Read Fulfulde Nehemiya 5 Bible Online

Nehemiya 5 - Fulfulde bible

Nehemiya 5

¹Yimɓe ɗuuɗɓe bee rewɓe muuɗum'en nder ummaatoore puɗɗi siŋkugo dow banndiraaɓe maɓɓe Yahuudu'en.

²Woɗɓe mbi'i: “Minin bee ɓikkoy amin ngorkoy e ndehoy min ɗuuɗɓe, sey min keɓa alkamaari ngam haa min nyaama min nguura.”

³Woɗɓe boo mbi'i: “Doole min mballina gese amin e inabooje amin e cuuɗi amin jeŋngina[8], ngam min keɓa alkamaari wakkati weelo.”

⁴Woɗɓe fahin mbi'i: “Min njaɓi nyamaande dow gese amin e inabooje amin ngam min njoɓa laamiiɗo jomorgol.

⁵Naa ɓalli amin poti bee ɓalli banndiraaɓe amin, ɓikkoy amin boo bee koy maɓɓe na? Ammaa doole min nastina koy nder njeyaaŋgu, woɗɓe ɓiɓɓe amin rewɓe boo laatake horɓe. Min ngalaa baawɗe haɗugo ɗum, ngam gese amin e inabooje amin, woɗɓe marti ɗum.”

⁶Nde mi nani siŋkuye maɓɓe e bolle ɗe'e, mi ɓerni masin.

⁷Mi hoo'i anniya felugo mawɓe e kaliifa'en. Mi feli ɓe, mi wi'i: “On ɗon ɗaɓɓa riba koo moy dow banndum!” Nden mi ewni mooɓtorde mawnde ngam daliila maɓɓe.

⁸Mi wi'i ɓe: “Minin min cootti banndiraaɓe amin Yahuudu'en soorraaɓe haa yimɓe ummaatooje feere fodde baawɗe amin. Nden kam, onon on ngiɗi soorrugo ɓe fahin, haa min cootta ɓe na?” Ɓe njeeɗi, ɓe mbaawaay jaabaago.

⁹Mi wi'i: “Ko on mbaɗata, wooɗaay. Naa ndikka on kula Allah ngam taa konne'en men nder ummaatooje tosko en na?

¹⁰Koo min e deerɗiraaɓe am e sukaaɓe am boo, min ndokki ɓe hataka alkamaari e ceede nyamaande. Sey en accana ɓe riba ka tokkiiɗen ɓe.

¹¹Ndokkite ɓe hannde nde'e gese maɓɓe e inabooje maɓɓe e jaytunje maɓɓe e cuuɗi maɓɓe. Njaafane ɓe riba ceede e hataka alkamaari e inaboojam kesam e nebbam, ko on tokkoto ɓe fuu.”

¹²Ɓe njaabi: “Min ndokkitan ɓe ɗum, min ƴamataa ɓe koo ɗume. Min mbaɗan ko mbi'ɗa.” Mi ewni liman'en ngam ɓe tabitina bolle maɓɓe bee hunayeere.

¹³Nden mi fiɗɗi gawargal limce am, mi wi'i: “Bana nii Allah fiɗɗuma koo moy diga saare mum e maral mum, to o hebbitinaay hunayeere maako. O laato piɗɗaaɗo, cooko bana non!” Mooɓtorde fuu wi'i: “Aamiina”, ɓe maŋgti Jawmiraawo. Nden ummaatoore waɗi ko wi'a.

¹⁴Laamiiɗo Artahasta waɗi yam ngomna dow lesdi Yahuuda nder nduuɓu muuɗum noogaswu. Mi ngomnaajo haa wargo nduuɓu maako cappanɗe tati e ɗiɗaɓu. Nder duuɓi sappo e ɗiɗi man fuu mi huuwtiniraay ceede ngomna ngam nguure am, koo ngam deerɗiraaɓe am.

¹⁵Ngomna'en aartuɓe yam teddani yimɓe, ɓe koo'i nyaamdu e njaram non boo ceede cardi cappanɗe nayi. Huuwooɓe maɓɓe boo kolli yimɓe baawɗe. Ammaa min mi waɗaay bana non, ngam mi kulɗo Allah.

¹⁶Mi huuwi boo haa bo'itinki mahol ngo'ol, koo ngesa mi soodaay, huuwooɓe am fuu mooɓti ton ngam kuugal.

¹⁷Yahuudu'en e kaliifa'en teemerre e cappanɗe njowo nyaami nder saare am, non boo hoɗɓe warɓe haa amin diga ummaatooje taariiɗe min.

¹⁸Nyalaade fuu min taaskitini ngaari ngoori e baali cuɓaaɗi joweego e colli e ɓaawo nyalɗe sappo fuu min taaskitini inaboojam ɗuuɗɗam. Ammaa mi ƴamaay nguure am haa ngomna, ngam kuugal teddani ummaatoore masin.

¹⁹Yaa Allah am, siftor ko mi waɗani ummaatoore nde fuu, ngam hayru am.