Read Fulfulde Gurtaaki 22 Bible Online

Gurtaaki 22 - Fulfulde bible

Gurtaaki 22

¹To ɓe tawi gujjo jemma ɗon wujja, ɓe piyi mo haa o maayi, ɗum laatataako mbar-hoore, ammaa to naaŋge fuɗi ɗum waɗi, ɗum mbar-hoore. To ndabbaawa ngujjaaŋga, koo nagge malla wamnde malla ndammoowa, heɓtaama bee yoŋki haa gujjuɗo nga, sey gujjo oo yoɓa, o yoɓa ndabbaawa man cowi ɗiɗi. To o walaa ko o yoɓra ko o wujji man, ɓe coorra mo, o laato maccuɗo.

⁴To goɗɗo duri dabbaaji mum nder ngesa malla nder ngesa inabooje goɗɗo feere, sey o yoɓra ɗum bee ɓurɗum wooɗugo haa ngesa maako malla ngesa inabooje maako.

⁵To goɗɗo ɗon wula wumre mum e to yiite ummake, wuli kaɓɓe alkamaari goɗɗo, wa'aandi e alkamaari ndi wa'aaka tawon malla ngesa, sey kuɓɓuɗo yiite yoɓa jawmu ngesa ka'a.

⁶To goɗɗo halfini keeddiɗɗum ceede malla kuuje ngam o sigano mo ɗum, to ɗum wujjaama nder saare goɗɗo oo, sey gujjo oo yoɓa cowi ɗiɗi, to ɓe tawi mo.

⁷To ɓe tawaay gujjo man, sey jawmu saare daro yeeso Allah, ngam seedugo naa kaŋko nyaami jawdi goɗɗo oo.

⁸Koo ndey ngaaba ummi fuu, koo dow ngaari koo dow wamnde koo dow ndammoowa koo dow limce malla dow koo ɗume majjuɗum fuu ko goɗɗo wi'anta ɗum mardi muuɗum, haala ɗiɗo ɓe'e fuu wara yeeso Allah. Mo Allah aybini ɗum, yoɓa keeddiɗɗum cowi ɗiɗi.

⁹To goɗɗo halfini keeddiɗɗum wamnde malla ngaari malla ndammoowa malla ndabbaawa ngoɗŋga haa o ayna ɗum, to ɗum waati malla yewi kosŋgal malla wuyɓe ngujji, walaa giiɗo ɗum

¹⁰sey hunayeere bee innde Jawmiraawo laato hakkunde maɓɓe ɗiɗo fuu ngam seedugo naa kaŋko nyaami mardi keeddiɗɗum. Nden jawmiijum jaɓa asar maajum, oya boo yoɓataa.

¹¹Ammaa to ɗum wujjaama haa maako fakat, sey o yoɓa ɗum jawmiijum.

¹²To ndabbaawa ladde faɗɗi ɗum, sey o wadda ɗum ngam seedamku, o yoɓataa paɗɗaaɗum.

¹³To goɗɗo wu'i ndabbaawa keeddiɗɗum, to nga yewi kosŋgal malla nga waati, saa'i jawmiiga walaaɗon, sey o yoɓa ɗum.

¹⁴Ammaa to jawmiiga ɗon wondi bee maaga, mo wu'i nga yoɓataa. To nga hoo'aama bee akiri, o hokka saman akiri maaga.”

¹⁵“To goɗɗo esti paanyo debbo mo muuyaaka tawon, waaldi bee maako, sey o yoɓa ceede sadaaki e o te'a mo.

¹⁶To baaba paanyo sali te'nugo mo, sey o yoɓa ceede fodde sadaaki faanyɓe rewɓe.

¹⁷Taa acce hiilaajo debbo yeeɗa.

¹⁸Koo moy waaldi bee ndabbaawa, o mbareteeɗo.

¹⁹Koo moy lii'ani labbi kirsaaɗi, naa haa Jawmiraawo o lii'ani, o mbareteeɗo.

²⁰Taa toonye koɗo, taa ɓille mo, ngam onon boo on hoɗɓeno nder lesdi Misra.

²¹Taa toonye boo rewɓe yurumɓe malla atiime'en.

²²To on toonyi ɓe, kamɓe boo ɓe mboyani yam, mi nanan bojji maɓɓe.

²³Mi tikkan, mi mbaran on bee kaafahi, rewɓe mooɗon laatoto yurumɓe, ɓikkoy mooɗon boo atiime'en.

²⁴To a hokki nyamaande ceede haa goɗɗo ummaatoore am, talakaajo gonɗo haa maaɗa, taa ɗaɓɓu riba haa maako, taa yowan mo ndiyam.

²⁵To on njaɓi toggoore keeddiɗɗiraawo mooɗon jeŋngina[18], ndokkite mo nde hiddeko naaŋge muta,

²⁶ngam o walaa suddaare woɗnde haa o suddoro. To o senndiri bee maare, ɗume o suddorto to o ɗon waalo? O wookantam, mi nanan wookaandu maako, ngam mi Allah kinnotooɗo.

²⁷Taa mbolwe kalluka dow am, min woni Allah. Taa naale ardiiɗo ummaatoore mooɗon.

²⁸Taa sabbite hokkugo yam dokkal haa ɗuuɗeeŋga ƴaamle mooɗon e inaboojam e nebbam mooɗon. Ndokkeeɗam afɓe mooɗon worɓe.

²⁹Bana non mbaɗoton boo bee na'i e dammooji mon. Sey on accida ɗum bee daada maajum nyalɗe joweeɗiɗi. Nyannde joweetataɓre lii'aneeɗam ɗum.

³⁰Laate senaaɓe ngam am. Taa nyaame kusel ndabbaawa paɗɗaaŋga haa ladde, cakkinane ngel dawaaɗi.