Read Fulfulde Nehemiya 2 Bible Online

Nehemiya 2 - Fulfulde bible

Nehemiya 2

¹Nder lewru Nisaanu, nduuɓu laamiiɗo Artahasta noogaswu, inaboojam ɗonno jooɗi yeeso maako, mi hoo'i mi hokki mo ɗam. Mi meeɗaayno waŋgugo yeeso maako mi ɗon wonti.

²Laamiiɗo ƴami yam: “Ko waɗi a wonti hannde? A nyawaay boo! Fakat, ɓernde ma metti!” Mi hultori masin,

³mi wi'i laamiiɗo: “Allah hokke sabbuŋgo, barkaama! Mi ɗon wonti ngam berniwol haa ɓe uwi kaakiraaɓe am laatake winnde, yiite wuli dammuɗe maagol.”

⁴Laamiiɗo ƴami yam: “Ko ngiɗɗa kadi?” Mi tori Allah mo asama,

⁵nden mi jaabi laamiiɗo: “To ɗum fottani ma, barkaama, to a yerdanake maccuɗo ma, useni nelam haa lesdi Yahuuda, haa berniwol ngol ɓe uwi kaakiraaɓe am, ngam haa mi nyiɓto ngol.”

⁶Laamiiɗo ɗonno jooɗodi bee daada saare muuɗum ƴami: “Haa ndeye jahaaŋgal ma duurata? Ndeye a lortoto?” Ɗum fottani mo o accammi mi dilla. Min boo mi wi'i mo wakkati man.

⁷Fahin mi wi'i mo: “To ɗum fottani ma, barkaama, haani mi heɓa bataakeeji ngam ngomna'en nder lesdi hiirnaaŋge maayo Efratis, haa ɓe accammi mi saalo, mi yotto Yahuuda.

⁸Non boo bataakewol ngam Asaf, kaliifaajo cuuraaɗe laamiiɗo, ngam haa o hokkammi leɗɗe ngam hippugo dammuɗe laamorde baŋnge haykaliiru e leɗɗe ngam mahol taariiŋgol berniwol e suudu ndu njooɗotoomi.” Laamiiɗo yerdanake yam, ngam juŋngo Allah am wondi bee am.

⁹Nde mi yotti haa ngomna'en nder lesdi hiirnaaŋge maayo Efratis, mi hokki ɓe bataakeeji laamiiɗo. Laamiiɗo hokkuno yam woɗɓe hoore'en honooɓe e wa'iiɓe pucci, ɓe ɗoftammi.

¹⁰Ammaa nde Samballat Horoniijo e Tobiya, jaggiiɗo Ammooniijo nani goɗɗo wari suklango hayru Isra'iila'en, ɓe ɓerni masin.

¹¹Mi yotti Urusaliima, mi jooɗi ton nyalɗe tati.

¹²Nden jemma mi ummodi bee worɓe seɗɗa, ammaa mi wi'aay koo moye ko Jawmiraawo yerɓi yam waɗango Urusaliima. Mi yahraay mba'anteewa ngoɗŋga, sey nga mba'iimi.

¹³Mi wurti haa dammugal waadiwol bee jemma, mi yehi gal Seeɓoore Kuuŋga e Dammugal Jiddere. Mi linyi mahol Urusaliima haa mi heɓta gibbe maagol e dammuɗe maagol gulaaɗe.

¹⁴Nden mi saali kommbi Dammugal Seeɓoore e Weendu Laamiiɗo. Ammaa mba'anteewa am waawaay saalaago ton.

¹⁵Ngam maajum, jemma mi wa'i waadiwol ngam linyugo no mahol wa'i. Nden mi lori gal Dammugal Waadiwol, mi warti.

¹⁶Kaliifa'en anndaa toy njahmi malla ko mbaɗmi. Ngam walaa ko mi anndini Yahuudu'en tawon, koo liman'en, koo mawɓe, koo kaliifa'en, koo huuwooɓe woɗɓe.

¹⁷Nden mi wi'i ɓe: “On ɗon ngi'a en ɗon nder bone, ngam Urusaliima laatake winnde, konne'en nguli dammuɗe maagol bee yiite. Ngare! En nyiɓto mahol Urusaliima, ngam taa ngonen foroy nder toskaare.”

¹⁸Mi yecci ɓe no juŋngo Allah am wondiri bee am e ko laamiiɗo wi'no yam boo. Ɓe mbi'i: “Ummen, puɗɗen nyiɓtaago.” Nden ɓe keɓi cuusal huuwugo kuugal booɗŋgal nga'al.

¹⁹Samballat Horoniijo e Tobiya, jaggiiɗo Ammooniijo e Gesem Arabjo nani haala man. Ɓe njanci min, ɓe njawi min, ɓe ƴami: “Ɗume on mbaɗata ɗo? On ɗon tuurtana laamiiɗo na?”

²⁰Mi jaabi ɓe: “Allah mo asama hokkan min hayru. Minin jagganooɓe mo min puɗɗan nyiɓtaago. Ammaa onon on ngalaa geɗal koo baawɗe, walaa boo mo siftorta on haa Urusaliima.”