Read Fulfulde Nehemiya 6 Bible Online

Nehemiya 6 - Fulfulde bible

Nehemiya 6

¹Nde Samballat e Tobiya e Gesem Arabjo e konne'en amin woɗɓe nani mi timmini nyiɓtaago mahol, walaa ceekgol nder maagol sam. Koo nde mi tiggaay pareeje haa dammuɗe tawon,

²Samballat e Gesem neldi yam habaru ni'i: “War, potten haa Kefiriima nder waadiwol Oono.” Ɓe annini waɗango yam kalluɗum.

³Mi neli nelaaɓe haa maɓɓe, ɓe mbi'a ɓe: “Mi ɗon huuwa kuugal maŋngal jonta, mi waawataa accugo ngal, ngam taa ngal dara. Mi jippataako haa mooɗon.”

⁴Ɓe ewni yam bana nii nde nayi, min boo mi jaabi ɓe kal-kal.

⁵Nde jowaɓre Samballat neldi yam bataakewol bee juŋngo suka muuɗum, ngol laarani yimɓe fuu.

⁶Ndaa ko winnda nder maagol: “Caka ummaatooje ɓe ɗon mbi'a, an e Yahuudu'en on ɗon annino tuurtaago, Gesem boo wi'i ɗum. Ngam maajum a ɗon nyiɓto mahol. Ɓe ɗon mbi'a boo a yiɗi laataago laamiiɗo maɓɓe.

⁷A jo'ini annabi'en ngam haa ɓe ngooyna haa Urusaliima: Woodi laamiiɗo nder Yahuuda. Jonta laamiiɗo Persiya tammi nanugo haala ka. Ngam maajum war, carwootiren!”

⁸Mi neldi mo jaawaabu ni'i: “Ko mbi'ɗa, meeɗaay waɗugo. Ɗum iwi haa numooji ma tan!”

⁹Ɓe fuu ɓe ɗaɓɓiti hulnugo min, ɓe tammi: “Ɓe accan kuugal maɓɓe, bana non ngal timmataa.” Ngam maajum yaa Allah, semmbiɗinam!

¹⁰Nyannde go mi nasti suudu Sema'ya ɓii Delaya ɓii Mehetabeyel, ngam o heɓaay wargo. O wi'i: “Sey en kawta haa haykaliiru Allah, nder suudu seniindu, en maɓɓa dammuɗe maaru. Ngam konne'en ma ngaran bee jemma, ɓe ngiɗi mbarugo ma.”

¹¹Mi jaabi mo: “Goɗɗo bana am doggan na? Goɗɗo bana am nastan suudu seniindu ngam hisnugo yoŋki mum na? Mi nastataa ndu!”

¹²Mi faami Allah nelaay mo. O waɗani yam annabaaku ngu'u, ngam Tobiya e Samballat njoɓno mo,

¹³haa mi hultora, mi waɗa bana non, mi waɗa hakke. Nden kam ɓe kallina innde am, ɓe toskammi.

¹⁴“Yaa Allah am, taa yejjitit ko Tobiya e Samballat mbaɗi yam, non boo No'adiya, annabiijo debbo e annabi'en feere ɗaɓɓititɓe hulnugo yam.”

¹⁵Nyannde noogas e jowaɓre nder lewru Elul, mahol lamsi, waato nder nyalɗe cappanɗe jowi e ɗiɗi.

¹⁶Nde konne'en amin nani ɗum, ummaatooje taariiɗe min fuu kultori. Ɗum semtini ɓe masin, ngam ɓe paami kuugal man timmi bee ballal Allah amin.

¹⁷Saa'i man nden, mawɓe Yahuuda neldi bataakeeji ɗuuɗɗi haa Tobiya, bataakeeji maako boo njottani ɓe,

¹⁸ngam ɗuuɗɓe nder Yahuudu'en kaɓɓino alkawal nder hunayeere bee Tobiya, ngam o te'i ɓii Sekaniya ɓii Araha, ɓiyiiko Yehohanan boo te'uno ɓii Mesullam ɓii Berekiya.

¹⁹Ɓe mani mo yeeso am, ɓe lornani mo bolle am boo. Tobiya tokki neldugo bataakeeji ngam hulnugo yam.