Read Fulfulde Asta 9 Bible Online

Asta 9 - Fulfulde bible

Asta 9

¹Nyalaade sappo e tataɓre nder lewru sappo e ɗiɗawru wi'eteendu Adar ɗum nyalaade hebbitingo umroore laamiiɗo. Konne'en tammino ɓe njaalotono Yahuudu'en nyalaade man. Ammaa haala fuu wayliti, Yahuudu'en njaali wanywanyɓe muuɗum'en.

²Ɓe mooɓi nder gure maɓɓe, nder lesɗe laamiiɗo Ahasuwerus fuu, haa ɓe mbara ɗaɓɓunooɓe sarru maɓɓe. Walaa mo darti yeeso maɓɓe, ngam kulol naŋngi ummaatooje fuu.

³Mawɓe lesɗe fuu, ngomna'en e wakiili'en e huuwooɓe kuugal laamiiɗo mballi Yahuudu'en, ngam ɓe kuli Mardokay.

⁴Kaŋko o laati mawɗo haa saare laamiiɗo, innde maako nanaama nder lesɗe fuu, baawɗe maako ɗon ɓesdo yeeso yeeso.

⁵Yahuudu'en mbardi konne'en muuɗum'en bee kaafaaje, nattini ɓe, mbaɗi wanywanyɓe muuɗum'en ko fottani ɓe.

⁶Nder laamorde Suuza ɓe mbari worɓe teemeɗɗe njowo.

⁷Non boo Parsandata e Dalfon e Aspata

⁸e Porata e Adaliya e Aridata

⁹e Parmasta e Arisay e Ariday e Wayejata,

¹⁰ɓiɓɓe Hamman ɓii Hammedata, konneejo Yahuudu'en sappo. Ammaa ɓe koocaay kuuje maɓɓe.

¹¹Nyannde man laamiiɗo heɓi kubar limgal mbaraaɓe nder laamorde Suuza.

¹²O wi'i debbo maako Asta: “Nder laamorde, Yahuudu'en mbari worɓe teemeɗɗe njowo e ɓiɓɓe Hamman sappo, kalki ɓe fuu. Ɗume ɓe mbaɗi nder lesɗe goɗɗe? Ko torotoɗa kadiboo? A heɓan ɗum. To woodi ko ngiɗɗa fahin, ɗum laatoto.”

¹³Asta jaabi: “To ɗum fottani ma, barkaama, accu Yahuudu'en wonɓe haa Suuza tokko waɗugo jaŋngo ko umroore duŋani ɓe hannde. Ɓiɓɓe Hamman boo ɓile dow leɗɗe.”

¹⁴Laamiiɗo umri waɗugo bana non. Umroore man waŋgi nder Suuza, ɓe ɓili ɓiɓɓe Hamman sappo boo dow leɗɗe.

¹⁵Yahuudu'en wonɓe haa Suuza mooɓti nyannde sappo e nayaɓre nder lewru Adar. Ɓe mbari worɓe teemeɗɗe tato haa Suuza, ammaa ɓe koocaay kuuje maɓɓe.

¹⁶Yahuudu'en woɗɓe nder lesɗe laamiiɗo, kamɓe boo ɓe mooɓi ngam faddaago yoŋkiiji maɓɓe. Ɓe keɓi siwtaare, konne'en maɓɓe ɓillaay ɓe fahin, ngam ɓe mbari ujine cappanɗe njoweeɗiɗo e njowo (75.000) caka wanywanyɓe maɓɓe. Ammaa ɓe koocaay kuuje maɓɓe.

¹⁷Kuuje ɗe'e fuu laati nder nyannde sappo e tataɓre nder lewru Adar. Nyannde sappo e nayaɓre ɓe ciwti, ɓe laatini nde juulde nyaamduuji e seyo.

