɗe laamiiɓe jananɓe, minin e laamiiɓe amin e liman'en amin, ngam haa ɓe mbara min, ɓe ndaha min, ɓe njaɓta min, ɓe leestina min bana ko laati hannde.

⁸Jonta boo, yaa Allah Jawmiraawo amin, a woonani min wakkati seɗɗa, a accani min hisɓe, a hokki min hisrude haa nokkuure ma seniinde. Bana non a laɓɓini gite amin, a yeeɗitini min seɗɗa nder njeyaaŋgu amin.

⁹Fakat min maccuɓe, yaa Allah amin, ammaa nder njeyaaŋgu amin fuu a accaay min. A woonani min, a heɓni min mo'ere laamiiɓe Persiya ngam haa a yeeɗitina min, min nyiɓto haykaliiru maaɗa, min ndarnita bille maaru, min keɓa hisrude semmbiɗnde nder Yahuuda e Urusaliima.

¹⁰Ammaa ɗume min mbi'ata jonta kadi, yaa Allah amin? Ngam min acci tokkaago umrooje ma

¹¹ɗe ndokkunooɗa min bee kunnduɗe jaggiiɓe ma annabi'en. A wi'no: Lesdi ndi nastoton ngam haa maron ndi, ndi soɓi, ngam jananɓe jooɗiiɓe ton coɓni ndi bee kuuje muuɗum'en nyidduɗe, diga keerol haa keerol.

¹²Ngam maajum, taa ndokke ɓiɓɓe maɓɓe worɓe ɓiɓɓe mon rewɓe, taa te'ane ɓiɓɓe mon worɓe ɓiɓɓe maɓɓe rewɓe boo. Taa ɗaɓɓite jam maɓɓe e hayru maɓɓe sam. Nden kam on laatoto semmbiɗɓe, on nyaaman kuuje lesdi ɓurɗe wooɗugo, on accanan ndi ɓiɓɓe mooɗon maral duumiiŋgal.

¹³Min njari bone ngam kuuɗe amin kalluɗe e aybeeji amin ɗuuɗɗi. Ammaa an a hiitaaki min fodde zunuubaaji amin ɗuuɗɗi, a accani min luttuɓe ɓe'e.

¹⁴Ɓaawo naawɗum ɗum fuu, min puɗɗita luutugo umrooje ma, min esira bee ummaatooje nyidduɗe ɗe'e na? A tikkantaano min haa a halka min fuu, bilaa accango min luttuɓe e hisɓe na?

¹⁵Yaa Allah, Jawmiraawo Isra'iila, ngam adilaaku ma min lutti haa wargo hannde. Ndaa min yeeso maaɗa bee aybe amin. Min mbaawataa dartaago yeeso maaɗa bana non.”