Read Fulfulde Gurtaaki 13 Bible Online

Gurtaaki 13 - Fulfulde bible

Gurtaaki 13

¹Jawmiraawo wi'i Muusa:

²“Senanam afɓe e afi dabbaaji fuu nder Isra'iila fuu, ngam mo aarti danyeego fuu e ko aarti rimeego fuu nder Isra'iila, min jeyi.”

³Muusa wi'i yimɓe ummaatoore: “Ciftore nyalaade nde ngurtiiɗon njeyaaŋgu haa Misra, Jawmiraawo wurtini on bee juŋngo semmbiɗŋgo. To on ɗon mbaɗa juulde nde'e, taa on nyaama tamseeje ufnaaɗe.

⁴Hannde nder lewru wi'eteendu Abiiba, on ngurtoto.

⁵On ciftoran ɗum ko laati nder lewru ndu'u, hitaande fuu, to Jawmiraawo nastini on nder lesdi Kanaani'en e Heti'en e Amoori'en e Hewi'en e Yebusi'en. Ɗum lesdi ndi o hunani kaakiraaɓe mooɗon, o hokkan ɓe ndi. Ɗum lesdi keewndi kosam e njumri.

⁶On nyaama tamseeje ɗe ufnaaka nyalɗe joweeɗiɗi. Nyannde joweeɗiɗawre maajum, on mbaɗana Jawmiraawo juulde.

⁷Nyaame tamseeje ɗe ufnaaka nder nyalɗe joweeɗiɗi ɗe'e, taa tamseeje ufnaaɗe e ufnirɗum tawe nder lesdi mooɗon fuu.

⁸Nder wakkati juulde nde'e, on paamtina ɗum ɓikkoy mooɗon. On mbi'a koy: Min mbaɗan juulde nde'e ngam daliila ɗum ko Jawmiraawo waɗani min yaake min ngurti lesdi Misra.

⁹Ɗum laatano on bana alaama ciftinorɗum haa juuɗe malla haa tiiɗe mooɗon. Ngam haa on ciftora farilla Jawmiraawo, on ngooyna ka, ngam kaŋko wurtini on lesdi Misra bee juŋngo mum semmbiɗŋgo.

¹⁰Ɗowtane farilla ka'a nder wakkati maaka diga hitaande haa hitaande.

¹¹Muusa tokki wi'ugo: To Jawmiraawo nastini on nder lesdi Kanaani'en ndi o iinani on e kaakiraaɓe mooɗon, to o hokki on ndi,

¹²on lii'ana mo afo gorko fuu, afi gorɗi haa dabbaaji mooɗon fuu, Jawmiraawo jeyi.

¹³Cootte afre wamnde bee jawgel. To on coottaay nde, sey on ngewa daande maare. Cootte boo afɓe mon worɓe nder ci'e mooɗon.

¹⁴To ɓiɓɓe mooɗon nder garanɗum ƴami on: Ngam ɗume mbaɗoton ɗum? On njaaba ɓe: Bee juŋngo semmbiɗŋgo Jawmiraawo wurtiniri en njeyaaŋgu haa Misra haa en ngonno nder maccuŋgaaku.

¹⁵Nde Firawna saatini hoore mum, sali accugo en, nden Jawmiraawo mbari afɓe nder lesdi Misra fuu, diga afɓe yimɓe haa afi dabbaaji. Ngam man min lii'anto Jawmiraawo afi gorɗi haa dabbaaji fuu, min coottan afɓe amin worɓe boo.

¹⁶Ɗum laatano on bana alaama haa juuɗe mon e ciftinorɗum haa tiiɗe mon. Ngam Jawmiraawo wurtini en Misra bee juŋngo mum semmbiɗŋgo.”

¹⁷Nde Firawna acci Isra'iila'en ndilli, Jawmiraawo tokkinaay ɓe laawol lesdi Filisti'en, koo nde ngol ɓadiiŋgol. Ngam Allah wi'i: “Taa yimɓe mimsito to ɓe ngi'i haɓre, nden ɓe loro haa Misra.”

¹⁸Ngam man o yahri yimɓe dow laawol taarotooŋgol nder ladde kommbi maayo Maaliya. Isra'iila'en ngurti Misra ɓe taaskaniiɓe konu.

¹⁹Muusa hooci i'e Yusufu. Ngam kaŋko o hunnino ɓiɓɓe Isra'iila hunayeere, o wi'no ɓe: “Allah wallan on fakat, nden kooce i'e am.”

²⁰Isra'iila'en ummi Sukkot, ɓe njehi ɓe caŋngini haa Etam, haa sera ladde.

²¹Jawmiraawo ardi ɓe, nyalawma nder ruulde nanndunde bee daŋraŋgal ngam ɗowugo ɓe dow laawol, jemma boo nder yiite nannduŋge bee daŋraŋgal ngam yaynango ɓe, haa ɓe tokko laawol nyalawma e jemma.

²²Nyalawma ruulde man seedaay bee yimɓe, jemma boo yiite man ɗon yeeso maɓɓe.