Read Fulfulde Gurtaaki 23 Bible Online

Gurtaaki 23 - Fulfulde bible

Gurtaaki 23

¹Taa caŋkite tufle. Taa ceede seedamku fewre ngam wallugo halluɓe.

²Taa tokke mooɓre ngam waɗugo kalluɗum. Taa on ceeda ko fottanta mooɓre ngam suuɗugo gooŋga haa yeeso kiita.

³Taa enɗe laafuɗo haa kiita.

⁴To on potti bee ngaari konneejo mon malla wamnde mum majjunde, lornane mo ɗum.

⁵To on ngi'i wamnde ganyɗo mooɗon do'ake les dimŋgal maare, taa acce nde bana nii, ammaa mballe mo riftugo nde.

⁶To laafuɗo caka mooɗon woodi wullaandu, taa calane mo kiita gooŋɗuka.

⁷Ndaaye haala fewre fuu. Taa mbare adiliijo mo walaa aybe, ngam min Jawmiraawo mi adilintaa baɗoowo zunuuba.

⁸Taa njaɓe caahu rusiya, ngam rusiya haɗan yi'ugo gooŋga, waylan haala gooŋɗuɓe.

⁹Taa ɓille hoɗɓe jooɗiiɓe caka mooɗon. On anndi bee ko'e mooɗon no joonde hoɗɓe wa'i, ngam onon boo on hoɗɓeno nder lesdi Misra.”

¹⁰“Duuɓi joweego aawoton gese mooɗon, mooɓton ƴaamle maaje.

¹¹Ammaa nder nduuɓu njoweeɗiɗaɓru sey on acca lesdi siwto. Ngam haa laafuɓe wonduɓe bee mooɗon keɓa ko ɓe nyaama haa maari e ko lutti boo, dabbaaji ladde nyaama ɗum. Bana non boo kuuwroton bee gese inabooje e jaytunje mooɗon.

¹²Nyalɗe joweego kuuwoton kuuɗe mon, ammaa nyalaade joweeɗiɗawre, ciwte, ngam haa ngaari ma e wamnde ma ciwto e jaggiiɓe e hoɗɓe caka mooɗon keɓa poofa.

¹³Kakkilane ko mbi'mi on fuu. Taa ewne inɗe ɗowanteeɓe woɗɓe, taa goɗɗo nana ɗe haa kunnduɗe mooɗon.”

¹⁴“Hitaande fuu mbaɗaneeɗam juulde nde tati.

¹⁵Sey on tokko waɗugo juulde tamseeje ɗe ufnaaka. Nyalɗe joweeɗiɗi on nyaama tamseeje ɗe ufnaaka, bana mi umri on. Ɗum laato nder saa'iire ta'aande, nder lewru Abiiba. Ngam nder maaru ngurtiiɗon lesdi Misra. Taa ngare yeeso am juuɗe meere.

¹⁶Ɓaawo man on mbaɗa juulde ƴaamnde mon aartunde haa ko aawɗon haa gese mon. Non boo juulde codol haa timmoode hitaande, saa'i on mooɓtata nafuuda kuugal mon haa gese.

¹⁷Hitaande fuu worɓe mon ngara nde tati yeeso am, min Allah Jawmiraawo.

¹⁸Taa lii'aneeɗam ƴiiƴam kirseteeɗi hawtaade bee dokkal marŋgal ufnirɗum. Taa cige ɓellere dabbaaji kirsaaɗi ngam juulde am haa jaŋngo fajiri.

¹⁹Ngadde ɓurɗum wooɗugo haa ƴaamle mon aartuɗe nder suudu Jawmiraawo, Allah mooɗon. Ammaa taa ndefe jawgel nder kosam daada maagel.”

²⁰“Ndaa, mi ɗon nela malaa'ikaajo haa yeeso mooɗon o ayna on dow laawol, o ɗowa on haa nokkuure nde mi taaskitinani on.

²¹Kakkilane mo, nane koŋngol maako, taa tikkine mo. O yaafataako tuurtol mooɗon, ngam innde am ɗon wondi bee maako.

²²To on ɗowtanake mo booɗɗum, to on mbaɗi ko mi wi'i on fuu, mi honan konne'en mon, mi dartanto dartantooɓe on.

²³To malaa'ikaajo am ardake on ngam ɗowugo on haa lesdi Amoori'en e Heti'en e Perezzi'en e Kanaani'en e Hewi'en e Yebusi'en, mi nattinan ummaatooje ɗe'e.

²⁴Taa cujidane ɗowanteeɓe maɓɓe, taa ndewe ɓe, taa kuuwe irin kuuɗe maɓɓe. Ammaa ngibbine labbi ɗi'i e puse daŋraŋge maaji.

²⁵Min Jawmiraawo, Allah mooɗon feere am njaggantooɗon. Nden mi barkiɗinan ko nyaamoton e ko njaroton e mi daaynan nyawuji bee mooɗon.

²⁶Rewɓe rufanɓe deeɗi e rimarɓe tawataake nder lesdi mooɗon fahin. Mi hokkan on juutal balɗe.

²⁷Mi nelan kultoreeŋgol am haa yeeso mon, mi jiiɓan hakkiilooji ummaatooje ɗe on njotti haa maaje fuu. Mi lornan konne'en mon fuu ɓaawo ngam doggugo yeeso mooɗon.

²⁸Mi nelan jabatti haa yeeso mon, ɗi ndiiwa Hewi'en e Kanaani'en e Heti'en yeeso mon.

²⁹Mi riiwataa ummaatooje ɗe'e fuu yeeso mooɗon nder hitaande woore, ngam taa lesdi laato ladde meere, taa dabbaaji ladde ɗuuɗa dow mooɗon.

³⁰Seɗɗa seɗɗa ndiiwranmi konne'en yeeso mooɗon, haa to on ɗuuɗi, nden maron lesdi.

³¹Mi waɗan keerol lesdi mon diga maayo Maaliya haa maayo Filisti'en, diga ladde haa maayo Efratis. Mi hokkan on jooɗiiɓe ton, on ndiiwa ɓe yeeso mooɗon.

³²Taa kaɓɓe alkawal bee maɓɓe e ɗowanteeɓe maɓɓe.

³³Taa ɓe njooɗo nder lesdi mon ngam ɓe esta on on mbaɗa hakke dow am. To on ndewi ɗowanteeɓe maɓɓe, on nastan nder tuuforgol.”