Read Fulfulde Gurtaaki 25 Bible Online

Gurtaaki 25 - Fulfulde bible

Gurtaaki 25

¹Jawmiraawo wi'i Muusa:

²“Yeccu Isra'iila'en ngaddanammi dokkal. Njaɓe ngal haa koo moy fuu, deydey ko ɓernde maako seyi hokkugo.

³Ndaa ko woni dokkal ngal njaɓoton haa maɓɓe: Kaŋŋeeri e cardi e njamndi mboɗeeri,

⁴gaaraaji leŋ[19] ɗigguɗi e carwinaaɗi e boɗeeji seɗɗa e boɗeeji coy e gaasa be'i

⁵e lare jawɗi baali boojinaaɗe e lare liɗɗi mawɗi boojinaaɗe e leggal gawaral

⁶e nebbam ngam pittirla e uurle ngam nebbam cenirɗam e uureteeɗum

⁷e kaa'e onikis e kaa'e takketeeɗe haa ɗancikiyel e jiiba wiɓɓere ngam hooreejo liman'en.

⁸Isra'iila'en mbaɗanammi jooɗorde seniinde, haa mi jooɗo caka maɓɓe.

⁹Mbaɗe jooɗorde senaande e kuuje maare fuu fodde misaalu mo mi hollete.”

¹⁰“Ɓe mbaɗa sundukru ndu leggal gawaral. Njuutirka maaru meetir gootel bee reetita. Njaajirka maaru boo meetir gootel reetita walaa, towirka boo meetir gootel reetita walaa.

¹¹A sudda ndu fuu bee kaŋŋeeri laaɓndi, nder e yaasi fuu. A taarna sera maaru bee fawne kaŋŋeeri.

¹²Ɓolin kalagaaje kaŋŋeeri nayi ngam maaru, feɗu ɗe haa coɓɓuli maaru nayi, kalagaaje ɗiɗi haa wuttudu wooru, non boo kalagaaje ɗiɗi haa wuttudu nduya.

¹³A waɗa cabbi leɗɗe gaware, cudda ɗi bee kaŋŋeeri.

¹⁴A nastina cabbi ɗi'i nder kalagaaje haa buttuli sundukru ngam roondaago ndu.

¹⁵Cabbi man nasta kalagaaje, taa ɗi itte e maaje.

¹⁶Alluhaaje seedamku ɗiɗi ɗe ndokkanmaami, wallin ɗe nder sundukru man.

¹⁷Nden waɗ jooɗorde ngam kefergal nde kaŋŋeeri laaɓndi, njuutirka maare meetir gootel bee reetita, njaajirka maare boo meetir gootel reetita walaa.

¹⁸A waɗa keruba'en ɗiɗo dow seɓattooji jooɗorde ngam kefergal ɗiɗi bee kaŋŋeeri tappaandi.

¹⁹A waɗa keruba gooto haa seɓatto wuttudu jooɗorde ngam kefergal wooru, keruba oya boo haa seɓatto wuttudu nduya. Mbaɗe keruba'en ɗiɗo, ɗum laato kuuwaaɗum gootum bee seɓattooji maare ɗiɗi fuu.

²⁰Keruba'en mbeeɗa bileeji muuɗum'en haa dow, ɓe mbaɗa ɗowdi dow jooɗorde ngam kefergal bee bileeji maɓɓe. Geese maɓɓe tiitotira, ndaara jooɗorde ngam kefergal.

²¹A wallina alluhaaje seedamku ɗe ndokkanmaami nder sundukru, nden a maɓɓa ndu bee jooɗorde ngam kefergal.

²²Ton pottanmi bee maaɗa. Haa jooɗorde ngam kefergal e haa keruba'en wonɓe dow sundukru alkawal mbi'anmaami umrooje am fuu ngam Isra'iila'en.”

²³“A waɗa taabal leggal gawaral, njuutirka maagal meetir gootel, njaajirka maagal reeta meetir, towirka maagal boo meetir gootel reetita walaa.

²⁴A sudda ngal bee kaŋŋeeri laaɓndi, a taarna sera maagal bee fawne kaŋŋeeri.

²⁵A waɗa haa maagal faddorde nde hapakaare, a taarna sera maare bee fawne kaŋŋeeri.

²⁶A waɗa ngam maagal kalagaaje kaŋŋeeri nayi, a feɗa ɗe haa coɓɓuli nayi gonɗi haa kosɗe maagal.

²⁷Kalagaaje man laato ɓadiiɗe faddorde. Ɗe njogo cabbi ngam roondaago taabal.

²⁸A waɗa cabbi leɗɗe gaware, a sudda ɗi bee kaŋŋeeri. A roondoto taabal bee maaji.

²⁹A waɗa taasaaje e taasahoy e bulki e jarduɗe ngam lii'aago dokke dufeteeɗe. A waɗa ɗum fuu bee kaŋŋeeri laaɓndi.

³⁰Dow taabal man mballinta foroy tamseeje jo'inteeɗe yeeso am.”

³¹“A waɗa jo'inirɗum pittirlaaji joweeɗiɗi bee kaŋŋeeri tappaandi laaɓndi. Ɗum laato kuuwaaɗum gootum bee dubbeere e taasahoy e morle e pinndi haa maajum fuu.

³²Lice joweego ngurto haa buttuli maajum. Tati haa wuttudu ndu'u, tati haa wuttudu nduya.

³³Taasahoy tatoy bana ɓiɓɓe lawjahi[20] haa lisal gootal fuu bee morlere e pinndiri. Non boo taasahoy tatoy bana ɓiɓɓe lawjahi haa lisal goɗŋgal bee morlere e pinndiri, bana non lice joweego fuu gurtotooɗe haa jo'inirɗum pittirlaaji.

³⁴Haa dubbeere boo, taasahoy nayoy bana ɓiɓɓe lawjahi bee morle maare e pinndi maare.

³⁵Morlere woore les lice maare ɗiɗi, kadiboo morlere woore les lice maare ɗiɗi, fahin morlere woore les lice maare ɗiɗi, ngam lice joweego gurtotooɗe haa jo'inirɗum pittirlaaji.

³⁶Morle e lice bee jo'inirɗum pittirlaaji fuu, ɗum laato kuuwaaɗum gootum, ɗum kaŋŋeeri tappaandi laaɓndi.

³⁷A waɗa pittirlaaji joweeɗiɗi, a jamna ɗi haa ɗi njayna yeeso maaji.

³⁸A waɗa boo mekefje maajum e taasahoy ndoondi man bee kaŋŋeeri laaɓndi.

³⁹A waɗa kuuwruɗe maajum fuu baakin kilo kaŋŋeeri laaɓndi cappanɗe tati.

⁴⁰A hakkilana kuuɗe man booɗɗum, a waɗa ɗum fuu fodde misaalu mo ngi'ɗa dow hooseere.”