Read Fulfulde Asta 7 Bible Online

Asta 7 - Fulfulde bible

Asta 7

¹Laamiiɗo e Hamman ngari nyaamugo haa Asta, debbo laamiiɗo.

²Nyalaade ɗiɗawre nde'e boo, nde ɓe ɗon njarda, laamiiɗo ƴami Asta: “Ɗume torotoɗa mi, Asta? Mi jaɓan tornde ma. Ko ɗaɓɓata fuu, haa dillango reeta laamu am, mi hokkete ɗum.”

³Asta, debbo laamiiɗo jaabi: “To mi heɓi mo'ere haa maaɗa, barkaama, to ɗum fottani ma, mi tori ma a hisna yoŋki am e yimɓe ummaatoore am boo.

⁴Ngam min coorraama, min e ummaatoore am, ngam mbareego e halkeego e nattineego fuu. To min soorraaɓe ngam haa min laato maccuɓe e horɓe, mi wolwataano, ngam ɓillaare nde'e he'ataano ngam daamugo ma, barkaama.”

⁵Laamiiɗo Ahasuwerus ƴami debbo mum Asta: “Moy nufi waɗugo irin ɗu'um? Toy mo?”

⁶Asta jaabi: “Ganyo e konneejo man, ɗum Hamman, kalluɗo oo!” Kultoreeŋgol ukkani Hamman yeeso laamiiɗo e debbo muuɗum.

⁷Laamiiɗo ɓerni, ummi, acci yarugo, yehi haa jarne laamorde. Ammaa Hamman ɓaditi Asta, tori mo ngam yoŋki muuɗum. Ngam o faami laamiiɗo nufani mo sarru.

⁸Nde laamiiɗo warti jarne haa suudu nyaamduuji, o tawi Hamman do'i dow leeso ngo Asta ɗon dow mum. Nden o wi'i: “Kadi o yiɗi naŋngugo debbo am bee semmbe haa nder suudu am na?” Nde laamiiɗo timmini wolwugo bolle ɗe, law ɓe cuddi yeeso Hamman.

⁹Harbona, gooto nder saraaki'en sortaaɓe wi'i laamiiɗo: “Leggal ngal meetir noogas e jowi ɗon dari haa saare Hamman. O taaskitinino ngal ngam ɓilugo Mardokay mo waddani ma habaru ngu hisni ma, barkaama.” Laamiiɗo umri: “Ɓile mo dow maagal!”

¹⁰Ɓe ɓili Hamman dow leggal ngal o taaskitinno ngam Mardokay. Nden ɓernuki laamiiɗo feewti.