Read Fulfulde Gurtaaki 11 Bible Online

Gurtaaki 11 - Fulfulde bible

Gurtaaki 11

¹Jawmiraawo wi'i Muusa: “Lutti masiiboowol gootol, mi neldan ngol dow Firawna e Misra'en, ngol fiyan ɓe. Ɓaawo man o accan on on ndilla, o riiwan on diga ɗo haa foroy.

²Yeccu Isra'iila'en ni'i: Gorko fuu ƴama keeddiɗɗiraawo muuɗum, debbo boo ƴama keeddiɗɗiraawo muuɗum kuuje kaŋŋeeri malla cardi.”

³Jawmiraawo waɗi haa Isra'iila'en keɓi mo'ere yeeso Misra'en. Muusa bee hoore mum boo o mawɗo masin nder lesdi Misra, yeeso saraaki'en Firawna e ummaatoore fuu.

⁴Muusa wi'i Firawna: “Ndaa nii Jawmiraawo wi'i: Caka jemma caalotoomi nder Misra.

⁵Afɓe nder lesdi Misra fuu maayan, diga afo Firawna mo tammi ronugo leeso laamu maako, haa afo korɗo namanɗo haa namarde, afi dabbaaji boo fuu mbaatdan.

⁶Bojji caatuɗi laatoto nder lesdi Misra fuu bana ɗi meeɗaay laataago, ɗi meetataa boo.

⁷Ammaa haa Isra'iila'en, koo rawaandu wohataa yimɓe malla dabbaaji, ngam haa anndon Jawmiraawo senndindiri Misra'en bee Isra'iila'en.”

⁸Saraaki'en ma ɓe'e fuu ngaran haa am, tuggugo koppi yeeso am, ɓe mbi'an: “Dillu, an e ummaatoore ma fuu! Nden mi dillan!” Muusa wurti saare Firawna, o tikkuɗo masin.

⁹Fahin Jawmiraawo wi'i Muusa: “Firawna salan nanango on ngam haa mi ɗuuɗɗina kaayeefiiji am nder lesdi Misra.”

¹⁰Muusa e Haruna mbaɗi kaayeefiiji ɗuuɗɗi ɗi'i fuu yeeso Firawna. Ammaa Jawmiraawo saatini hoore Firawna, o accaay Isra'iila'en ngurto lesdi maako.