¹⁸Ammaa Yahuudu'en nder Suuza mooɓi nyannde sappo e tataɓre, non boo sappo e nayaɓre nder lewru Adar man. Ɓe ciwti nyannde sappo e jowaɓre, ɓe laatini nde juulde nyaamduuji seynannde.

¹⁹Ngam man Yahuudu'en jooɗiiɓe nder kawyeeji laatini nyannde sappo e nayaɓre nder lewru Adar juulde nyaamduuji e seyo e neldindirki nyaamduuji.

²⁰Mardokay winndi kubaruuji ɗi'i. O neldi boo bataakeeji haa Yahuudu'en wonɓe nder lesɗe laamiiɗo Ahasuwerus, ɓadiiɗe e daayiiɗe fuu.

²¹O umri ɓe waɗugo juulde nder nyannde sappo e nayaɓre nder lewru Adar, non boo nyannde sappo e jowaɓre kala hitaande fuu.

²²Ngam nder nyalɗe ɗe'e Yahuudu'en keɓi siwtaare, konne'en muuɗum'en ɓillaay ɓe fahin. Nder lewru man boo suno maɓɓe laati seyo, bojji maɓɓe laati juulde. Mardokay umri ɓe ɓe laatina nyalɗe ɗe'e nyalɗe juulɗe nyaamduuji e seyo, ngam neldindirgo nyaamduuji e neldango talaka'en dokke.

²³Ko Mardokay winndani Yahuudu'en, ko ɓe puɗɗi waɗugo boo, ɓe laatini ɗum al'aada.

²⁴Ɓe mbaɗi ɗum, ngam Hamman ɓii Hammedata Agagiijo, konneejo Yahuudu'en fuu, nufino dabare halkugo ɓe. O waɗno kur'u mbi'eteeŋgu Puur ngam nattingo ɓe fuu.

²⁵Ammaa nde laamiiɗo nani haala man, o umri bee bataakewol haa nufayeere Hamman hallunde loro dow hoore muuɗum. Ɓe ɓili Hamman e ɓiɓɓe muuɗum dow leɗɗe.

²⁶Ngam maajum Yahuudu'en ɗon mbi'a nyalɗe ɗe'e Puuriima, ngam innde Puur. Ngam daliila bolle bataakewol go e ngam daliila kuuje ɗe ɓe ngi'i, keɓɗe ɓe fuu,

²⁷ɓe tabitini ɗum, ɗum farilla nduumiika dow maɓɓe e danygol maɓɓe e hawtananɓe diina maɓɓe fuu, haa ɓe tokko waɗugo juulde nder nyalɗe ɗiɗi ɗe'e hitaande fuu, bana ko winnda, to saa'i man yottake.

²⁸Ɓe ciftora nyalɗe ɗe'e, ɓe kakkilana ɗe, diga yidere haa yidere, nder saare koo ndeye, nder lesdi koo ndiye, nder wuro koo ngoye, ngam taa nyalɗe Puuriima cotta caka Yahuudu'en, taa ciftorki maaje majja haa danygol maɓɓe.

²⁹Asta ɓii Abihayil, debbo laamiiɗo bee Mardokay Yahuuduujo, mbinndi bee baawɗe fuu bataakewol ɗiɗaɓol ngo'ol ngam tabitingo haala Puuriima.

³⁰Ɓe neldi bataakeeji bee yelanaago Yahuudu'en wonɓe nder lesɗe laamiiɗo Ahasuwerus teemerre e noogas e joweeɗiɗi fuu jam e gooŋgaaku.

³¹Ɗum laati ngam tabitingo nyalɗe Puuriima bee saa'iije maaje, bana Mardokay Yahuuduujo e Asta, debbo laamiiɗo umrino ɗum, bana no Yahuudu'en tabitinino ɗum nyalɗe suumaye e bojji ngam ko'e muuɗum'en e danygol muuɗum'en.

³²Umroore Asta tabitini haala Puuriima ka'a, nde winndaama nder deftere.