Read Fulfulde Asta 3 Bible Online

Asta 3 - Fulfulde bible

Asta 3

¹Ɓaawo man laamiiɗo Ahasuwerus ɓaŋgti Hamman ɓii Hammedata, goɗɗo asŋgol Agag, ardini mo yeeso saraaki'en wonduɓe bee muuɗum fuu.

²Huuwanooɓe laamiiɗo fuu tuggi koppi, cujidani Hamman fodde umroore laamiiɗo. Ammaa Mardokay tuggaay koppi mum, sujidaay boo.

³Huuwanooɓe laamiiɗo go ƴami mo: “Koni luutata umroore laamiiɗo?”

⁴Ɓe tokki ƴamgo mo nyalaade fuu, ammaa o nanaay ɓe. Nden ɓe ngecci ɗum Hamman, haa ɓe ngi'a to Mardokay daroto dow wolde mum ngam o wi'no ɓe o Yahuuduujo.

⁵Hamman yi'i Mardokay tuggaay koppi, sujidinaay mo, ɗum ɓernini mo masin.

⁶Nde ɓe anndini mo ummaatoore Mardokay, o laari halkugo mo feere maako he'aay koo ɗume, ngam maajum o nufi nattingo Yahuudu'en wonɓe nder laamu Ahasuwerus fuu.

⁷Nder nduuɓu laamiiɗo Ahasuwerus sappo e ɗiɗaɓu, nder lewru aranndu wi'eteendu Nisaanu, ɓe mbaɗi kur'u mbi'eteeŋgu Puur yeeso Hamman, ngam nyalɗe e lebbi fuu bee tokkindirki. Kur'u waŋgini lewru sappo e ɗiɗawru wi'eteendu Adar.

⁸Nden Hamman wi'i laamiiɗo Ahasuwerus: “Woodi ummaatoore saŋkitiinde caka ummaatooje goɗɗe nder lesɗe laamu maaɗa fuu. Ɓe kawtataa bee woɗɓe. Umrooje maɓɓe potaay bee umrooje ummaatooje goɗɗe, ɓe ɗowtantaako umrooje maaɗa boo, barkaama. Haanaay a munyana ɓe, barkaama.

⁹To ɗum fottani ma, barkaama, umru mbardugo ɓe. Min boo mi hokkan cardi kilo ujine cappanɗe tati (30.000) haa huuwanɓe kuugal ngal, ɓe nastina ndi nder ndesaari laamu.”

¹⁰Laamiiɗo itti halagaare lammba haa juŋngo mum, hokki nde Hamman ɓii Hammedata Agagiijo, konneejo Yahuudu'en.

¹¹Nden o wi'i mo: “Cardi man, an jeyi e ummaatoore nde boo waɗ nde ko fottani ma.”

¹²Nyannde sappo e tataɓre nder lewru aranndu, ɓe ewni winndooɓe laamiiɗo, Hamman umri ɓe ko ɓe mbinndanta ngomna'en e wakiili'en lesɗe e mawɓe ummaatooje fuu — haa lesdi koo ndiye bee binndol mum e ummaatoore koo ndeye bee wolde mum. Ɓe mbinndi bataakeeji bee innde laamiiɗo, nden Hamman waɗani ɗi lammba bee halagaare go.

¹³O neldi bataakeeji man bee yaawɗotooɓe haa lesɗe laamiiɗo fuu bee umroore mbarugo e halkugo e nattingo Yahuudu'en fuu, derke'en e ndotti'en, ɓikkoy e rewɓe e jaɓtugo kuuje maɓɓe, nder nyalaade woore, waato nyannde sappo e tataɓre nder lewru sappo e ɗiɗawru wi'eteendu Adar.

¹⁴Misaalu bataakewol go waŋgini umroore ngam lesdi koo ndiye, nde wooyne caka ummaatooje fuu haa ɗe taaskano nyalaade man.

¹⁵Yaawɗotooɓe ndilli bee jaawal fodde umroore laamiiɗo. Umroore man waŋgi nder laamorde Suuza. Laamiiɗo e Hamman njooɗi, njardi, ammaa yimɓe nder berniwol Suuza cakli.