Read Fulfulde Nehemiya 4 Bible Online

Nehemiya 4 - Fulfulde bible

Nehemiya 4

¹Ammaa nde Samballat e Tobiya e Arab'en e Ammooni'en e yimɓe Asdod nani Yahuudu'en ɗon mbo'itina mahol Urusaliima booɗɗum e puɗɗi maɓɓugo gibbe, ɓe ɓerni masin.

²Ɓe fuu ɓe kawti ngam ɓe kaɓa bee Urusaliima, ɓe cakla min.

³Min tori Allah amin. Jemma e naaŋge min ndarni aynooɓe ngam daliila maɓɓe.

⁴Ammaa yimɓe Yahuuda mbi'i: “Roondooɓe tampi, jiddere bille nde ɗuuɗi. Feere amin min mbaawataa nyiɓtaago mahol ngo'ol!”

⁵Konne'en amin mbi'i: “Ɓe annditittaa e ɓe ngi'ataa koo ɗume haa to en njotti caka maɓɓe, en mbara ɓe, en kaɗa kuugal maɓɓe.”

⁶Ammaa Yahuudu'en jooɗiiɓe kommbi maɓɓe ngari diga toy fuu, ɓe mbi'i min nde sappo: Ngartane min!

⁷Ngam maajum ndarnumi yimɓe nder lugge, ɓaawo mahol, haa dalde mi darni ɓe fodde ci'e maɓɓe bee kaafaaje e labbe e lagaaje.

⁸Nde ngi'mi ɗum, mi wi'i mawɓe e kaliifa'en e yimɓe luttuɓe fuu: “Taa kule ɓe! Ciftore Jawmiraawo mawɗo kulniiɗo! Kaɓe ngam banndiraaɓe mooɗon, ngam ɓiɓɓe mon worɓe e rewɓe, ngam rewɓe mon e ci'e mon!”

⁹Konne'en amin nani min anndi nufayeeje maɓɓe, Allah boo wirgi anniya maɓɓe. Minin fuu min lori haa mahol, koo moy haa kuugal muuɗum.

¹⁰Diga saa'i maajum reeta suka'en am kuuwi, luttuɓe boo njogi labbe e bawarɗe[7] e lagaaje, ɓe ɓorniiɓe sulkeeji. Ardiiɓe ɗon ndari ɓaawo yimɓe Yahuuda

¹¹nyiɓtooɓe mahol fuu. Roondooɓe kuuwi bee juŋngo wooto, ammaa juŋngo woɗŋgo boo jogi balmol.

¹²Nyiɓtooɓe fuu mbakki kaafaaje muuɗum'en, saa'i ɓe ɗon nyiɓa. Puufoowo luwal ɗon wondi bee am.

¹³Mi wi'i mawɓe e kaliifa'en e yimɓe fuu: “Kuugal ɗuuɗani en, nokkuure boo yaaji. En saŋkitiiɓe dow mahol, en daayotirɓe.

¹⁴To on nani luwal, ngare haa nokkuure man, kawte bee amin. Allah men haɓanan en.”

¹⁵Bana non min kuuwri diga subaha haa saa'i nde koode mbaŋgi fahin. Reeta amin ɗon bee labbe haa juŋngo.

¹⁶Saa'i man, mi umri ummaatoore boo: “Koo moy mooɗon waala nder Urusaliima bee suka mum, jemma ɓe ayna min, naaŋge boo ɓe kuuwa.”

¹⁷Koo min, koo deerɗiraaɓe am e sukaaɓe am e aynooɓe tokkiiɓe yam, min ɓortaaki, koo moy ɗon bee balmol muuɗum haa juŋngo nyaamo.